Isaia

1 TE ORAMA a Isaia, te tamaiti a Amoza, tana i kite, ia Iuda, e Ierusalema, i te au rā o Uzia, Iotama, Ahaza, e Hezekia, i te ui ariki no Iuda ra.

2 E akarongo mai, e te au rangi e, e ariu mai i to taringa, e te enua e! ko Iehova oki teia e tuatua nei: Kua angai au i te tamariki, e kua maata ratou iaku, ko ratou ra, kua akaruke maira ïa iaku.

3 Kua kite te puakatoro i tona pu, e te asini i te vairanga kai a tona ra pu: kare ra Iseraela i kite; kare oki toku ra au tangata i akamanako.

4 Aue ïa enua ara e! e iti-tangata teiaa i te kino! e uanga rave tuatua kino! e tamariki akatupu kino! kua akaruke ratou ia Iehova; kua akaviivii ratou i Tei tapu i Iseraela nei; kua oki rava ki muri.

5 Kia pāpā akaouia ainei kotou? ka akamaata ainei kotou i te akatitima? kua makiia te upoko katoa ra, e te ngakau katoa ra kua paruparu.

6 Mei te tapuae e tae ua atu ki te upoko ra, kare rava e ngai ora; e puta anake ra, e te putoto, e te ee pirau; kare i romiia, kare i tākaiia, kare oki i maoroia ki te manongi.

7 Kua tanea to kotou enua; to kotou au oire, kua taʼu naia ki te ai; to kotou enua, kua kaingaia e te tangata ke ke ki mua tikai i to kotou mata; kua tanea oki, mei tei taitaipakokoia e te tangata ke ke.

8 Toe uaorai nei te tamaine a Ziona, mei te are piritanga i roto i te kainga vine ra, mei te are tiaki i roto i te koro kukuma, mei te oire i koropiniia i te tamaki ra.

9 Aurakā Iehova Sabaota ra i vaoo i tetai toenga iti rava, kua riro tatou mei ia Sodoma, e kua arite tatou ia Gomora ra.

10 Ka akarongo mai i te tuatua a Iehova, e te ui tutara o Sodoma e! ka ariu mai i to kotou taringa ki te ture a to tatou Atua, e te au tangata o Gomora e!

11 Te tuatua mairā Iehova, Eaa taku puapinga i ta kotou au atinga e manganui? kua iu au i te au atinga mamoe toa karakaratio ra, e te tongaua o te au puaka i angaiia ra: e te toto puakatoro, e to te au punua mamoe, e to te au puaka-nio ra, kare au e mareka atu.

12 Kia aere mai kotou ki mua i toku aroaro nei, naai i umuumu i te reira i to kotou na rima, kia takai kotou i toku ra au paepae?

13 Auraka e apai akaou mai i te au atinga kai puapinga kore; te rakau kakara ra, e mea viivii ïa naku; te au marama ou, e te au sabati, te uruoaanga tapu i tutu aereia, e te au rā i akatapuia, ma te kino katoa, kare e tika iaku kia akakoromaki.

14 Ta kotou au marama ou ra, e ta kotou au oroa akatakaia ra, kua riri roa taku vaerua i te reira; e apainga teiaa ïa naku; kua roiroi au i te apai anga.

15 Kia oora mai oki i to kotou rima, e puroku au i oku mata ia kotou; e kia akamaata kotou i te au pure, kare au e akarongo atu; kua ki oki to kotou rima i te toto.

16 E orei ia kotou kia mā kotou; e tuku ke atu i te kino ta kotou e rave ra ki mua i oku nei mata; kua oti ana i te rave i te kino:

17 E apii i te rave i te meitaki; e kimi i te tuatua-tau; e akaora i tei takingakinoia ra; e akatika i ta te matiroeroe; e tauturu i te vaine takaua ra.

18 E tenana, te tuatua mairā Iehova, e akatikatika ana tatou i te tuatua: aite ua rai ta kotou au ara ki te mea kutekute ra, e teatea ïa mei te kiona ra; muramura ua rai mei te mea ekoeko ra, e riro ïa mei te uru-mamoe ra te teatea.

19 Kia tika ia kotou, e kia akarongo ra, e kai ïa kotou i te meitaki o te enua nei;

20 Kia kore ra e tika ia kotou ra, e kia patoi mai, ka pou kotou i te koke: te tuatua maira oki te vaa o Iehova.

21 Aue oki te oire tuatua-tika, i riro ïa ei akaturi e! i ki ana i te tuatua-tau ra; tei roto iaia te tuatua-tika te vairanga; i teianei rā, e aronga ta tangata ïa.

22 Kua riro taau ario ei ota; e taau wina, kua irokia ki te vai:

23 E akono ngata to au ariki ra, e aronga kapiti no te keia; te inangaro anake ra ki te apinga, e te kimi ra i te tutaki; kare ratou i akatika i ta te matiroeroe, e kare te tuatua a te vaine takaua e tae atu ki mua ia ratou.

24 E teianei, te tuatua maira te Atu ra, ko Iehova Sabaota, Tei Ririnui i Iseraela nei: Aue! e anga taku riri i te aronga i māro mai iaku nei, e tutaki marie atu au i toku au enemi:

25 E akaoki atura au i toku rima ki runga ia koe; e tamā takiri atu au i te ota ia koe, e akataka ke rai au i te mea e kino ei koe ra.

26 E akaoki mai au i to au akava ra mei tei muatangana ra, e te au tumu korero naau ra mei tei te akamataanga ra: e muri ake i te reira, ka tapaia koe e, Te oire tuatua-tika ra, Te oire pikikaa kore ra.

27 E akaoraia Ziona i te tuatua-tau, e tana i akaariuia maira i te tuatua-tika.

28 Okotai rai pou anga to te aronga kaitamaki e te rave ara ra; e te aronga i akaruke ia Iehova ra, e pou ïa.

29 E akama oki kotou i te au ale ta kotou i anoano ra, e aringaringa kotou i te au kainga ta kotou i iki ra.

30 Ka riro kotou mei te ale i mae te rau ra, e mei te kainga vai kore ra.

31 E riro tei maroiroi mei te mauku marō ra, e tana i angaanga ra mei te pura ai; raua katoa i te ka katoa anga, e kare rava e tamateia atu.