Isaia

48 E AKARONGO mai i teia, e te ngutuare o Iakoba; kotou, e tei tapaia i te ingoa ra ia Iseraela; e tei no te tumu vai ra o Iuda i te taʼe anga mai; tei taputou i te ingoa o Iehova, e ko tei akaiki i te Atua no Iseraela; kare ra ma te tuatua-mou, e kare rai ma te tuatua-tika.

2 No te oire tapu ratou i ta ratou uaorai tuatua anga, e te irinaki ra ratou i te Atua no Iseraela; ko Iehova Sabaota ra, tona ingoa.

3 Kua akakite au i tei muatangana ra au mea mei te akamataanga mairai; e riro atura ïa no roto i toku nei vaa; e kua akakite oki au i te reira; kua rave viviki oki au i te reira, e tupu atura ïa.

4 No te mea kua kite au i toou māro; e uaua auri toou kaki; e toou rae, e veo ïa;

5 I akakite atu ei au ia koe mei te akamataanga mairai; kare te reira i tupu, i akakite atu ei au ia koe ra; ko te karanga aea koe, Na taku idolo te reira i rave; e na toku tiki kotikotiia, e toku tiki i akatoia ra i akaue i te reira.

6 Ko taau oki i akarongo ra; ka akara na i taua au mea katoa ra; kare ainei kotou e akakite i te reira? mei teianei tuatau kua akakite atu au ia koe i te au tuatua ou, ko tei uunaia ra, e kare koe i kite i reira.

7 Kua angaia ra i teianei, e kare mei te akamataanga mai; kare rai oki koe i rongo i te reira mei ito mai; ko te karanga aea koe e, I na, kua kite ana au i te reira.

8 Koia ïa, kare oki koe i akarongo; kare oki koe i kite; kare oki i taito roa te putata anga o to taringa: kua kite oki au e e riro koe i te pikikaa, e kua tapaia koe ia Meameaau mei te kopu mairai.

9 No toku ingoa nei ra e tavare ei au i toku riri; e no te akameitaki iaku e tāpu ei au i te reira ia koe; kia kore au e tipu takiri atu ia koe ra.

10 I na, i tamā ana au ia koe, kare ra mei te ario ra; kua timata au ia koe ki roto i te umu o te tumatetenga ra.

11 Noku uaorai, noku uaorai, i akaperaʼi au; eaa e tikaʼi kia akakinoiaʼi toku nei ingoa? Kare rava au e oronga i toku nei kakā ki tetai ke.

12 E akarongo mai iaku, e Iakoba, e Iseraela, i tei tuatuaia e au ra: ko au nei ia: ko au te muatangana; ko au rai te akaopenga.

13 Na toku rima i akatumu i te enua, na toku rima katau i totoa i te au rangi: kia kapiki atu au kia ratou, kua tu katoatoa maira ratou.

14 E uipa mai kotou ravarai, e akarongo mai: koai to ratou i akakite mai i teianei au mea? Ko tei anoanoia e Iehova ra, te ka rave i tona inangaro kia Babulonia, e tona te rima e iri ki runga i te Kaledea ra.

15 Ko au, ko au tei tuatua; koia rai, ko au tei kapiki atu iaia; naku aia i arataki mai; e e riro tona aerenga i te manuia.

16 E akavaitata mai kiaku nei, e akarongo mai kotou i teia: kare au i tuatua ngaro ana mei ito mairai: i te tuatau i tupu ei, tei reira au; e teianei, kua tono mai te Atu ra ko Iehova iaku, e tona Vaerua.

17 Te na ko mairā Iehova, toou Akaora, Tei Tapu i Iseraela nei: Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra.

18 Angairi koe i akarongo mai ki te au akauenga naku! kua riro ïa toou au mei te vai taʼe ra; e taau tuatua-tika mei te ngaru moana ra:

19 E toou uanga ra, mei te one taatai ra ïa; e ta to kopu i anau ra; mei te ungaungā one i reira ra; kare i tipu keia; kare oki tona ingoa i akakoreia i mua iaku nei.

20 E aere mai kotou mei roto i Babulonia; e rere mai mei te enua o te Kaledea; ka akakite i te reira ma te reo imene; e tuatua i te reira; e kia puroro atu te reo i te openga mai o te enua ra; e tuatua kotou, Kua akaorā Iehova i tona tavini ia Iakoba.

21 Kare ratou i kaki vai i te au medebara ra tei aratakiia ratou e ia: kua akataʼe mai aia i te vai no roto i te mato no ratou: kua vavaʼi iora aia i te mato, koîî ua maira te vai.

22 Te tuatua mairā Iehova, Kare rava o te aronga rave ara ra e au.