Mataio

22 TAMOU aturā Iesu i te tuatua anga i te parabole kia ratou, na ko atura,

2 E tau te basileia o te ao i tetai ariki, tei akatupu i te oroa akaipoipoanga i tana tamaiti,

3 E akaunga atura i tona au tavini, e tiki i te aronga i karangaia ra, e aere mai ki te oroa: e kare ratou i keu mai.

4 Kua akaunga akaou atu rai aia i tetai aronga tavini ke, na ko atura, E karanga atu ki te aronga i karangaia ra, I na, taku nei kaingakai kua vave, e taku puakatoro, e taku aronga puaka angai, kua koia, kua vave roa: ka aere mai ki te oroa akaipoipoanga.

5 Kare ra ratou i akono mai, aere ke atura i to ratou aerenga, tetai ki tona kainga, tetai ki tona oko anga:

6 Opu maira tetai papaki i taua aronga tavini ra, kua takinga-kino maira, e kua tamate rava atura.

7 Kia kite ra taua ariki ra, riri rava akera; tono atura i te au nuku toa nona, e ta takiri rava atura i taua aronga ta tangata ra, e taʼu atura i to ratou oire ki te ai.

8 Kua karanga atura aia ki te au tavini nona ra, Kua vave rava te oroa akaipoipoanga nei, kare ra e tau te aronga i karangaia ra.

9 E teianei, ka aere kotou ki te au ara metua, e te aronga katoa i kitea ia kotou, e karanga atu, e aere mai ki te oroa akaipoipoanga.

10 Aere atura taua au tavini ra ki te au ara metua ra, e kua ope katoa maira tei kitea e ratou, te kino e te meitaki: ki akera taua oroa akaipoipoanga ra i te manuiri.

11 E kia aere maira taua ariki ra ki roto, kia akara i te manuiri, kite iora aia i tetai tangata kare ona kakau akaipoipoanga:

12 Kua karanga atura aia kiaia, E tama, eaa koe i tae mai ei i ko nei, e kare e kakau akaipoipoanga?

13 Kua muteki atura aia. Kua karanga atura taua ariki ra ki te au tavini, Ka ri iaia te rima e te vaevae, ka rave ke atu iaia, opara atu ei ki vao i te poiri: tei reira te aue e te pakati anga nio.

14 Toko rai oki tei karangaia, e iti ra tei ikiia.

15 Aere atura te au Pharisea, kimi iora i te tuatua, kia taii ratou iaia i tana tuatua.

16 Kua tono atura ratou i ta ratou aronga pipi iaia ra, e te au Herodiani, tei karanga atu e, E te Orometua kua kite matou, e tuatua-tika taau, e te apii nei koe i te tuatua na te Atua ma te tuatua-mou; kare koe i mataku i te tangata, e kare koe i akono i to te tangata nei tu.

17 E teianei, Ka akakite mai koe kia matou i toou manako: E tika aina i te ture kia apai matou i te apinga uipa na Kaisara, e auraka aina?

18 Te kite mairā Iesu i ta ratou pikikaa, e kua na ko maira, Eaa kotou e timata mai ei iaku, e te aronga pikikaa e?

19 Ka akakite mai na i tetai moni taūnga. Kua akakite maira ratou i tetai denari.

20 Kua ui atura aia kia ratou, Noai te tu i rungao e te tuatua?

21 Kua tuatua maira ratou, No Kaisara. Kua na ko atura aia kia ratou, E apai mari i ta Kaisara kia Kaisara; e ta te Atua ra, e apai ïa ki te Atua.

22 E kite akera ratou i te reira, va ua atura, akaruke iora iaia, aere atura.

23 E e aronga Sadukea tei aere mai kiaia i taua rā ra, ko tei tuatua e, kare e tuakaouanga, kua ui maira kiaia,

24 Na ko maira, E te Orometua e, i tuatua mai a Mose, “Kia mate tetai tangata kare e tamariki, e akaipoipo te teina i tana vaine, e akaanau tama ei tamariki na te tuakana.”

25 Toko itu puke tamaroa i o matou nei i te kopu-tangata okotai; akaipoipo iora te tama mua i te vaine, e mate atura, kare e tamariki, vaio iora tana vaine na te teina:

26 Koia katoa, te toko rua, pera katoa oki te toko toru, e tae ua atura ki te toko itu.

27 E i te openga iora, mate katoa atura te vaine.

28 E teianei, kia tae ki te tuakaouanga ra, e riro aia ei vaine naai i taua toko itu ra? kua akaipoipo oki ratou ravarai iaia.

29 Kua karanga aturā Iesu kia ratou, na ko atura, Te tarevake nei kotou i te kite kore i te tuatua i tataia ra, e te mana o te Atua.

30 I te tuakaouanga oki, kare ratou e akaipoipo, kare oki e oronga kia akaipoipoia, e tau ratou i te au angela o te Atua i te ao ra.

31 I te tuatua ra i te tuakaouanga o tei mate ra, kare kotou i tatau i ta te Atua i tuatua mai kia kotou ra, ka na ko mai ei ra e,

32 “Ko au te Atua no Aberahama, e te Atua no Isaaka, e te Atua no Iakoba?” Kare oki te Atua i te Atua no tei mate, no tei ora ra.

33 E kite akera taua aronga maata ra i te reira, va ua iora ratou i tana tuatua.

34 E kite akera te au Pharisea e, kua muteki atura te au Sadukea iaia, kua akaputuputu maira ratou.

35 Kua ui maira tetai apii ture no ratou iaia, na ko maira, i te timata anga mai iaia,

36 E te Orometua, ko teea te akauenga i maata o te ture?

37 Kua karanga aturā Iesu, “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.”

38 Ko te akauenga mua teia e tei maata.

39 E mei te reira katoa ra te rua, “E aroa atu koe i toou tangata tupu mei te aroa ia koe uaorai.”

40 Te ture katoa e te au peroveta ra, tei teianei puke ture e rua nei.

41 Koi putuputu ua maira te au Pharisea, kua ui aturā Iesu ia ratou,

42 Na ko atura, Eaa to kotou manako i te Mesia ra? e tamaiti aia naai? Kua na ko maira ratou, Na Davida.

43 Kua karanga atura aia kia ratou, Eaa oki a Davida, ko tei tuatua ma te Vaerua i tuatuaʼi kiaia e, e Atu, ka na ko ei ra e,

44 “Kua tuatuā Iehova ki taku Atu, Ka noo koe ki taku rima katau nei, e kia akariro au i to au enemi ei pange vaevae noou?”

45 E teianei, te tuatua rā Davida kiaia e, e Atu, eaa iora oki aia i riro ei ei tamaiti nana?

46 Kare atura i tika i tetai kia tuatua mai kiaia i te reira, kare atura tetai i ui mai kiaia, mei te reira rā mairai, i te mataku.