Exodo

17 KUA aere maira taua uipaanga katoa o te tamariki a Iseraela, mei te medebara maira mei Sini, i to ratou au aerenga, i akaueia mai e Iehova-ra, e kua puakapa i Rephidima; e kare rava o reira e vai na te tangata kia inu.

2 Kua kauvae maira te tangata ia Mose, e kua tuatua maira, O mai te vai na matou kia inu. Kua karanga aturā Mose kia ratou, Eaa kotou i kauvae mai ei iaku? eaa kotou i akakōkō ei ia Iehova?

3 Kua kaki vai ra te tangata i reira; e kua urutoe ratou ia Mose, e kua tuatua maira, Eaa koe i arataki mai ei ia matou mei Aiphiti mai, kia mate matou, e ta matou au tamariki, e ta matou au puaka i te kaki vai?

4 Kua kapiki aturā Mose kia Iehova, na ko atura, Akapeea au i teianei aronga? kare e roa e peî mai ei ratou iaku ki te toka.

5 Kua tuatua maira Iehova kia Mose, E aere koe na mua i taua au tangata nei, ko koe e tetai papaki o te aronga pakari o Iseraela ra, e apai katoa i to rakau taau i ta i te vai ra, i toou rima, ka aere ei:

6 I na, ei reira au ei runga i te mato i Horeba tu atu ei ki mua ia koe na; e naau e ta i taua mato ra, e ka taʼe mai te vai mei roto i reira, ei inumanga na te tangata. E kua pera oki a Mose ki mua i te aroaro o te aronga pakari o Iseraela ra.

7 Tapa iora aia i te ingoa o taua ngai ra, ko Masa, e ko Meriba, no te tauetonoanga a te tamariki a Iseraela, e no te mea kua akakōkō ratou ia Iehova, i te na ko anga e, Tei rotopu ainei a Iehova ia tatou nei, e kare aina?

8 Kua aere maira i reira to Amaleka, e tamaki i to Iseraela i Rephidima.

9 Kua tuatua akerā Mose kia Iosua, Ka iki anga i te tangata, ka aere, e tamaki i to Amaleka: apopo au e tu ei ki runga roa i te tuaivi, ma te rakau a te Atua i toku rima.

10 Kua pera oki a Iosua i ta Mose i tuatua kiaia ra, tamaki atura i to Amaleka; e kua aere aturā Mose, ko Aarona, e ko Hura, ki runga roa i te tuaivi.

11 E kua apai iorā Mose i tona rima ki runga ra, te eke ra to Amaleka: e kua tuku iora aia i tona rima ki raro, te eke ra to Iseraela.

12 E no te mea te teimaa ra te rima o Mose; kua rave iora taua i tetai toka, tuku iora ki raro ake iaia, e kua noo iora aia ki rungao; e kua mou akerā Aarona raua ko Hura i tona rima, okotai i tetai pae, okotai oki i tetai pae; kare akera tona rima i keukeu e topa ua atura te rā.

13 Pou iorā Amaleka e tona au tangata ia Iosua i te mata koke.

14 Kua tuatua mairā Iehova kia Mose, E tata koe i teianei manga tuatua ki roto i tetai buka, ei manakoanga, e tatau atu ki nga taringa o Iosua: E ka akangaro au ia Amaleka kia kore roa aia e manakoia i raro ake i te rangi nei.

15 Kua akatu iorā Mose i tetai atarau, tapa iora i te ingoa, ko IEHOVA NISI.

16 Kua tuatua akera oki aia, No te rima o Amaleka ki runga i te terono o Iehova, ei tamaki ta Iehova ia Amaleka i tera uki i tera uki.