Luka

10 E MURI akera, kua akataka atu rai te Atu i e itu ngauru, tataki toko rua atura i te tono anga ia ratou na mua iaia i te au oire, e te au ngai ravarai tana i akakoro e, e aere katoa aia ki reira.

2 Kua karanga atura aia kia ratou, Te maata ua nei te mou, te iti nei ra te aronga e kokoti: e teianei, e pure kotou i te Atu o te mou, kia unga mai aia i tetai aronga ei rave i taua mou nana ra.

3 E aere kotou; i na, te tono atu nei au ia kotou mei te punua mamoe i rotopu i te au luko ra.

4 Auraka ei āriki moni e taoiia, auraka ei pute, auraka ei tamaka: auraka e aroa ua atu i te tangata i te arataa ra.

5 E te are ta kotou e tomo ra, e akamata na i te karanga atu, Ei au to teianei ngutuare.

6 E tei reira te tamaiti no te au, e vai rai ta kotou au ra i rungao iaia: kare ra, ka oki akaou mai ïa ki rungao ia kotou.

7 E i taua are rai noo ei, e kai ua rai i te kai, e inu ua rai oki, i ta ratou e oronga mai: e tau oki te rave angaanga i tana tutaki. Auraka e aere ki tera are, ki tera are.

8 E te oire ta kotou e tomo ra, e oo mai ratou ia kotou, ka kai kotou i te kai e tukuia mai i mua i to kotou aroaro.

9 E akaora oki i to reira maki, e karanga atu kia ratou, Kua vaitata mai nei te basileia o te Atua kia kotou na.

10 E te oire ta kotou e tomo ra, e kare ratou e oo mai ia kotou, e aere atu kotou ki vao ki to reira au arataa, e karanga atu ei,

11 Te one o to kotou oire i piri mai kia matou, e orei atu nei matou, ei akakite anga atu kia kotou: te vaitata mai nei ra te basileia o te Atua kia kotou, kia kite oki kotou.

12 Te karanga atura au kia kotou, Kia tae ki taua rā ra, e ngari ake to Sodoma e to Gomora, i te reira oire.

13 Aue koe, e Korazina e! aue koe, e Betesaida e! naringa oki te au akairo i raveia i roto ia korua, i raveia i Turia e Sidona, kua tataraara takere ratou, kua noo i te reu ai ma te kakau paoa.

14 Kareka ko kotou nei, kia tae ki te rā akava anga ra, e ngari ake to Turia e to Sidona.

15 E ko koe na oki, e Kaperenauma, i akateiteiia ki te rangi na, ka oparaia koe ki raro rava i te po.

16 Ko tei akarongo mai ia kotou na, kua akarongo mai ïa iaku; e ko tei akavaavaa mai ia kotou na, kua akavaavaa mai ïa iaku; e ko tei akavaavaa mai iaku ra, kua akavaavaa ïa iaia i tei tono mai iaku nei.

17 Kua oki akaou maira te itu ngauru ra ma te rekareka, kua na ko maira, E te Atu, kua vi katoa te au demoni ia matou i to ingoa na.

18 Kua karanga atura aia kia ratou, Kua kite au ia Satani i te topa anga, mei te uira no runga i te rangi ra.

19 I na, e akamana atu au ia kotou kia takatakai ua atu ki runga i te ovi e te sekopio, e te mana katoa o te enemi; e kare rava e mea e mate ei kotou.

20 Auraka ra kotou e rekareka i te mea i vi te au vaerua kino ia kotou: e rekareka ra i to kotou ingoa i tataia ki runga i te ao ra.

21 Rekareka atura: to Iesu vaerua i taua ora ra, kua karanga atura, E akameitaki au ia koe, e taku Metua, te Atu no te rangi e te enua, i te mea ko koe i uuna ke atu i teianei au mea i te aronga pakari e te kite, e kua akakite mai ki te tamariki nei. Koia ïa, e taku Metua, e mea tika ïa ia koe.

22 Kua ope rava te au mea katoa i te tukuia mai e taku Metua, tei iaku: kare rava tetai i kite i te Tamaiti, mari ra ko te Metua; e kare tetai i kite i te Metua, mari ra ko te Tamaiti, e te tangata ta te Tamaiti e inangaro i te akakite atu.

23 Kua ariu atura aia ki tana au pipi, kua tuatua ia ratou tikai, E ao to te mata i akara i te au mea ta kotou e akara nei:

24 E akakite atu au kia kotou, e manganui te au peroveta, e te ui ariki, i anoano i te akara i te au mea ta kotou e akara nei, e kare akenei ratou i akara; e i te akarongo i te au tuatua ta kotou e akarongo nei, e kare akenei ratou i akarongo.

25 E i na, kua tu akera tetai apii ture ki runga, kua timata maira iaia, na ko maira, E te Orometua, akapeea au nei e raukaʼi iaku te ora mutu kore?

26 Kua karanga atura aia kiaia, Eaa tei tataia ki roto i te ture ra? te peea ra koe i te tatau anga?

27 Kua tuatua maira aia, na ko maira, “E inangaro atu koe i to Atua ia Iehova ma to ngakau katoa, e ma to vaerua katoa, e ma to ririnui katoa, e ma to manako katoa;” “e e aroa atu i to tangata tupu mei te aroa ia koe uaorai.”

28 Kua karanga atura aia kiaia, E tika taau i tuatua mai nei: ka ora koe kia pera.

29 Kareka aia no te inangaro i te akatika iaia uaorai, kua tuatua maira aia kia Iesu, Koai oki toku tangata tupu?

30 Kua karanga aturā Iesu, na ko atura, Kua aere atura tetai tangata no Ierusalema ki Ieriko, rokoia iora aia e te anana keia; i aunaia e ratou tona kakau, e kua paruparu oki aia, aere atura ratou akaruke iora iaia, kua vaitata i te mate.

31 Kua aere ua maira tetai taunga na taua ara ra; e kia akara atura iaia, tapae atura aia, na tetai pae ara atura i te aere.

32 E tetai ngati Levi oki i na vaitata maira i taua ngai ra, kua aere mai ïa kua akara, anga ke atura na tetai pae ara.

33 Tetai tangata Samaria ra, te aere ua ra i tona aerenga, e tae atura ki taua ngai ra, e kite atura aia iaia, aroa atura;

34 Aere atura kiaia, kua riringi iora i te inu e te wina ki roto i tona au puta ra, vaî atura, e kua akanoo atura iaia ki runga i tana uaorai puaka, arataki atura aia ki te ngai tapae anga, e tiaki marie atura iaia.

35 E popongi akera, kia aere ke aia ra, kua kiriti iora aia i e rua denari no roto i tona pute, e kua o ake ki te tangata are ra, kua karanga atura kiaia, E utuutu koe iaia nei, e kia riro taau moni, naku ïa e tutaki ia koe, kia oki mai au ra.

36 I taua nga tangata toko toru ra, koai te tangata tupu iaia, i toou manako anga, i rokoia e te anana keia ra?

37 Kua tuatua maira aia, Ko tei aroa atu iaia ra. Kua karanga aturā Iesu iaia, Ka aere koe, e akapera katoa.

38 E te aere ua ra ratou i to ratou aerenga, kua tomo atura aia ki roto i tetai vila; kua oo maira tetai vaine iaia ki roto i tona are, ko Mareta te ingoa.

39 E taeake tona ko Maria te ingoa, ko tei noo ïa i te pae vaevae o Iesu, i te akarongo anga i tana tuatua.

40 Ko Mareta ra, kua varenga iora aia i te akono anga i te peu o te manuiri; kua aere maira kiaia ra, kua tuatua maira, E te Atu, kare koe e akono mai, ko au anake teia rave uaʼi, kua akaruke mai nei toku taeake iaku? e karanga atu koe kiaia e rave katoa mai.

41 Kua karanga aturā Iesu kiaia, na ko atura, E Mareta e, e Mareta, kua apiapi koe, e te pekapeka na koe i te au mea katoa e manganui:

42 Okotai rava ra mea e meitaki ei; e kua inangaro oki a Maria nei i taua tuanga meitaki nei, kare rava oki tana e riro ke.