Angaanga

17 AERE atura raua na Amephipoli e Apolonia, e tae atura raua ki Tesalonia, e sunago te reira no te ngati Iuda:

2 Kua tomo aturā Paulo ki roto kia ratou, ko tana ïa peu, ka toru akera sabati, i te māro anga atu kia ratou i te tuatua i tataia ra;

3 I te akamaoraora anga i taua tuatua ra, e te akakite pu anga atu e, e mate rai te Mesia, e e tu akaou mei te mate maira, e tikaʼi; e teia oki te Mesia, ko Iesu nei rai taku e akakite atu kia kotou na.

4 Kua akarongo maira tetai papaki, e kua kapiti katoa maira kia Paulo raua ko Sila; e to te Eleni akamori e manganui ua atu, e te au vaine taoiau kare e tokoiti.

5 Kareka te ngati Iuda akarongo kore, ki akera ïa i te vareae, kua akaputuputu maira ratou i te tangata kikino kanga ra, e uipa akera, kua akakeu iora i taua oire ra, tapini atura i te are o Iasona, umuumu atura ia raua e taki mai ki vao ki te ngai tangata.

6 E kare akera raua i kitea, kua kika maira ratou ia Iasona ma e tokotai puke taeake oki ki te aronga akava i taua oire ra, kapiki atura, Ko te au tangata taruri ke teia i te pa enua ravarai e teia mai nei rai oki;

7 E i ooia mai raua e Iasona; e kare anake e tau ta ratou tuatua i ta Kaisara ra, i te na ko anga e, Te vai ke atura tetai ariki, ko Iesu.

8 Tumatetenga atura te tangata e te aronga akava o taua oire ra ia ratou, i te akarongo anga i taua tuatua ra.

9 E papa iora ratou ia Iasona ma, kua tuku atura ratou ia ratou.

10 Kua tuku atura te au taeake ia Paulo raua ko Sila i reira ki Berea i te po: e tae atura raua ki reira, kua tomo atura ki roto i te sunago o te ngati Iuda.

11 E maata rava to ratou meitaki i to Tesalonia, kua āriki ua oki ratou i te tuatua ma te ngakau maora, e te kimi anga i te tuatua i tataia ra, i te tau anga oki i taua tuatua ra, kare e rā i tukua.

12 E aronga maata maira to ratou i akarongo; e te au vaine Eleni taoiau ra, ma te tane katoa, kare e tokoiti,

13 Kite akera ra te ngati Iuda i Tesalonia ra e, te tuatuaia ra e Paulo te tuatua a te Atua i Berea, kua aere katoa maira ratou ki reira kua taoriori iora i te tangata.

14 Kua tuku atura te au taeake ia Paulo i reira, kia aere tika atu aia ki tai; karekā Sila raua ko Timoteo, noo iora i reira.

15 E te aronga i arataki ia Paulo, kave atura ratou iaia ki Atene; poroakiia maira ratou ia Sila raua ko Timoteo e aere viviki mai kiaia, riro mai nei ratou.

16 To Paulo ra oki tapapa anga mai ia raua i Atene, tangi rava atura tona vaerua i roto iaia uaorai, i te akara anga atu aia i taua oire ra kua ki rava i te au idolo.

17 Kua māro atura aia ki te ngati Iuda i roto i te sunago ra, e te aronga akamori Atua, i reira, e i tana oki i aravei atu i te okoanga ra, kare e rā i vata.

18 Kua taumāro maira kiaia ko e tokotai puke tangata pakari Epikuro, e te Setoiko. Kua na ko akera oki e tokotai, E akapeea maira teianei tangata tuatua tarevakaua kia tuatua mai? kua na ko akera tetai pae, E mea tu demoni ke tana e tuatua aere nei; no te mea i akakite atu aia kia ratou ia Iesu, e te tuakaouanga.

19 Kua opu akera ratou iaia, arataki atura ki te Areopago, kua na ko maira, Ka akakite mai ana kia matou i tenana tuatua ou, taau e apii na.

20 E tuatua tu ke oki taau e apai mai ki to matou nei taringa; te inangaro nei matou kia kite i taua au tuatua na i te tu.

21 Kare rai oki a to Atene ravarai e te tangata ke e noo ki o ratou ra angaanga ke, mari ra ko te akakite e te akarongo atu i te tuatua rikiriki ou.

22 Kua tu akerā Paulo ki runga i rotopu i te Areopago, na ko atura, E te au tangata Atene nei, e maata ua to kotou mātau i te akamori i te demoni, kua kite io nei au.

23 Iaku oki i aaere ua io nei e te tutaka ua anga atu i ta kotou e akamori nei, kite atura au i tetai atarau e te tuatua i tataia ki rungao, NA TE ATUA KITEA KORE. Ko ta kotou oki e akamori ua nei ma te kite kore iaia, koia taku e akakite atu kia kotou nei.

24 Ko te Atua i anga i teianei ao, e te apinga tini ravarai i roto, te Atu o te rangi ma te enua nei, kare ïa i noo i roto i te nao i angaia e te rima tangata nei;

25 Kare ana puapinga i rauka i te rima tangata mei te mea e, i toe tetai mea ngiti iaia, koia uaorai oki tei oronga mai i te ora, e te aʼo, e te au mea katoa, ki te au mea ravarai;

26 E nana i anga i te tangata i te pa enua katoa nei i te toto okotai ra, ei noo i te pa enua katoatoa nei, e kua akono i te tuatau i akono takereia atu, e te kotinga o to ratou kainga;

27 Kia kimi ratou i te Atu, peneiake ko te aa atu ratou iaia, e kitea atu, kare ra aia i atea ke atu ia tatou katoa nei;

28 Nona oki to tatou ora, e i aaere ei, e i noo ei oki; mei ta e tokotai puke atu peʼe no kotou i tuatua maira e, “E tamariki katoa tatou nana.”

29 E teianei, e tamariki tatou na te Atua ra, kare e tika kia manako tatou e, e aite te Atua i te auro, e te ario, e te toka, i taraiia e te karape e te kimi anga o te tangata nei.

30 Kare atura te Atua i akono i taua au tuatau kite kore ra; e teianei ra, te akaue mai nei aia i te tangata ravarai e tataraara, auraka ei ngai toe:

31 No te mea kua akonoia e ia te ra e akava mai ei aia i to te ao katoa nei ma te tuatua-tika, na te tangata i akonoia e ia ra; ko tana i akakite ua mai ki te tangata katoatoa nei, koia i akatu akaou mai iaia mei te mate maira.

32 Kite akera ra ratou i te tuatua i te tuakaouanga i tei mate ra, kua taitoito maira tetai pae; na ko maira oki tetai pae, E akarongo akaou atu matou ia koe i tenana tuatua.

33 Aere aturā Paulo mei rotopu atu ia ratou.

34 Kua akarongo maira tetai pae tangata, e kua kapiti maira kiaia; ko Dionusio no te Areopago tetai, e tetai vaine ko Damari te ingoa, ma e tokotai puke tangata uaorai oki.