1 Ioane

3 KA akara na i te tu o to te Metua aroa ia tatou nei, ko tatou i tapaia mai e e tamariki na te Atua: i kore ei to teianei ao i kite ia tatou, no te mea kare katoa i kite iaia.

2 E aku au akaperepere e, e tamariki tatou na te Atua i teianei, kare ra i kitea to tatou tu a muri atu: kua kite ra tatou e kia mama mai aia ra, e riro tatou mei iaia katoa te tu; e kite oki tatou iaia i tona tu tikai.

3 E te tangata ravarai tei roto iaia taua manakonako nei, te akatapu ra aia iaia uaorai, mei iaia katoa e tapu ra.

4 Ko tei rave i te ara ra, kua akaapa ïa i te ture: ko te ara ïa.

5 E kua kite oki kotou e, i akakiteia mai aia ei akakore i ta tatou ara; e kare rava oki e ara o roto iaia.

6 Ko tei piri atu iaia ra, kare ïa i rave i te ara; ko tei rave i te ara, kare ïa i akara iaia, kare oki i kite iaia.

7 E aku au tamariki e, auraka rava e vavare i te tangata: ko tei rave i te tuatua-tika ra, e tangata tuatua-tika ïa, mei te Mesia tangata tuatua-tika ra.

8 Ko tei rave i te ara ra, no te diabolo ïa; i rave ana te diabolo i te ara mei muatangana mairai. No reira i akakiteia mai ei te Tamaiti a te Atua ra, kia akakore aia i te angaanga a te diabolo ra.

9 Ko ta te Atua i anau ra, kare ïa e rave i te ara; te vai ra oki tana ua i roto iaia: e kare e tika iaia kia rave i te ara, no te mea kua akaanauia mai aia e te Atua.

10 Ko te mea teia e kiteaʼi te tamariki a te Atua, e te tamariki a te diabolo; ko tei kore e rave i te tuatua-tika ra, kare ïa i to te Atua, kare katoa tei kore e aroa i tona taeake.

11 Teia oki te tuatua ta kotou i akarongo mei muatangana mai, kia aroa tatou ia tatou uaorai.

12 Auraka mei ia Kaina, no taua vaerua kino ra aia, e tamate rava atura i tona teina. E eaa aia i ta atu ei iaia? No te mea e tuatua kikino tana uaorai, e e tuatua-tika ta tona teina.

13 Auraka kotou e va ua, e aku au taeake, kia riri mai to teianei ao ia kotou.

14 Kua kite tatou e mei te mate mai tatou, e tei te ora mai nei, no te mea te aroa nei tatou i te au taeake. Ko tei kore e aroa i tona taeake, te vai ra ïa i roto i te mate.

15 Ko tei makitakita i tona taeake, e ta tangata ïa: kua kite oki kotou e, kare o te ta tangata ra e ora mutu kore e vai i roto iaia.

16 Ko te mea teia i kite ei tatou i te aroa, ko te Mesia i oronga i tona uaorai ora no tatou: e kia oronga katoa tatou i to tatou ora no te au taeake e tikaʼi.

17 Te tangata ra tei iaia te apinga o teianei ao, e kite atura aia i tona taeake i te ngere anga, e karapii atura tona ngakau iaia, teiea te anoano i te Atua i te noo anga i roto iaia?

18 E aku au tamariki ra, auraka to tatou i te aroa vaa ua, e te aroa arero; ei aroa rave ra, ei mea mou.

19 Ko te mea teia e kite ei tatou e, no te tuatua-mou tatou, e e kore ei to tatou ngakau e mataku i mua iaia.

20 Kia akaapa mai oki to tatou ngakau ia tatou, e maata te Atua i to tatou ngakau, e kua kite aia i te au mea katoa nei.

21 E aku au akaperepere e, kia kore to tatou ngakau e akaapa ia tatou, kare o tatou e taitaiaanga i reira i te Atua ra.

22 E ta tatou e pati atu iaia ra, e rauka ïa ia tatou, no te mea te akono nei tatou i tana au akauenga, e te rave nei i te au mea e marekaʼi aia ra.

23 Teia oki tana akauenga, kia akarongo tatou i te ingoa o tana Tamaiti o Iesu Mesia, e e aroa tatou ia tatou uaorai, mei tana oki i akaue maira.

24 Te akono ra i tana ra au akauenga, te noo ra ïa aia i roto iaia, e te noo maira aia i roto i taua tangata ra: teia te mea i kite ei tatou e te noo maira aia i roto ia tatou nei, ko te Vaerua tana i oronga mai kia tatou nei.