Numero
13 KUA tuatua mairā Iehova kia Mose, na ko maira,
2 E tono koe i te tangata, kia tutaka aere ratou i te enua nei ia Kanaana, taku e oronga no te tamariki a Iseraela: tataki tai tangata i te kopu okotai o to ratou ai metua kia tono koe ra, ei aronga tutara anake no ratou ra.
3 Kua tono aturā Mose ia ratou mei te medebara atu, mei Parana, e ui mataiapo anake no roto i te tamariki a Iseraela, i ta Iehova i akaue maira.
4 Teia oki to ratou au ingoa: To te kopu o Reubena ra, ko Samua ïa te tamaiti a Zakura:
5 To te kopu o Simeona ra, ko Saphata ïa te tamaiti a Hori:
6 To te kopu o Iuda ra, ko Kaleba ïa te tamaiti a Iephune:
7 To te kopu o Isakara ra, ko Igala ïa te tamaiti a Iosepha: 8 To te kopu o Epheraima ra, ko Hosea ïa te tamaiti a Nuna:
9 To te kopu o Beniamina ra, ko Paleti ïa te tamaiti a Raphu:
10 To te kopu o Zebuluna ra, ko Gadiela ïa te tamaiti a Sodi:
11 To te kopu o Iosepha, koia te kopu o Manase ra, ko Gadi ïa te tamaiti a Susi:
12 To te kopu o Dana ra, ko Amiela ïa te tamaiti a Gemali:
13 To te kopu o Asera ra, ko Setura ïa te tamaiti a Mikaela:
14 To te kopu o Naphatali ra, ko Nahi ïa te tamaiti a Vopisi: 15 To te kopu o Gada ra, ko Geuela ïa te tamaiti a Maki.
16 Ko te au ingoa teia o nga tangata i tonokia e Mose e tutaka aere i te enua ra. Tapaia iorā Hosea, te tamaiti a Nuna ra, e Mose ia Iosua.
17 Kua tono aturā Mose ia ratou, e tutaka aere i te enua ra ko Kanaana, e kua karanga atura kia ratou, E aere tika atu na te pae i apatonga ra, e aere roa ki runga i te maunga ra:
18 E akara i te tu o te enua; e te tangata e noo i reira, i te maroiroi anga, e te paruparu anga: i te maata anga, e te iti anga;
19 E to ratou enua e noo ra, i te meitaki anga, e te kino anga; e te au oire ta ratou e noo ra, i te puakapa aere ua anga, e tei roto i te punanga;
20 E te one oki, i te ngarungaruā anga, e te pariri anga, e te rakau angaia e te kore anga: e akamaroiroi oki kotou, e ka rave katoa mai i te kai no taua enua ra. Ko te tuatau e paraʼi te vine mua taua tuatau ra.
21 Kua aere atura ratou, e tutaka aere i taua enua ra, mei te medebara mai i Zini e ki Rehoba, i te arataa e aere ei te tangata ki Hamata ra. 22 I na te pae i apatonga ra ratou i te aere ki runga, e oki maira na Heberona ra; kite atura ratou ia Ahimana, e ia Sesai, e ia Talamai i reira, no te uanga o Anaka ra: (kua oti ana Heberona i te akatuia e itu akera mataiti i akatuiaʼi Zoana i Aiphiti ra.) 23 E tae maira ratou ki te peka vai ko Esekola, kua tipu maira i reira tetai kaui vine ra ma te mangamanga katoa e kua taooka maira e toko rua; e kua rave katoa maira i te remuna, e te suke. 24 Tapaia iora taua ngai ra i te peka vai ko Esekola, no te kaui vine ta te tamariki a Iseraela i tipu i reira.
25 E ope akera te au po e a ngauru ra, kua oki maira ratou mei te tutaka aere i te enua ra.
26 Oki maira ratou, e kua aere maira kia Mose, raua ko Aarona ra, e te uipaanga tamariki a Iseraela katoa ra, ki te medebara ra ki Parana, i Kadesa ra; apai maira oki i te tuatua kia raua, e te uipaanga katoa ra oki, e kua akakite maira oki i te kai no taua enua ra kia ratou. 27 Kua tuatua maira ratou kiaia, na ko maira, Tae atura matou ki te enua taau i tono ia matou nei; e e enua e taʼe a vai tika rai te u e te meli; teia oki te kai no te reira ra. 28 Kareka te tangata o taua enua ra e ririnui ïa, e te au oire oki kua patuia, e te maata roa; e kite atura oki matou i te uanga o Anaka i reira. 29 Ko to Amaleka tei noo i te pae i apatonga i taua enua akera; e te ngati Heta, e te ngati Iebusi ra, e te ngati Amori, tei te maunga ïa te noo anga: e te ngati Kanaana ra, tei taatai ïa, e tei te pae Ioridana, te noo anga.
30 Karekā Kaleba, akapapa iora aia i taua aronga tangata ra ki mua i te aroaro o Mose, na ko atura, Taki aere tatou i teianei, e rave; ka pou ua ïa ia tatou.
31 Kareka te au tangata, i aere ma ia katoa ra, kua tuatua akera ïa, Kare e tika ia tatou kia tiki e tamaki i te reira aronga; e ririnui oki to ratou i to tatou nei.
32 E kua akakino aere oki ratou i taua enua ta ratou i tutaka aere ra, na roto i te tamariki a Iseraela ra, kua tuatua ratou e, Taua enua i tutaka aereia e matou nei, e enua ra e pou to reira tangata i te mate, e te tangata katoa ta matou i akara i reira, e tangata mamaata anake ïa: 33 E kite atura matou i te au toa uritumu i reira, no te uanga o Anaka no te au toa uritumu ra: mei te kereteki rikiriki nei matou i to matou uaora akara anga, e to ratou katoa ra akara anga.