Philipi

3 E TEIANEI, e aku au taeake e, kia rekareka kotou i te Atu. Kare e mea manamanata naku kia tata akaou atu au i taua tuatua rai ia kotou na, e e tuatua ora rai oki ia kotou ra.

2 E matakite oki i te au kuri ra, e matakite i te rave angaanga kikino ra, e matakite i te katatome.

3 Ko tatou te peritome, ko tei akamori i te Atua ma te Vaerua ra, ko tei rekareka i te Mesia ra ia Iesu, e kare rava e irinakianga i te kopapa nei.

4 E tika oki iaku kia irinaki i ta te kopapa, naringa e puapinga. E te manako ra tetai tangata e irinakianga tana i ta te kopapa nei, e maata atu rai taku:

5 I peritomeia au i te po varu, e ngati Iseraela, i te kopu o Beniamina, e Ebera na te Ebera; i te akonoanga ture ra, e Pharisea ïa;

6 I te akonoanga o te maroiroi ra, kua takinga-kino au i te ekalesia ra; i te tuatua-tika a te ture ra, kare aku e apa i te reira.

7 Ko taua au mea apinga naku ra, ko taku ïa i akariro akenei ei mea puapinga kore i te Mesia nei.

8 Koia tikai, e mea puapinga kore te au mea ravarai nei iaku i te meitaki maata ra i to kite i taku Atu ra ia Iesu Mesia: i akaruke ei au i te au mea katoa ra, e kua riro ïa ei teita iaku, kia rauka iaku te Mesia.

9 E kia kitea au i roto iaia, auraka ra ma te tuatua-tika naku uaorai i te ture ra, ko te rauka maira i te akarongo i te Mesia ra, ko te tuatua-tika no ko mai i te Atua ra i te akarongo:

10 Kia kite oki au iaia, e te marōrō o tona tuakaouanga, e te kapiti anga atu i tona au mamae, i te akaarite anga atu i tona mate:

11 Kia rauka iaku te tuakaouanga mei te mate maira.

12 Kare au i karanga e kua rauka iaku, e kua meitaki rava au i teianei: te umuumu atu nei ra au, peneiake ko te rauka iaku te mea i rokoia mai ei au nei e te Mesia ra e Iesu.

13 E aku au taeake e, kare au i manako iaku uaorai nei e kua rauka: okotai aku mea e rave nei; i te akangaro anga i te au mea i muri ra, e te uapou anga atu i tei mua ra,

14 Te aruaru atu nei au na te akairo, kia rauka iaku te tutaki i ta te Atua ra kapiki anga no runga maira i te Mesia nei ia Iesu.

15 E teianei, e na reira to tatou manako, to te aronga katoa i karape ra: e e manako ke ra to kotou i tetai mea atu, na te Atua e akakite mai ia kotou i te reira.

16 Ko ta tatou ngai i rauka maira, na reira tatou i te aere na taua akairo rai, kia akono oki tatou i te mea okotai.

17 E aku au taeake, ei aru kotou katoa iaku nei, e akara meitaki i te aronga e na reira katoa, ko matou oki to kotou akaraanga.

18 (To tetai papaki aerenga e mea ke ïa, i taku i akakite putuputu, e te akakite atu nei rai ia kotou i teianei, ma te roi-mata, e enemi ratou no te satauro a te Mesia: 19 Ko te mate oki to ratou openga; te kopu oki to ratou atua, e ta ratou tuatua akama, to ratou ïa akaparauanga, to teianei ao anake ra ta ratou e akono.)

20 Kareka ta matou tuatua, no te ao ïa; e te tapapa atu nei i te Ora no reira mai, i te Atu ia Iesu Mesia:

21 E nana e akatu ke i to tatou kopapa viivii nei, kia okotai rai tu e tona kopapa kakā, i te ravenga mana nana ra e tikaʼi iaia kia rave i te au mea ravarai, e e vi katoaʼi te au mea katoa i raro ake iaia uaorai.