Iobu

12 KUA tuatua mairā Iobu, na ko maira,

2 Ko kotou tika rai nga tangata kite, e me mate kotou ra, ko te mate rai ïa o te pakari.

3 Te kite katoa nei rai au mei ia kotou katoa na; kare au i iti ia kotou: koai oki tei kore i kite i tenana au tuatua?

4 Kua riro au mei tei akavaavaaia e tona ra oa, ko tei kapiki atu ki te Atua, e kua tuatua maira aia iaia: kua kata aviriia te tangata tuatua-tika, e te tiratiratu.

5 Mei te lamepa akarukeia, (i te manako o tei noo ponuiaau ua ra,) te tangata i vaitata tona vaevae i te paeke.

6 Te noo au ra te au puakapa o te aronga keia, e te aronga i akakoko atu i te Atua ra, te vai ngaueue kore ua ra ïa; e te akaki maira te Atua i to ratou rima ki te apinga.

7 Ka ui ana ra ki te au puaka, e na ratou e apii mai ia koe; e te au manu o te reva nei, e na ratou e akakite mai kia koe;

8 E kare ra, ka karanga atu ki te enua, e nana e apii mai ia koe: e na te au ika o te tai e akakite mai kia koe.

9 Koai to roto ia ratou ravarai tei kore i kite e, na te rima o Iehova teia i rave?

10 Tei tona rima te aʼo o te au mea ravarai e ora nei, e te vaerua o te au tangata katoa nei.

11 Kare ainei na te taringa nei e timata i te tuatua? e na te vaa e tongi i tana kai?

12 Tei te aronga taito te pakari; e te kite tei te maata ïa o te au rā ra.

13 Tei iaia oki te pakari e te ririnui, tei iaia oki te ako e te kite.

14 I na, ko tana i vavaʼi ra, kare te reira e tika kia patu akaouia: kia momani aia i te tangata ki roto, kare rava e matara anga.

15 I na, nana i tāpu i te vai, e mate akera ïa: nana oki i tuku mai ki vao, e kua nina ravaia te enua.

16 Tei iaia te ririnui e te pakari: e tei akatatipakeia ra, e tei akatatipake, tei iaia ïa.

17 Te akariro nei aia i te aronga tumu korero ei tuikaa, e te aronga akava kua akariroia ei neneva.

18 Te mana a te au ariki tei matara iaia, e te tatua nei aia i to ratou taukupu ki te taura.

19 Te akariro nei aia i te kau taunga ei tuikaa, e te uri nei i te aronga mana ki raro.

20 Te akakore nei aia i te korero a te aronga tuatua-mou, e te apai ke nei i te kite o te aronga ruaine ra.

21 Te riringi nei aia i te akavaavaa ki runga i te aronga mana, e te tatara nei aia i te tatua o te toa.

22 Te uaki nei aia i te au mea ngaro ra o te poiri, e te kika nei i te marumate ki roto i te mārama.

23 Te akamaata nei aia i te au enua, e kua akapou atura: te akapararauare nei aia i te au enua, e kua akaoiti akaou.

24 Te rave ke nei aia i te manako o tei maata i te au tangata o te enua nei, e kua akauoa aere aia ia ratou i te medebara arataa kore.

25 Te aa aere ua ra ratou i roto i te poiri, e kare e mārama, e kua turori ua ratou iaia mei te konā kava ra.