1 Samuela

17 KUA akaputuputu maira te Philiseti i to ratou au nuku i te tamaki, e uipa maira ratou i Soko i o Iuda ra; e kua patia iora ratou i te puakapa i te va i Soko e Azela, i Ephesa-damima.

2 E kua akaputuputu katoa oki a Saula ma te au tangata o Iseraela, e kua patia iora i te puakapa i vaitata i te o ra ko Ela; e kua akamou iora i te tamaki e tamaki i te Philiseti ra.

3 Te tu maira te Philiseti ki runga i te maunga i tetai pae, e tu atura Iseraela ki runga i te maunga i tetai pae; e tairua tei rotopu ia ratou.

4 Kua aere maira tetai toa no te puakapa o te Philiseti ra, ko Golia te ingoa, no Gata, e ono kubiti e okotai angaonu aia i te roa.

5 E pare veo tei runga i tona mimiti, e kua kakau ki te kakau veo tuakapikapi ra, e te teimaa o taua kakau ra, e rima tausani ïa te sekela veo ra.

6 E te vaî veo ki runga i tona vaevae, e te paruru veo tei rotopu i nga pakuivi nona ra.

7 E tana rakau korare, mei te kautā maata a te raranga kakau ra ïa; e te katai auri o taua korare nana ra, e ono anere sekela te teimaa: e kua na mua tetai tangata iaia i te apai anga i te paruru ra.

8 E kua tu ua maira aia, e kua kapiki maira ki te au nuku o Iseraela, na ko maira kia ratou, Eaa kotou i aere mai ei e akamou i ta kotou tamaki? Kare ainei au i te Philiseti, e e tavini oki kotou no Saula? Kimi io na kotou i tetai tangata no kotou, e aere mai aia ki raro kiaku nei.

9 E kia tika iaia e taua iaku e kia mate au iaia, ei tavini ïa matou no kotou i reira: kia autu ra au, e kia mate aia iaku ra, ei tavini kotou no matou i reira, e e rave i ta matou angaanga.

10 Kua tuatua maira taua Philiseti ra, Kua akavaavaa au i te au nuku o Iseraela i teianei rā; e o mai ana tetai tangata, e taua ana maua.

11 E kite akerā Saula e Iseraela katoa i te tuatua a taua Philiseti ra, kua taitaia iora ratou, kua maata rava te mataku.

12 E tamaiti oki a Davida na taua tangata Epherata i Betelehema-Iuda, ko Iese tona ingoa, toko varu ana tamariki tamaroa: i tuatuaia taua tangata ra i te ruaine I te tuatau ia Saula ra.

13 Aere atura nga tamariki pakari a Iese toko toru e aru atura ia Saula ki te tamaki; e te ingoa o aua nga tamariki tamaroa toko toru nana i aere ki te tamaki ra, te tama mua ko Eliaba ïa, e tei muri ake ko Abinadaba ïa, e te toko toru ra ko Sama ïa.

14 Ko Davida tei muri rava ake; aru atura nga tamariki pakari toko toru ra ia Saula.

15 Oki atura rā Davida ki Betelehema e akaangai i te au mamoe a tona metua, akaruke iora ia Saula.

16 Kua akavaitata maira taua Philiseti ra i te popongi e te aiai i te akakite anga iaia uaorai, e rua takau akera rā.

17 Kua karanga aturā Iese ki tana tamaiti kia Davida, Ka rave ana koe i tetai epha i teianei sitona tunu na to au tuakana, e teia oki au areto okotai ngauru, ka oro ei ki te puakapa ki to au tuakana;

18 E apai katoa oki i teianei aronga u toka okotai ngauru, ki te rangatira o to ratou tausani, ka akaraʼi i to ai tuakana i te meitaki anga, ka rave mai ei i ta ratou e tuku maira.

19 Tera oki a Saula, e ratou, e to Iseraela katoa ra, tei te o ra ko Ela, te tamaki ra ki te Philiseti.

20 Kua tu akerā Davida i te popongi roa, vaoo iora, e aere atura i ta Iese i akaue maira iaia; e tae atura aia ki te kotinga, te aere ra te nuku e tamaki, te maeva ra i te maeva tamaki ra.

21 Kua akanoo oki Iseraela e to Philiseti katoa i te tamaki, tetai nuku e tetai nuku.

22 Vaoo iorā Davida i tana apainga ra, oro atura ki roto i te nuku, e tae atura, aroa atura i tona ai tuakana.

23 Te tuatua ua ra aia kia ratou, e i na, te aere maira taua toa ra, te Philiseti no Gata, ko Golia to ingoa, mei roto mai i te nuku o te Philiseti, kua tuatua maira i taua au tuatua rai: te akarongo atura Davida.

24 Oro anake iora to Iseraela ravarai, i te kite anga i taua tangata ra, kua maata rava akera te mataku.

25 Kua tuatua akera to Iseraela, Te kite ra kotou i teianei tangata i aere mai ki runga nei? i aere mai oki aia e akavaavaa ia Iseraela; e te tangata e mate ei aia nei, e apinga maata tana i te ariki nei, e ka oronga oki aia i tana tamaine nana, e akarangatira ua oki aia i te ngutuare o tona metua i Iseraela nei.

26 Kua karanga aturā Davida ki te au tangata i tu ua i vaitata iora, na ko atura, Akapeeaia te tangata e mate ei iaia teianei Philiseti, kore akera te akakino ia Iseraela nei? koai oki teianei Philiseti peritome koreia ra, i akavaavaa mai ei aia i te au nuku a te Atua ora nei?

27 Kua tuatua iora te tangata kiaia i teianei tuatua, na ko iora, Ka akaperaia te tangata i mate iaia taua tangata nei.

28 Te akarongo maira tona tuakana ko Eliaba iaia i karanga atu ki te au tangata ra; tupu akera te riri o Eliaba ia Davida, e kua tuatua maira aia, Eaa koe i aere mai ei i ko nei? vaoo iora koe i te au mamoe ra kiaai i te medebara? Kua kite au i toou ra nengonengo, e te akono kore o toou ra ngakau; i aere mai oki koe ki raro nei e akara i te tamaki anga.

29 Kua karanga aturā Davida, I akapeea ua ana au? Kare aina e tumu?

30 Kua anga atura aia ki tetai, e kua pera rai aia i te tuatua anga ra: e kua pera katoa mai oki ta te tangata i te tuatua anga mai.

31 E kitea akera taua tuatua i tuatuaia e Davida, kua karanga atura ratou ki mua i te aroaro o Saula: kua tono maira aia i te karere iaia.

32 Kua karanga aturā Davida kia Saula, Auraka rava te ngakau o tetai tangata e taitaia ua atu iaia akera; ka aere to tavini nei e taua ki tera ra Philiseti.

33 Kua tuatua mairā Saula kia Davida, Kare koe e tika kia aere e taua ki tera ra Philiseti; e tangata ou oki koe, kareka aia ra, e toa uritumu ïa mei tona ou anga mairai.

34 Kua karanga aturā Davida kia Saula, I tiaki ana oki to tavini i te mamoe a tona metua, e kua aere maira te liona e te daba, e kua rave i tetai punua mamoe no taua anana ra:

35 Kua aru atura au i te reira e kua ta, e kua rave mai i taua punua mamoe ra no roto i tona vaa: e kia tu aia e rave mai iaku ra, kua opu au i te uru tanga ra, e kua ta, e kua mate rava.

36 Kua mate oki te liona e te daba i to tavini nei; e ka riro katoa taua Philiseti peritome koreia ra mei te reira katoa te tu, koia i akavaavaa mai i te au nuku o te Atua ora nei.

37 E kua karanga atu rai a Davida, Na Iehova, na tei akaora iaku i te vaevae o te liona, e te vaevae o te daba, e akaora iaku i te rima o tera ra Philiseti. Kua tuatua mairā Saula kia Davida, Ka aere, e ei vaitata katoao a Iehova ia koe na.

38 Kua rakei mairā Saula ia Davida ki tona kakau, e kua tuku maira i te pare veo ki runga i tona mimiti: e kua akakakau maira iaia ki te kakau tamaki.

39 E i rungao i taua kakau ra kua tatua mairā Davida i te koke nana ra. Kua timatamatā Davida i te aere, kare akerai i tika: kare oki aia i mātau. Kua karanga aturā Davida kia Saula, Kare teia e tika iaku kia aere; kare oki au i mātau. Kua kopae aturā Davida i te reira.

40 Kua rave iora aia i tana rakau i te rima, e kua rave iora oki aia i nga toka pateka e rima no raro i te kauvai, tuku iora ki roto i tetai āriki a te tiaki mamoe ra i rave katoaia mai e ia; kua akavaitata atura aia ki taua Philiseti ra ma taua pute toka e te maka nana i tona rima.

41 E kua aere maira taua Philiseti ra, e kua akavaitata maira kia Davida; e te tangata i apai i te paruru ra i te na mua anga iaia.

42 E kia akara maira taua Philiseti ra, e kite maira ia Davida, kua akavaavaa maira aia iaia: e tangata ou oki aia, e te mata muramura, e te meitaki.

43 Kua tuatua maira taua Philiseti ra kia Davida, E puakaaoa ainei oki au nei, e aere mai ei koe kiaku nei ma te rakau? E kua tao maira taua Philiseti ra ia Davida i tona au atua ra.

44 E kua tuatua maira oki taua Philiseti ra kia Davida, Ka aere mai ana kiaku nei, e naku e tuku i to kopapa na te au manu o te reva, e na te au puaka o te ngangaere nei.

45 Kua karanga aturā Davida ki taua Philiseti ra, Te aere maira koe kiaku nei ma te koke, e te korare, e te paruru: te aere atu nei ra au kia koe ma te ingoa o Iehova Sabaota ra, te Atua no te au nuku o Iseraela ra, tei akavaavaaia e koe na.

46 Na Iehova koe e tuku mai ki toku rima akonei; e naku koe e ta, e ka tipu keia e au to mimiti na; e tuku oki au i te au kopapa o te nuku Philiseti na te au manu o te reva, e na te au puaka taae o te enua nei, i teianei rā; kia kite te ao katoa nei e, e Atua to Iseraela.

47 E ka kite teianei aronga maata katoa ra e, e tika ia Iehova kia akaora, auraka ua atu ei koke, auraka ei korare: na Iehova oki te tamaki, e nana kotou e tuku mai ki to matou nei rima. 48 E kia tu mai taua Philiseti ra, e kua aere vaitata maira e aravei ia Davida; oro viviki atura oki a Davida ki te nuku e aravei i taua Philiseti ra.

49 Kua tuku iorā Davida i tona rima ki roto i te pute, kua kiriti akera i tetai toka, kua maka atura, pa atura ki runga i te rae o taua Philiseti ra, ngaro atura te toka ki roto i tona rae; topa iora aia i raro tona mata ki te one.

50 Inga iora te Philiseti ia Davida i te maka ma te toka, ta iora i te Philiseti, mate rava akera aia; kare ra e koke i te rima o Davida.

51 Kua oro aturā Davida, kua tu ua atura ki rungao i taua Philiseti ra, e kua rave iora i tana koke, unui akera ki vao i te vaî ra, e kua tamate rava atura iaia ki taua koke ra, e kua tipu iora i tona mimiti. E kia akara mai te Philiseti i taua toa no ratou ra kua mate, ati atura ratou.

52 Kua tu akera to Iseraela e to Iuda, e kua maeva iora, e kua arumaki atura i te Philiseti e tae ua atura ki te o, e te au ngutupa o Ekerona ra. Taūna ua atura taua au Philiseti i taia ra na te arataa e aere tika atu ei ki Saarima, e tae ua atu ki Gata e Ekerona ra.

53 E oki maira te tamariki a Iseraela mei taua arumaki anga i te Philiseti ra, e kua āru iora i to ratou puakapa.

54 E kua rave iorā Davida i te mimiti o taua Philiseti ra, apai atura ki Ierusalema; kua tuku iora te taoonga tamaki nana ki roto i tona puakapa.

55 Kite akerā Saula ia Davida i te aere anga e taua ki taua Philiseti ra, kua ui atura aia ki te rangatira o te nuku ra kia Abenera, E Abenera, e tamaiti naai tera ra tamaiti? Kua tuatua mairā Abenera, Te ora ra koe, e taku ariki, kare au i kite.

56 Kua karanga atura te ariki, E ui aere ana koe, e tamaiti naai taua tamaiti nei.

57 E te oki rā Davida mei te tainga mai i taua Philiseti ra, kua rave aturā Abenera iaia, kua arataki ki mua i te aroaro o Saula, e ma te mimiti katoa o taua Philiseti ra i tona rima.

58 Kua tuatua mairā Saula kiaia, E tera ra tangata ou, e tamaiti koe naai ra? Kua karanga aturā Davida, E tamaiti na to tavini ra na Iese i Betelehema ra.