Salamo

88 E IEHOVA e, te Atua e oraʼi au nei! te kapiki nei au ia koe i te po e te ao.

2 Kia tae atu taku pure ki mua ia koe na: e ariu mai i to taringa ki toku nei aue.

3 Kua ki oki toku vaerua i te tumatetenga, e kua vaitata roa au ki ade.

4 Kua tatauia au nei no te aronga e riro ki te vaarua; mei te tangata au kare rava e maroiroi:

5 Tei rotopu i te aronga mate toku moenga; mei te aronga taia ra e moe i te vaarua ra, tei kore e manako akaouia e koe ra, e tei tipu keia e to rima ra.

6 Kua tuku koe iaku i roto i te vaarua oonu roa ra; i roto i te ngai poiri, i te au ngai oonu.

7 Te taomi nui nei to riri ki runga iaku nei, e kua akataitaia mai koe iaku ki taau au kare katoa ra. Sela.

8 Kua tuku mamao ke atu koe i te aronga i kite mai iaku ra; kua akariro, koe iaku ei mea rikarika na ratou: kua momani roaia au, kare e tika kia aere ki vao.

9 Kua ruarua toku mata i te rai maki: te kapiki nei au ia koe, e Iehova, kare e rā e tukua; te akatika atu nei au i oku rima kia koe.

10 Ka akakite mai ainei koe i taau ra ravenga taka ke ki te aronga i mate ra? na tei mate ra ainei e tu mai e akameitaki ia koe ra? Sela.

11 Ka akakiteia ainei toou takinga-meitaki i roto i te vaarua ra? taau ra tuatua-mou i roto i te ngai e pou ei?

12 Ka kitea ainei taau ra angaanga taka ke i roto i te poiri? e taau ra tuatua-tika i te enua e ngaropoti ei ra?

13 Te kapiki nui nei au ia koe, e Iehova; ei te popongi taku pure e tae atu ei ia koe.

14 Eaa koe i akaruke ei i toku vaerua, e Iehova? eaa koe i uunaʼi i to mata iaku nei?

15 E mate toku, e te paruparu, mei toku ou anga mairai; i akakoromaki ana au i te mataku no ko na ia koe na; te tumatetenga roa nei rai au.

16 Kua na rungao to riri viviki ra iaku; kua tipu keia au i te au ravenga mataku naau.

17 Kua akapini mai ratou iaku mei te vai ra, e po ua atu te rā; kua takako ravaia au e te reira.

18 Ko tei akaperepere mai iaku ra, e te oa, kua tuku keia ïa e koe ra; tei kite mai iaku ra, tei roto ïa i te poiri.