Mataio

9 AERE atura aia ki runga i te pai, akatere atura ki tetai papaki, e tae atura ki tona uaorai oire;

2 E i na, te apai maira ratou i tetai akangoru kiaia ra te vai ua ra i runga i te roi; e kite aturā Iesu i to ratou akarongo, kua karanga atura ki taua akangoru ra, E akamaroiroi, e tama; kua akakoreia taau au ara.

3 E i na, te tuatua ra tetai au tata tuatua i roto ia ratou uaorai, Kua akakino Atua teianei tangata.

4 Kua kite rā Iesu i to ratou manako, e kua na ko atura, Eaa kotou i manako kino ei i roto i to kotou ngakau?

5 Teea te mea rave ngoie, ko te karanga atu aina, Kua akakoreia taau ara; e ko te karanga atu aina, Ka tu ki runga, ka aere?

6 Kia kite ra kotou e, e mana to te Tamaiti a te tangata i te ao nei kia akakore i te ara, (kua karanga atura aia ki taua akangoru ra,) Ka tu, ka rave i to roi, ka aere i to ngutuare.

7 Tu akera aia ki runga, aere atura ki te ngutuare.

8 E kite akera taua aronga maata ra, va anake iora ma te akakakā i te Atua, ko tei oronga mai i te reira tu mana i te tangata nei.

9 E te aere mairā Iesu mei reira mai, kite atura aia i tetai tangata, ko Mataio te ngoa, te noo ra i te are telona; kua karanga atura kiaia, Ka aru mai iaku. Tu akera aia ki runga, aru maira iaia.

10 E te noo rā Iesu i te kaingakai i roto i te are, i na, e manganui te telona e te aronga ara i aere mai, e noo anake iora ratou ma ia katoa e tana au pipi ra.

11 E kite akera te au Pharisea, kua karanga atura ki tana au pipi, Eaa i kai katoaʼi ta kotou Orometua e te au telona e te aronga ara nei?

12 Kite akerā Iesu, kua tuatua maira kia ratou, Kare no te aronga ora te taunga, no te aronga maki ra.

13 E teianei, ka aere, ka apii i te ariteanga i te manga tuatua ra e, “Ko te aroa taku i anoano, auraka te atinga:” kare oki au i aere mai e tiki i te aronga tuatua-tika, i te aronga ara ra, kia tataraara.

14 Kua aere maira te au pipi a Ioane kiaia i reira, kua na ko maira, Te akakore putuputu ua nei matou e te au Pharisea i te kai, eaa taau nei au pipi i kore ei i akakore i te kai?

15 Kua na ko aturā Iesu kia ratou, Te aue nei aina te au oa o te tane ou i te noo katoa anga o taua tane ou ra ki o ratou ra? te vai atura te tuatau e apai keiaʼi te tane ou ra, ei reira ratou e akakore i te kai.

16 Kare e tangata e pananaki i te kakau piro ki te kakau ou; kia pera, e maata rava te ngaae o taua kakau piro ra i taua pananaki ou ra.

17 Kare e tangata e tuku i te wina ou ki roto i te āriki taito; kia pera, e ngaae te āriki, maringi atura te wina, e kino rava atura te āriki. E tuku ra ratou i te wina ou ki roto i te āriki ou, e ora kapipiti ïa.

18 Te karanga atura aia kia ratou i taua au tuatua nei, i na, te aere maira tetai rangatira, tipapa iora ki mua iaia, na ko maira, Kua mate takiri taku tamaine i teianei; ka aere maira koe, e tuku i to rima ki runga iaia, ka ora ïa aia i reira.

19 Kua tu akerā Iesu ki runga, aru atura iaia, e tana au pipi katoa.

20 E i na, tetai vaine, raungauru ma rua ona mataiti i te mate ua anga i te atekeria, kua na muri maira iaia, akatukia maira i tona tapa kakau;

21 I tuatua aia ki roto iaia uaorai e, Kia akatukia ua atu au i tona kakau, ka ora ïa au.

22 Kua ariu aturā Iesu, e kite atura iaia, kua karanga atura, E akamaroiroi, e taku tamaine, kua ora koe i toou akarongo. Ora rava atura ïa taua vaine i reira ra.

23 E tae aturā Iesu ki roto i te are o taua rangatira ra, e kite atura i te au akatangi koê ra, e te tangata i te aue anga,

24 Kua karanga atura aia kia ratou, Kia matea atu; kare taua tamaine ra i mate, kua moe ra.

25 Kua taitoito maira ratou iaia. E ope akera taua aronga tangata ra i te tukuia ki vao, tomo atura aia ki roto, kua rave atura i tona rima, tu ua maira taua tamaine ra ki runga.

26 Tutuki atura te rongo o taua mea ra, e kako rava akera te reira enua.

27 E te aere aturā Iesu mei reira atu, kua aru maira e toko rua puke tangata matapo iaia, kua kapiki maira, na ko maira, E te tamaiti a Davida ra, e aroa mai koe ia maua.

28 E tae atura aia ki roto i te are, kua aere maira nga tangata matapo ra kiaia, kua karanga aturā Iesu kia raua, Te manako na korua e, e tika tena iaku? Kua tuatua maira raua, A, e te Atu.

29 Kua akatukia atura aia i to raua mata, na ko atura, Ta korua i manako na, kia peraia korua.

30 Puera akera to raua mata i reira ra; kua ako ua aturā Iesu ia raua, na ko atura, Eiaa rava tetai tangata e kite.

31 Aere atura ra raua, kave aere atura i tona rongo, e kako rava akera te reira enua.

32 E riro atura raua, i na, te apaiia maira tetai tangata murare kiaia, e demoni oki tona

33 E kia tuaruia taua demoni ra ki vao, kua tuatua iora taua murare ra: va ua iora taua aronga maata ra, na ko akera, Kare akerai teia i kitea i Iseraela nei.

34 Kareka te au Pharisea, kua na ko akera ïa, Te tuaru nei aia i te demoni i te mana o te demoni maata ra.

35 Aere aturā Iesu na roto i te au oire e te au vila katoa, i te apii anga i roto i to ratou au sunago, e te ako anga i te evangelia o te basileia, e te akaora anga i te au maki ravarai, e te au mate katoa o te tangata.

36 E kia akara akera aia i te maata o te tangata, aroa atura aia ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra.

37 Kua karanga atura aia ki tana au pipi, Te maata ua nei te mou, te iti nei ra te aronga e kokoti:

38 E teianei, e pure kotou i te Atu o te mou, kia unga mai aia i tetai aronga ei rave i taua mou nana ra.