Mataio

11 E OTI akera ta Iesu akaue anga atu i tana aronga pipi tino ngauru ma rua ra, aere atura aia e apii, e e ako aere i roto i to ratou au oire.

2 E kite akerā Ioane i roto i te are tapekaanga ra i te au ravenga a te Mesia ra, kua akaunga maira aia i e toko rua puke pipi ana ra, ko tei ui mai kiaia e,

3 Ko koe aina te tae mai, e ko tetai ke ainei ta tatou e tapapa atu?

4 Kua karanga aturā Iesu kia raua, na ko atura, Ka aere, ka akakite atu kia Ioane i te au mea ta korua e akarongo nei, e ta korua e akara nei:

5 Te rauka nei te kite i te matapo, kua aere te pirikoki, kua tamāia te lepera, kua akarongo te taringa turi, kua akatuia tei mate, e kua tuatuaia atu te evangelia ki te tangata rikiriki.

6 E ko tei kore e maitu iaku nei, e ao tona.

7 E kia riro atura raua; kua karanga aturā Iesu ki te tangata tini ra ia Ioane, I aere kotou ki te medebara e akara i te aa? I te kakao i takirikiriia e te matangi?

8 I aere ra kotou e akara i te aa? I te tangata i te kakau anga i te kakau maru? i na oki, te aronga e kakau i te kakau maru ra, tei te kainga ïa o te ui ariki.

9 I aere tika ra kotou e akara i te aa? I te peroveta? koia ïa, e karanga atu au ia kotou, e maata aia i te peroveta.

10 Koia oki teia, nona te tuatua i tataia ra e, “I na, e akaunga au i taku karere na mua ia koe, nana e akameitaki i toou ara i mua ia koe.”

11 E tuatua-mou taku e tuatua kia kotou nei, Ta te vaine i anau nei, kare atu ïa e maata atu ia Ioane bapetizo nei: ko te iti rava ra i te basileia o te ao ra, e maata atu ïa iaia. 12 E mei ia Ioane bapetizo mairai e teia noaʼi, te āruia nei te basileia o te ao ra, e tei riro nei oki i te aronga i āru i te maroiroi.

13 Kua totou anake ra oki te au peroveta e te ture e tae roa akenei ia Ioane nei.

14 E kia tika ia kotou i te āriki mai, ko Elia teia tei karangaia ra e, e tae mai.

15 E taringa tona ei akarongo anga, e akarongo aia.

16 E akaarite au i teianei uki ki te aa? E tau ïa ki te tamariki e noo i te ngai okoanga ra, i te kapiki anga atu ki to ratou ra,

17 E te na ko anga e, I akatangi atu na matou i te koê, e kare kotou i ura mai; i tuporo atu ana matou i te peʼe tangi, e kare kotou i tangi mai.

18 I aere mai nei oki a Ioane ma te kaikai kore, e te inu kore, e te karanga nei ratou e, E demoni tona.

19 I aere mai te Tamaiti a te tangata ma te kaikai e te inu, e te karanga nei ratou, I na, e tangata kakai e te inu wina, e oa no te au telona e te tangata ara. E akatikaia ra te pakari e tana ra au tamariki.

20 Kua akamura atura aia i te au oire i raveiaʼi te rai o tana au akairo, i te mea kare ratou i tataraara:

21 Aue koe, e Korazina e! aue koe, e Betesaida e! naringa oki te au akairo, i raveia i roto ia korua, i raveia i Turia e Sidona, kua tataraara takere ana ratou ma te kakau akaevaeva e te reu ai.

22 E teianei, te karanga atu nei au kia korua, E ngari ake to Turia e to Sidona kia tae ki te rā akavaanga, i to korua.

23 E ko koe na oki, e Kaperenauma, ko tei akateiteiia ki runga i te rangi, e oparaia koe ki raro rava i ade; naringa i Sodoma te rave angaia te au akairo i raveia i roto ia koe na, e vai aia i teianei rā.

24 E teianei, te karanga atu nei au kia koe, E ngari ake to Sodoma kia tae i taua rā akavaanga ra, i toou.

25 Kua karanga aturā Iesu i reira ra, na ko atura. E akameitaki au ia koe, e taku Metua, e te Atu no te rangi e te enua, i te mea ko koe i uuna ke atu i teianei au mea i te aronga pakari e te kite, e kua akakite mai ki te tamariki nei.

26 Koia ïa, e taku Metua, e mea tika ïa ia koe.

27 Kua ope rava te au mea katoa i te tukuia mai e taku Metua, tei iaku: e kare rava tetai i kite i te Tamaiti, mari ra ko te Metua; e kare tetai i kite i te Metua, mari ra ko te Tamaiti, e te tangata ta te Tamaiti i inangaro i te akakite atu.

28 E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi.

29 Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua.

30 Te maru nei taku amo, e te māmā nei taku apainga.