Salamo

73 E TAKINGA-MEITAKI tikai to te Atua ia Iseraela, i te aronga ngakau mā ra.

2 Kareka au nei, kua vaitata toku vaevae i te paeke; me turori oki toku takainga;

3 Iaku i vareae i te aronga neneva, ka kite ei au i te meitaki o te aronga kino ra.

4 Kare oki o ratou e mamae i te matenga: te vai maroiroi rai to ratou ririnui.

5 Te tumatetenga o te tangata nei kare ua ia ratou; kare oki ratou i tairoia mei to etai aronga tangata.

6 I akapiniiaʼi ratou e te nengonengo mei te pirianganaoa; kua vaîia ratou e te takinga-kino mei te kakau ra.

7 Kua ngenengene to ratou mata i te matu; te inangaro o to ratou ngakau, e mea anga kore ïa.

8 Te aviri ra ratou ma te tuatua kikino; te nengonengo ra ratou i te tuatua takinga-kino ra.

9 Te patoi ra to ratou vaa i te au rangi ra, te aaere ra to ratou arero i te enua katoa nei.

10 E oki rai tona au tangati i ku nei, e te vai i ki ei te kapu tei tatauia no ratou.

11 E te tuatua ra oki ratou, Eaa te Atua e kite ei? e e kite aina to Tei Teitei ra?

12 I na, ko te aronga akono kore i te Atua teia, ko tei manuia i teianei ao, te tupu ra i te maata anga ta ratou apinga.

13 E tamā anga puapinga kore tikai toku e toku nei ngakau, e te orei anga oki i toku rima i te apa kore:

14 Kua tairoia ra au e po ua atu te rā, e kua pāpāia kare e popongi e vata.

15 Kia pera oki taku tuatua mei te reira ra, i na! kua pikikaa ïa au i te uki tamariki naau ra.

16 Iaku ra i kimi kia kite au i taua mea nei, e mea pikipiki ïa iaku:

17 Kia aere ra au ki roto i te ngai-tapu a te Atua ra, kite akera au i to ratou openga.

18 Kua tuku tikaia ratou e koe ki te ngai pateka; kua titiri takiriia ratou e koe kia mate rava atu.

19 Perepereta ïa to ratou mate e! i pou takiri roa atu ei ratou i te mataku maata ra.

20 Mei te moemoea kia ara te tangata ra, koia katoa koe, e te Atu; kia tu koe ki runga ra, ka akaviivii roa atu ei koe i to ratou ra tu.

21 Ka taitaiaʼi toku ngakau, e putaputa akera to roto iaku.

22 Manako kore toku, e te kite kore: mei te puaka ra au i mua ia koe.

23 Ei ia koe rai au; na to rima katau i mou mai iaku.

24 Ka riro rai koe i te arataki iaku i taau ra tuatua, e te openga iora ka apai ei koe iaku ki te ao.

25 Koai ra toku ki runga i te au rangi ra? kare takiri tetai i te enua nei tei anoanoia e au, mari ra ko koe?

26 Kia paruparu toku kopapa e toku ngakau katoa, ko te tauturu rai o toku ngakau, e taku ra tuanga, ko te Atua ïa, e tuatau ua atu.

27 I na oki, te aronga e taka ke ia koe ra, ka pou ïa: te aronga oki e akaruke ia koe ra, ka tamate ravaia ïa.

28 E mea meitaki ra iaku kia akavaitata atu ki te Atua: kua irinaki au i te Atu ra, ia Iehova, kia akakite rai au i taau katoa ra au angaanga.