Salamo

92 E MEA meitaki te akameitaki ia Iehova, e te imene akameitaki i to ingoa, e Tei Teitei e:

2 I te akakite i to takinga-meitaki i te popongi, e te tuatua-mou naau i te au aiai katoa ra;

3 Ki runga i te mea ao okotai ngauru ra, e te nabala, ki runga i te kinura tangi meitaki ra.

4 Te akarekareka maira oki koe iaku, e Iehova, i taau i rave ra: ka umere parua au i te angaanga a to rima.

5 Kare rai te maata o taau ra angaanga, e Iehova! te oonu maata o toou ra manako!

6 Kare ra te tangata manako kore i kite, e te neneva ra, kare aia i akono i teia.

7 Me tupu te aronga kino mei te ngangaere, e me ruperupe katoa te aronga i rave i te kino ra; i ruperupe ïa, kia tipu akaruke takiri roaia ra.

8 E ko koe, e Iehova, e tika koe i te teitei anga e tuatau ua atu.

9 I na oki, to au enemi, e Iehova, i na to au enemi, ka pou ïa; te aronga katoa i rave i te kino ra, ka akapueurikiriki keia ra.

10 Ko toku nei ra tara, ka akateiteiia ïa e koe mei to te puakatoro taetaevao ra: kua akatainuia au i te manongi ou.

11 Ka kite toku mata i toku au enemi i te inga anga; ka akarongo toku taringa i te pou o te aronga kino, i tu mai e māro mai iaku ra.

12 Ka ruperupe te tangata tuatua-tika mei te nu tamara ra; ka tupu ïa mei te arezi i Lebanona ra.

13 Ko tei tanumia i roto i te are o Iehova ra, ka ruperupe ïa i te au paepae o to tatou Atua:

14 Ka ua rai ïa, e tae ua atu ki te ruaine anga ra; ka ki i te tapou, e e vai mata ua ra:

15 E akakite anga atu e, e tiratiratu ta toku mato, ta Iehova, e kare rava e tuatua-tika kore o roto iaia.