Roma

15 E TEIANEI, ko tatou ko tei maroiroi nei, ka akakoromaki i te apikepike o te maroiroi kore e tikaʼi, eiaa e akatika i ta tatou uaorai.

2 E akarekareka tatou katoa nei i tetai ke, kia meitaki aia, kia maroiroi.

3 Kare katoa oki te Mesia i akarekareka iaia uaorai, i tei tataia ra e, “Te akakino a te aronga i akakino ia koe ra, kua iri mai ïa ki runga iaku.”

4 Te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.

5 E teianei, kia akaarite mai te Atua nona te akakoromaki e te pumaana, i to kotou ngakau, tetai ki tetai kia tau i te anoano o te Mesia ra o Iesu:

6 Kia akameitaki kotou i te Atua, i te Metua o to tatou Atu ra o Iesu Mesia, ma te ngakau okotai, e te vaa okotai.

7 E teianei ka āriki kotou ia kotou uaorai, mei te Mesia i āriki mai ia tatou nei, kia kakā te Atua.

8 Teia taku tuatua e rave angaanga a Iesu Mesia no te peritome kia kitea te tuatua-mou a te Atua, kia tupu te tuatua i tuatuaia mai i te aronga tupuna ra;

9 E kia akameitaki te etene i te Atua i tona aroa; koia oki tei tataia ra, “E teianei e akameitaki au ia koe i rotopu i te au etene ra, e imene akapaapaa rai au i toou ingoa.”

10 Te na ko ra oki, “Ka rekareka, e te au etene, e tona katoa au tangata.”

11 E te na ko akaou ra oki, “E akameitaki ia Iehova, e te au etene katoa e, e akapaapaa iaia, e te au tangata katoa na.”

12 Te na ko maira oki a Isaia, “E kitea mai tetai aka o Iese, ko te ka tupu ei ariki no te etene, ei iaia e irinaki ei te etene.”

13 Kia akakiia mai kotou i te rekareka ravarai e te au i te akarongo anga, e te Atua e raukaʼi te irinakianga; kia maata to kotou irinaki i te mana o te Vaerua Tapu ra.

14 Ko au uaorai oki tei kite ia kotou, e aku au taeake, e kua ki katoa kotou i te meitaki, kua akakiia kotou i te kite, e ka tika oki kia apii ia kotou uaorai.

15 Tera tetai mea i tata atu ei au i te tuatua kia kotou, e te au taeake, ma te mataku kore, kia tupu to kotou manako, no te aroa ua o te Atua i orongaia mai kiaku nei;

16 Kia riro au ei tavini no Iesu Mesia i te etene, i te tuku anga i te evangelia o te Atua, kia akatikaia te atinga etene i akatapuia e te Vaerua Tapu.

17 E teianei e akatietie anga toku ia Iesu Mesia ra i te au mea a te Atua ra.

18 Kare ra au e tika kia tuatua i te au mea katoa kare i raveia e te Mesia iaku nei; i te au mea ra tana i rave, i te akamako anga atu i te etene, i te tuatua e te rima:

19 Ma te ravenga taka ke maata e te akairo, i te mana o te Vaerua o te Atua; e kua akakite pu ua oki au i te evangelia o te Mesia, na Ierusalema atu i te akapini aere anga e tae rava akenei i Iliriko.

20 Koia ïa, i umuumu marie na oki au kia akakite atu au i te evangelia i te au ngai kare i kite i te ingoa o te Mesia ra, ko te patu aea oki au ki runga i ta tetai ke ra pange:

21 Mei tei tataia ra e, “Te aronga kare aia i akakiteia atu, ka akara ratou: e te aronga kare rai i akarongo ra, ka kite ïa ratou.”

22 No reira oki au i roaʼi i kore ei au i tae atu kia kotou na.

23 I teianei ra, kare oku roa i teianei pa enua, e no te anoano maata toku e manganui akenei te mataiti i te aere atu kia kotou na;

24 Kia aere ra au ki Hisepania ra, e aere atu ei au kia kotou na: te anoano nei au kia kite au ia kotou i taua tere noku ra, e kia aratakiia au e kotou i toku aerenga ki reira, kia reka ana ra au i te kapiti anga ia kotou.

25 Te aere nei ra au ki Ierusalema, e tauturu i te aronga tapu ra.

26 Kua uipa oki to Makedonia e to Akaia i te moni no to ratou uaorai anoano, na te aronga tapu apinga kore i Ierusalema ra.

27 Kua inangaro rai oki ratou, e e kai ou rai oki ratou na ratou. Kua rave katoa oki te etene i ta ratou apinga no te vaerua ra, e apai atu oki ratou i ta te kopapa ra na ratou e tikaʼi.

28 E teianei, kia oti iaku taua angaanga nei, e kia tuku tikaia atu e au teianei meitaki ia ratou ra, na ko na atu au ia kotou na te aere, ka aere tika atu ei ki Hisepania ra.

29 Kua kite tikai oki au e, kia aere atu au kia kotou na, ka aere atu ïa au ma te ki katoa i te meitaki o te evangelia o te Mesia ra.

30 E ako atu ra au ia kotou, e te au taeake, i te Atu ra ia Iesu Mesia, e te aroa o te Vaerua ra, kia akamaroiroi tatou ravarai i te pure i te Atua iaku;

31 Kia ora au i te aronga akarongo kore i Iudea ra; e taku e rave nei na to Ierusalema ra, kia āriki meitakiia mai e te aronga tapu ra;

32 Kia tae atu au kia kotou ma te rekareka i te tika a te Atua ra, e kia pumaana tatou katoa nei.

33 E teianei, ei ia kotou ravarai na te Atua au. Amene.