Apokalupo

19 E I muri ake i taua au mea nei, akarongo atura au i te reo maata mei te reo o tetai urupu maata ki runga i te rangi, i te na ko anga, e Aleluia; ko te ora, e te tapu, e te ngateitei, e te mana, ei te Atu, ei to tatou Atua ïa.

2 E mea mou oki e te tika tana tuku anga utunga: kua akautunga io nei oki aia i taua vaine akaturi maata ra, ko tei akaviivii i to te ao nei i tana akaturi anga. e kua akaoko aia i te toto o tona au tavini ta tona rima i akamaringi.

3 Kua na ko akaou akera oki ratou, Aleluia, E e tika tona auai i te peke anga ki runga e tuatau ua atu.

4 Kua tipapa iora te aronga taito e rua ngauru ma a, e nga mea ora e a ra, ki raro, akamori atura i te Atua i tei noo ki rungao i te terono ra, na ko atura, E tika ïa. Aleluia.

5 Ko tetai reo maira no roto i taua terono ra; i te na ko anga e, E akameitaki i to tatou Atua, ko kotou katoa tona au tavini, e ko kotou oki ko tei mataku iaia ra, ko te tangata rikiriki e te aronga mamaata.

6 Kua akarongo atura au mei te reo o tetai urupu maata, e mei te aruru o te tai maata ra, e mei te kokina mangungu maata ra, i te na ko anga e, Aleluia: tei te Atu ra, tei te Atua mana katoatoa ra te au.

7 Kia rekareka tatou, e kia pereperekavana e e akameitaki oki iaia: kua tae oki ki te akaipoipo anga a te Punua-mamoe, e kua akamanea tana vaine iaia uaorai.

8 E kua tukuia iaia te kakau i te kakau meitaki, e mea viivii kore, e te teatea e taua kakau meitaki ra, ko te tuatua-tika ïa a te aronga tapu ra.

9 Kua tuatua maira aia kiaku, Ka tata na, E ao to tei tuatuaia e aeae mai ki te kaingakai po no te akaipoipo anga a te Punua-mamoe ra. E kua na ko maira aia kiaku, Ko te tuatua-mou teia na te Atua ra.

10 Kua tipapa iora oki au ki raro i tona pae vaevae e akamori iaia. Kua tuatua maira aia kiaku, Auraka koe e akapera; e taeake tavini au noou, e no to au taeake e akakite i te tuatua a Iesu ra; e akamori i te Atua: ko te akakite oki ia Iesu ra, ko te vaerua ïa o te totou.

11 Kite atura oki au i te rangi i te vevete angaia, e i na, e oroenua teatea; e ko tei noo ki rungao ra, kua karangaia aia, i te Pikikaa kore, e te Tuatua-mou, e akava aia, e e tamaki i te tamaki, ma te tuatua-tika.

12 Mei te mura ai ra ona mata, e manganui te korona ki rungao i tona upoko; e e ingoa oki tona kua tataia, kare rava e tangata i kite, mari ra aia uaorai.

13 E te kakau ra aia i te kakau i tutouia i te toto ra: e tona ingoa kia tuatua ra, Ko te Logo ïa a te Atua ra.

14 E kua aru maira te au nuku o te rangi ra iaia, ki rungao i te oroenua teatea, ma te kakau meitaki, e te teatea, e te vivii kore, i te kakau anga.

15 E koke kokoi tei peke mai no roto i tona vaa, ei tainga anga nana i te pa enua: e e mana aia ki rungao ia ratou ma te sepeta auri ra: e nana e takatakai i te taomianga vine ra, ko te wina o te riri otooto o te Atua mana katoatoa ra.

16 E e ingoa tona kua tataia ki rungao i tona kakau e tona ūā, KO TE ARIKI O TE AU ARIKI, E TE ATU O TE AU ATU RA.

17 Kua akara atura au i tetai angela i te tu anga ki roto i ta rā; kua kapiki maira ma te reo maata ki te au manu ravarai e rere i roto i te mareva nei, na ko maira, Ka aere mai e akaputuputu kotou i te kaingakai aiai a te Atua maata ra;

18 Kia kai kotou i te kopapa o te au ariki ra, e te kopapa o te au rangatira ra, e te kopapa o te aronga mana ra, e te kopapa o te au oroenua, e to tei noo ki rungao ra, e te kopapa o te au tangata ravarai, to te rangatira e to te tuikaa, to te tangata rikiriki e to te aronga mamaata.

19 E kua akara atura au i taua puaka taae ra, e te au ariki o te ao nei, e to ratou au nuku tamaki, kua putuputu e tamaki iaia i tei noo ki runga i te oroenua ra, e i tona nuku.

20 Opukia atura taua puaka taae ra, e te peroveta pikikaa katoa ko tei rave i te au akairo ki mua iaia, i vare ei iaia te aronga i āriki i te akairo a te puaka taae ra, e tei akamori i tona tutu. I uri oraoraia atura raua ravarai ki roto i te roto ai e te teio e ka ua ra.

21 Ko te aronga i toe ra, kua taia ïa i te koke i peke mai no roto i te vaa o tei noo ki rungao i te oroenua ra: e iu rava akera te au manu ravarai i to ratou au kopapa.