Angaanga

10 E TEI Kaisarea tetai tangata ko Korenelio te ingoa, e rangatira anere no te pupu vaeau e tuatuaia ra e, no Itale,

2 E tangata akono i te Atua, e mataku oki aia i te Atua, e tona katoa ngutuare, e e oronga oki i te apinga e manganui no te tangata, e kare oki i tukumoe i te pure i te Atua.

3 E kite pu atura aia i tetai angela a te Atua i te orama, i te aere anga mai kiaia, i te ao, i te ora iva ra, e te tuatua anga mai kiaia e, E Korenelio e.

4 Kua akara matariki atura aia kiaia, mataku rava akera aia, e kua na ko akera, E te Atu, eaa teia? Kua tuatua maira aia kiaia, No taau pure, e toou oronga anga apinga, kua tae rava ki runga ki mua i te aroaro o te Atua ra, ei akamaara anga ia koe.

5 E teianei, e tono koe i te tangata ki Iopa e tiki ia Simona, ko te tuatuaia e ko Petero ra:

6 E noo aia ki o Simona rapakau kiri ra, tei taatai tona are: nana e akakite mai kia koe i taau akono anga.

7 E riro atura te angela i tuatua mai kia Korenelio ra, kua kapiki atura aia i e toko rua puke tavini nona uaorai; e tetai vaeau akono i te Atua no te aronga e noo i tona pae;

8 E ope akera taua au tuatua ra i te akakiteia atu e ia kia ratou ra, kua tono atura ia ratou ki Iopa.

9 E popongi akera, te aere ua ra ratou i to ratou tere, e vaitata atura ratou ki taua oire ra, aere aturā Petero ki rungao i te are e pure, tei te ono paa o te ora:

10 Pongi rava iora aia, e kaki atura i te manga e kai; te rave ra oki to ratou i te kai, tareuia iora aia;

11 E kite atura aia i te rangi i te vetea angaia, e tetai āriki mei te kakau pu ra i te topa anga mai, i itikiia nga kautuai e a katoa i te tuku angaia mai ki raro i te one;

12 E te au mea katoa taki a vaevae o te enua nei, e te au mea taae, e te au mea totoro aere, e te manu oki o te reva ra, i roto.

13 E kua tae maira oki tetai reo kiaia, Ka tu, e Petero; ka ta, ka kai.

14 Kua karanga aturā Petero, Auraka rava ïa, e te Atu; kare rai oki au i kai ana i te kai noa, e te mea viivii, e teia noaʼi.

15 Kua oki maira taua reo ra, ko te rua ïa, Ko ta te Atua i tamā ra, auraka koe e tuatua e, e mea noa ïa.

16 E toru akera akapera anga mai: rave akaouia atura taua āriki ra ki runga i te rangi.

17 E te eumiumi ua rā Petero ki roto iaia uaorai i te akatau anga i taua mea i kitea e ia ra, i na, i ui ana te au tangata i tonokia atu e Korenelio ra i te are o Simona, tu anake atura oki ki te ngutupa,

18 Kua karanga atura, e ui atura, E noo ainei a Simona i ko nei, ko te tuatuaia e ko Petero.

19 E te maara ua rā Petero i taua orama ra, kua tuatua maira te Vaerua kiaia, I na, te uiia maira koe e toko toru puke tangata:

20 E teianei, ka tu koe, e aere ki raro, ka aere katoa atu ei, auraka rava e ekoko: naku oki ratou i tono mai.

21 Kua eke mairā Petero ki raro ki nga tangata i tonokia atu kiaia e Korenelio ra; kua tuatua maira, I na, ko au ta kotou i kimi nei: eaa to kotou tere i aere mai ei i ko nei?

22 Kua karanga atura ratou, Ko Korenelio, e rangatira anere ra, e tangata tuatua-tika e te mataku oki i te Atua, e rongo meitaki oki tona i te ngati Iuda katoa ra; i akoia mai aia e tetai angela tapu e tiki mai ia koe, e aere ki tona ngutuare, kia kite aia i taau na tuatua.

23 Kua akatomo maira aia ia ratou ki roto, akaangai atura. E popongi akera, aere aturā Petero e ratou katoa, e tokotai puke taeake i Iopa i te aru katoa anga atu.

24 E ao akera oki, tae atura ratou ki Kaisarea. Te tapapa mairā Korenelio ia ratou, kua oti oki i te akaputuputuia mai tona kopu-tangata e te au oa tikai nona ra.

25 E tei te tomo anga atu a Petero ki roto, kua aravei mairā Korenelio iaia, akatopa iora ki raro i tona pae vaevae, akamori maira iaia.

26 Kua akatu aturā Petero iaia, na ko atura, Ka tu; e tangata katoa oki au nei.

27 Kua karangaranga iora raua, e aere atura ki roto, rokoia atura, kua putuputu te tangata e manganui.

28 Kua karanga atura aia kia ratou, Kua kite oki kotou e, kare e tau i te tangata ngati Iuda kia kapiti atu, e kare oki e tomo i te are o te tangata o te enua ke ra; kua akakite maira te Atua kiaku e, auraka au e tuatua i te tangata e, e mea noa e te viivii oki.

29 I aere mai ei au i te tiki angaia akenei, kare au i toekutu: e teianei, e ui atu au, No te aa i tiki ake ei kotou iaku nei?

30 Kua tuatua mairā Korenelio, Ka po a akenei, te akakore ra au i te kai e tae akera ki teianei ora; e i te iva o te ora i pure ei au i roto i toku are; e i na, kua tu ua maira tetai tangata i mua iaku ma te kakau kakā,

31 E kua na ko maira, E Korenelio e, kua akarongoia taau pure, e kua manakoia taau oronga anga apinga aroa i mua i te aroaro o te Atua ra;

32 E teianei, ka unga koe i te tangata ki Iopa, e tiki atu ia Simona kia aere mai i ku nei, ko te tuatuaia e ko Petero; e noo aia i taatai, i te are o Simona rapakau kiri: e kia tae mai aia, nana ïa e tuatua mai kia koe.

33 I reira rai toku tono anga atu i te karere kia koe; e meitaki rava atura ko koe i aere mai nei. E teianei, teia anake matou tei mua i te aroaro o te Atua, kia kite matou i te au tuatua katoa ta te Atua i poroaki io kia koe ra.

34 Kua karanga atura e vaa o Petero, Kua kite mou atura au e, kare te Atua e akono i te tu o te tangata:

35 Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.

36 Kua kite oki kotou i te tuatua tana i akau ki te tamariki na Iseraela ra, i te tuatua aere anga i te au ia Iesu Mesia: (koia te Atu o te au mea katoa ra:)

37 Ko te tuatua i tuatuaia na Galilea maira e pini rava ake Iudea katoa ra, i muri ake i te bapetizoanga i tuatua aereia e Ioane ra;

38 Ia Iesu no Nazareta, ko tei akatainuia mai e te Atua ki te Vaerua Tapu e te mana ra: ko tei takinga-meitaki aere ra, e te akaora anga i te aronga ravarai i teiaa i te rave kino a te diabolo; tei iaia oki te Atua.

39 Ko matou nei oki te kite i te peu tini tana i rave i Ierusalema ra, e te enua katoa oki o te ngati Iuda ra: na ratou oki aia i ta, i te akauta anga ki runga i te rakau:

40 Koia oki ta te Atua i akatu ki runga i te po toru ra, e kua akakite iaia ki te ngai atea ra;

41 Auraka ra te tangata tini ravarai, kare te aronga ra i akonoia e te Atua i kite ra, koia oki matou nei, ko tei kai katoa i te manga e kua inu ma ia katoa i muri ake i tona tu anga mai mei te mate maira.

42 E kua ikuiku maira aia ia matou e tuatua aere matou ki te tangata, e akakite ua atu oki e, koia tei akonoia e te Atua ei Akava i tei ora e i tei mate ra oki.

43 Koia oki ta te au peroveta katoa i akakite maira e, ko te akarongo iaia ra e akakoreia ta ratou ara i tona ingoa.

44 E te karanga aturā Petero i taua au tuatua nei, kua topa maira te Vaerua Tapu ki rungao i taua aronga katoa i akarongo mai i taua tuatua ra.

45 E te aronga katoa o te peritome i akarongo ra, ko tei aere katoa mai ratou ko Petero ra, va atura ratou, i te mea i riringiia mai te meitaki ra, te Vaerua Tapu, ki runga katoa i te etene ra.

46 I akarongo atura oki ratou ia ratou i te tuatua anga i te tuatua ke, e te akameitaki anga i te Atua.

47 Kua tuatua iorā Petero, E tika aina i te tangata kia akakore i te vai kia kore e bapetizoia teianei aronga, ko tei rauka oki ia ratou te Vaerua Tapu mei ia tatou katoa nei?

48 Kua akaue atura aia ia ratou, e bapetizo ma te ingoa o te Atu ra. Kua tāpu maira ratou iaia, kia noo aia ki o ratou ra i etai puke rā.