2 Paraleipomeno

6 KUA tuatua mairā Solomona, I tuatua mai oki a Iehova e, ei roto i te tumurangi poiri aia noo ei.

2 Kua akatu ra au i te are nooanga noou; ei ngai nooanga noou e tuatau ua atu.

3 Kua anga maira te mata o te ariki, kua akaora maira i te uipaanga katoa o Iseraela: kua tu ua maira te uipaanga katoa o Iserael ki runga.

4 Kua tuatua akera aia, Kia akameitakiia te Atua o Iseraela ko Iehova, ko tei akatupu ua i tona rima i ta tona uaorai vaa, i tuatua ki toku metua kia Davida, i te na ko anga e,

5 Mei te rā mairai i arataki mai ei au i toku ra iti-tangata mei te enua maira mei Aiphiti ra, kare au i iki i tetai oire i roto i te au kopu ravarai o Iseraela nei ei akatu anga are, kia vaooia toku nei ingoa i reira; e kare au i iki ua atu i tetai tangata ei tutara ki runga i toku ra tangata ia Iseraela:

6 Kua iki ra au ia Ierusalema; ei reira toku ingoa vai ei; e kua iki au ia Davida, ei runga ïa i toku nei au tangata ia Iseraela.

7 Ko roto ra i te ngakau o toku metua ra o Davida te manako, e akatu i tetai are no te ingoa o te Atua o Iseraela no Iehova.

8 Kua tuatua mairā Iehova ki toku metua kia Davida, No te mea, ko roto i toou ngakau e akatu i tetai are no toku nei ingoa, kua tika taau no te mea ko roto ïa i toou ngakau.

9 Auraka ra koe e akatu i taua are nei; na to tamaiti ra, taau e anau ra, nana e akatu i te are no toku nei ingoa.

10 Kua tupu io nei ia Iehova te tuatua tana i karanga ra; kua tupu io nei oki au ei tupau i toku metua ia Davida, e te noo nei au ki runga i te terono o Iseraela, ta Iehova i tuatua maira, e kua akatu io nei au i te are no te ingoa o te Atua o Iseraela no Iehova.

11 E kua tuku au i te aruna ki roto, tei reira nga papa koreromotu a Iehova ra, tana i papau ki te tamariki a Iseraela ra.

12 Te tu ua ra aia ki mua i te atarau a Iehova, ki mua i te aroaro o te uipaanga katoa o Iseraela ra, e te oora tika atura i ona rima:

13 I anga ana oki a Solomona i tetai paata veo, e rima kubiti i te tiroa, e rima kubiti oki i te tipoto, e toru kubiti i te teitei, e kua vaooia i rotopu i te paepae ra; kua tu iora aia ki runga i te reira, e kua tuku iora i tona turi ki raro ki mua i te uipaanga katoa o Iseraela ra, e te oora atura aia i ona rima ki runga i te rangi.

14 E kua karanga atura, E te Atua o Iseraela, e Iehova e, kare atu e Atua e aite kia koe i te rangi, e i te enua nei; tei akono i te koreromotu, e te aroa, ki to au tavini, ko tei aere i mua ia koe ma to ratou ngakau katoa:

15 Ko tei akono tikaia e koe taau i tuatua mai ki to tavini ki toku metua kia Davida: na toou vaa i tuatua i tei akatupuia e to rima mei tei teianei rā.

16 E tenana, e te Atua o Iseraela, e Iehova, e akono rai koe i tei tuatuaia e koe ki to tavini ki toku metua kia Davida, ka na ko ei ra e, Kare koe e ngere i te tangata kia noo ki mua i toku aroaro ki runga i te terono o Iseraela; kia akono mairai to au tamariki i to ratou aerenga, e kia tau to ratou aere ki taku ture, mei ia koe katoa i aere na mua iaku ra.

17 E teianei, e te Atua o Israela, e Iehova, kia tupu tiaki taau tuatua i tuatuaia e koe ki to tavini kia Davida.

18 Ka noo tika mairai ainei te Atua ki o te tangata nei ki runga i te enua? i na, te rangi nei, e te rangi o te au rangi ra, kare rai koe e o: ka tangaʼi oki i teianei are i akatuia e au nei!

19 E akono maira koe i te pure a to tavini nei, e tana e pati nei, e taku Atua, e Iehova, e akarongo mairai koe i te kapiki, e te pure, ta to tavini e pure ki mua ia koe:

20 Kia puera mai o mata i te po e te ao ki teianei are, ki te ngai taau i tuatua ra e vaioia e koe to ingoa i reira; ka akarongo mai ei koe i te pure e pureia e to tavini ki teianei ngai.

21 E akarongo mairai koe i te pure a to tavini, e ta to au tangata ta Iseraela, kia pure tika mai ratou ki teianei ngai; e akarongo mai koe i reira i toou ra nooanga i te rangi ra, e kia rongo koe ra, e akakore mai i ta ratou ara.

22 Kia ara tetai tangata i tona tangata tupu, e akataputouia atura aia, e kua taputou iora i ko nei, ki mua i to atarau i roto i teianei are:

23 E akarongo mai koe i runga i te rangi ra i reira, ka tuku mai ei i te tuatua-tau ki to au tavini nei, i te tutaki anga mai i tei ara ra, e te uri anga mai i taua ara ki runga i tona uaorai mimiti; e te akatika anga mai i tei tika ra, i te tuku anga mai i tei tau ki te tuatua-tika nana ra.

24 Kia eke to au tangata ko Israela ki mua i te enemi, no te mea kua ara ratou ia koe; e kia anga maira e kia aaki i to ingoa, e kua pure ratou e kua pati i to ratou anoano ki mua i to aroaro i teianei are:

25 E akarongo mai koe i runga i te rangi ra i reira, e akakore mai i te ara a to au tangata ia Iseraela, e akaoki mai ia ratou ki te enua taau i oronga mai no ratou e to ratou ra ai metua.

26 Kia momaniia te rangi ra, e kare e ua, no te mea kua ara ratou ia koe; kia pure tika maira ratou ki ko nei ki teianei ngai, e kia aaki i to ingoa ra, e kia akaruke ratou i ta ratou ara, kua oti ratou i te tairoia e koe ra:

27 E akarongo mai koe i runga i te rangi ra i reira, e akakore mai i te ara a to au tavini, e a to au tangata ia Iseraela; e akakite mai koe kia ratou i te ara meitaki kia aere ratou ra; ka oronga mai ei i te ua ki runga i to enua nei, i tei orongaia mai e koe ki to au tangata nei ei tuanga.

28 Kia rokoia te enua nei e te onge, e te maki-mate, te veravera, e te pueka, te tāpaki, e te anue; e kua akapiniia ratou e to ratou au enemi i te au oire i to ratou enua; kia rokoia e tera mate, e tera maki;

29 Ko te au pure katoa e te au patianga e patiia e te au tangata katoa, e to au tangata katoa e Iseraela nei, i te tangata katoa i kite i tona uaorai mate, e tona uaorai kino, e kua oora tika mai i ona puke rima ki teianei are:

30 Ei reira koe e akarongo mai ei i runga i te rangi i te ngai taau e noo ra, ka akakore ei i te ara, e akaaiteite mai koe i te tutaki ki te tangata katoa kia tau ki tona au aerenga, ko koe oki te kite i tona ngakau; ko koe anake rai oki te kite i te ngakau o te au tamariki a te tangata nei:

31 Kia mataku oki ratou ia koe, e kia aere na to au arataa, i te au rā katoa i to ratou ora anga ki runga i te enua taau i oronga mai ki to matou nei ai metua ra.

32 I te tangata ke ra, kare to Iseraela i toou nei au tangata, no to ingoa maata ra i tae mai ei mei te enua mamao mai, e no to rima marōrō, e to rima i akatikaia ra; kia aere mai ratou, e kia pure tika mai ki teianei are:

33 E akarongo mai koe i reira i runga i te rangi i te ngai taau e noo ra, ka akatika mai ei i ta taua tangata ke ra i kapiki ia koe ra; kia kite to te ao katoa nei i toou ingoa, e kia mataku ia koe, mei toou katoa ra iti-tangata mei ia Iseraela nei; kia kite oki ratou i teianei are i akatuia e au nei, e kua tapaia i te ingoa noou ra.

34 Kia aere toou iti-tangata e tamaki i to ratou au enemi, na te arataa taau e tono ia ratou, kia pure maira ratou kia koe ki teianei oire i ikiia e koe ra, e teianei are i akatuia e au no toou ra ingoa:

35 E akarongo mai koe i reira i runga i te rangi ra i ta ratou pure, e ta ratou i pati ra, e tupae mai koe ia ratou.

36 Kia ara ratou ia koe, (kare atu oki e tangata e kore ei te ara,) e kua riri iora koe ia ratou, e kua tuku atu koe ia ratou ki te enemi, e kua apai tuikaaia atu ratou e ratou ki te enua mamao, e kare ra, te enua vaitata;

37 Kia akamaraara to ratou ngakau i te enua i apai tuikaaiaʼi ratou ra, e kua ariu mai, e kua pure mai ia koe i taua enua i tuikaaʼi ratou ra, kia tuatua mai e, Kua ara matou, kua tatipake matou, kua rave matou i te kino;

38 E kia anga maira ratou kia koe ma to ratou ngakau katoa ra, e ma to ratou vaerua katoa, i taua enua i tuikaaʼi ratou ra, e kua apai tuikaaia e ratou i reira, e kua pure tika mai ki to ratou nei enua, i orongaia mai e koe no to ratou ai metua ra, e te oire i ikiia e koe ra, e te are i akatuia e au no toou ra ingoa:

39 E akarongo mai koe i reira, i runga i te rangi, i te ngai taau e noo ra, i ta ratou pure e ta ratou i pati ra, e tupae mai koe ia ratou, ka akakore ei koe i te ara a to au tangata i ara ai ia koe ra.

40 E teianei, e taku Atua, teia taku tuatua kia koe, e akapuera mai koe i o mata, e akarongo mai oki o taringa i te pure i pureia i teianei ngai:

41 E teiane, ka tu mai, e te Atua, e Iehova, ei toou akaangaroianga tikai, ko koe e te aruna o to maroiroi: kia akakakauia te kau taunga naau, e te Atua, e Iehova, ki te ora, e kia rekareka toou aronga tapu ra i te meitaki.

42 E te Atua, e Iehova e, auraka kia akaanga keia te mata o tei akamainuia e koe ra: e akamaara i te aroa i to tavini ia Davida.