Roma

10 E AKU au taeake e, teia oki te anoano tikai i taku ngakau, e taku nei pure ki te Atua ia Iseraela, kia ora ratou.

2 Ko au te kite ia ratou, e maroiroi to ratou i ta te Atua, kare ra i te maroiroi kite.

3 No to ratou kite kore i te tuatua-tika a te Atua, e kua umuumu oki kia tupu ta ratou uaorai tuatua-tika, kare akenei ratou i kauraro tikai i te tuatua-tika a te Atua ra.

4 Ko te Mesia oki te akaope i te ture ei tuatua-tika na te aronga ravarai e akarongo ra.

5 Kua akakite mai oki a Mose i ta te ture ra tuatua-tika, “Kia akono oki te tangata i te reira ra, ka ora aia i reira.”

6 Kareka ra te tuatua-tika i te akarongo ra, te na ko maira ïa. “Eiaa koe e karanga ki roto i to ngakau e, Naai e kake ki runga i te rangi,” ei arataki mai i te Mesia ki raro nei?

7 “E naai e ruku ki raro i te moana,” ei arataki akaou mai i te Mesia mei roto mai i te mate?

8 E te akapeea maira oki aia? “Tei vaitata roao ra te tuatua ia koe, tei to vaa, e tei to ngakau;” koia oki te tuatua o te akarongo, ta matou e akakite nei e,

9 Kia aaki oki to vaa i te Atu ra ia Iesu, e kia akarongo to ngakau e kua akatu te Atua iaia mei te mate maira, ka ora ïa koe.

10 Ko te ngakau oki to te tangata nei e akarongo, e kia rauka atu te tuatua-tika: ko te vaa oki tei aaki te tuatua e kia rauka atu te ora.

11 Te tuatua maira oki te tuatua i tataia ra e, “Ko tei akarongo iaia ra, kare anake ïa e akama.”

12 Kare rava oki e tu ke te ngati Iuda e te Eleni; e takinga-meitaki maata oki to te Atu o te au mea katoatoa nei, i te tangata ravarai e kapiki atu kiaia ra.

13 “Ko te kapiki i te ingoa o te Atu ra, e ora ïa.”

14 Eaa ua ra te tangata e tikaʼi kia kapiki atu kiaia i tei kore i akarongoia e ratou ra? e eaa oki ratou e tikaʼi kia akarongo iaia i tei kore i kitea e ratou ra? e eaa oki ratou e kite ei i te akakite kore?

15 Eaa oki ratou e tikaʼi kia akakite kia kore ratou e ungaia? koia oki tei tataia ra e, “Ko te manea o te vaevae o te aronga i apai mai i te tuatua reka o te au, ko te apai mai i te evangelia o te meitaki ra e!”

16 Kare ra ratou katoatoa i akarongo i te evangelia: te na ko ra oki a Isaia, “E te Atu, koai tei akarongo i ta matou tuatua?”

17 Na te kite mari e raukaʼi te akarongo, e na te tuatua a te Atua te kite.

18 Teia ra taku tuatua, Kare rai ratou i kite? Kua kite ïa; “Kua tae ra to ratou reo ki te pa enua katoa, e ta ratou tuatua ki te kotinga o teianei ao.”

19 Teia oki taku tuatua, Kare rai Iseraela i kite? Ko Mose oki tei karanga na e, “E akakoko oki au ia kotou ki te aronga kare ua e puapinga, e akariri au ia kotou ki te iti-tangata kite kore.”

20 Te na ko maira rā Isaia ma te mataku kore, “Kua kitea au e te aronga kare i kimi iaku ra; kua akakiteia au i te aronga kare i ui iaku.”

21 Kareka ia Iseraela ra, te na ko maira aia, “I akatika ua ana au i taku rima ki te aronga akarongo kore e te māro, e ope rava akenei te rā.”