Ruta

3 KUA karanga atura tona metua ongoai ra ko Naomi kiaia, E taku unonga e, kare ainei au e kimi i tetai akaangaroi anga tikai noou, kia meitaki koe ra?

2 E teianei, kare ainei no to tatou nei kopu-tangatā Boaza, nona te au tavini vaine taau i aere ra? I na, ei teianei aiai aia e tamāʼi i te kerite i te ngai pāpā sitona ra.

3 E paî koe ki te vai, e pani koe ki te manongi, ka kakau ei ki to kakau na, e e aere oki koe ki raro i te ngai pāpā sitona ra: auraka koe kia kitea mai e taua tangata ra, kia akaoti ra aia i tana kai anga e tana inu manga. 4 E kia moe aia ki raro ra, e akara tikai koe i taua ngai tana e moe ra, ka aere atu koe ki roto, ka eeu ei i te kakau i tona tiroroa anga vaevae, ka moe ei ki raro; e nana e akakite mai kia koe i taau e rave.

5 Kua tuatua maira aia kiaia, Ko nga mea ravarai taau e tuatua mai na, naku ïa e rave.

6 Aere atura aia ki raro ki taua ngai pāpā sitona ra, e kua pera oki aia i te au mea katoa ta tona metua ongoai i tuatua mai kiaia ra.

7 E kia kaikai a Boaza, e kia inu oki, e rekareka akera tona ngakau, aere atura aia e moe atura ki raro i te openga o tetai utua sitona ra: kua itoro marie atura aia, kua eeu akera i te kakau i tona tiroroa anga vaevae, e kua moe ki raro.

8 E turuaipo akera, kua uri akera aia, e i na, e vaine te moe ua ra i tona tiroroaanga vaevae, tumatetenga akera taua tangata ra.

9 Kua tuatua maira aia, Koai koe? E karanga atura aia, Ko au to tavini vaine ra ko Ruta; ka tapoki mai ana i to tavini vaine nei ki to tapa kakau ra; e tane oki koe naku. 10 Kua tuatua maira aia, Kia ora koe ia Iehova, e taku tamaine: kua maata oki toou takinga-meitaki i te openga nei, i tei muatangana ra, ko koe kare i kimi i te tane tamariki, i te aronga apinga e te aronga apinga kore. 11 E tenana, e taku tamaine, auraka koe e mataku; e rave tikai ïa au i taau e anoano ra: kua kite oki to te oire ravarai noku nei e, e vaine akono meitaki koe.

12 E tuatua-mou rai oki e, e tane au naau; te vai nei ra tetai tane e piri maata tona ia koe i toku. 13 Tiaki ua ana koe i teianei po, e kia popongi ra, kia tika iaia i te rave i ta te tane akonoanga ia koe ra, kua tika ïa, ka rave aia i ta te tane akonoanga: kia kore ra e tika iaia i te rave i ta te tane akonoanga ia koe na, te ora rā Iehova, ko au te rave i ta te tane akonoanga ia koe i reira: ka moe ki raro e kia ao.

14 Kua moe iora aia i tona tiroroa anga vaevae e ao akera: e kua tu akera aia ki runga kare i kitea te mata tangata. Kua tuatua oki aia e, Auraka kia kitea e, e vaine tei aere mai ki te ngai pāpā sitona nei. 15 Kua tuatua maira oki aia, Apai mai ana i tenana kakau i runga ia koe na, ka āriki mai ana. E kia āriki mai oki aia i taua kakau ra, kua aite atura aia i nga aite kerite e ono ra, kua tuku atura ki runga iaia; oki maira aia ki roto i te oire. 16 E tae mairā, Ruta ki te metua ongoai nona ra, kua karanga atura aia. Koai koe, e taku tamaine? E kua akakite maira aia kiaiai te au mea ravarai ta taua tangata ra i mea mai kiaia ra. 17 E kua tuatua maira oki aia, Ko eianei puke aite kerite e ono nei, nana i oronga mai naku; tuatua mai oki aia e, Auraka koe e aere taoonga-rima kore ua atu ki to metua ongoai ra. 18 Kua karanga atura aia, Ka noo ua ana, e taku unonga e, kia kite koe i te openga o taua tuatua nei: kare oki taua tangata ra e noo ua, e kia ope rava taua tuatua nei i te akatupuia e ia i teianei rā.