Isaia

11 E TUPU tetai tupu ou no roto i te tumu ra o Iese; e no roto mai i tona au aka e tupu mai ei tetai uri uua.

2 Ka noo ua mairai te Vaerua o Iehova ki runga iaia, te Vaerua o te pakari e no te karape; te Vaerua o te ako e no te mana; te Vaerua no te kite, e no te mataku ia Iehova.

3 E maata oki tona kite i te mataku ia Iehova; kare aia e akava ua i ta ona mata i akara ra, kare katoa e akatika ua i ta ona taringa i akarongo ra:

4 I te tuatua-tika ra ka akava mai ei aia i te aronga ao ra, e akatika oki aia ma te tuatua-tau, no te aronga maru o te enua nei: e ta aia i te enua nei i te rakau ra i tona vaa, e i te aʼo o tona vaa e tamate ei aia i te tangata kino:

5 E te tuatua tika ra, ko te tatua ïa o tona taukupu; e te tuatua-mou ra, ko tona ïa ruru manava.

6 Ei reira te luko e noo katoaʼi raua ko te punua mamoe; e te nemera e te punua puaka-nio, e kapiti katoa ïa ki te moe anga; e te punua puakatoro, e te liona ou, e te puakatoro angaiia ra, okotai rai kapiti anga mai; e na tetai tamaiti meangiti e arataki.

7 Te puakatoro ua ra e te daba tinana ra, okotai rai ïa one-kai; okotai rai moe anga to te anaunga: e kai oki te liona i te ngangaere mei te puakatoro katoa ra.

8 E kanga ua te tamaiti kai u ki te vaarua o te asepi, e ki runga i te koanga o te vipera ra e tuku ei te tamaiti i topa ake te au i tona rima.

9 Kare ratou e kanga, kare oki e mea e mate ei, i toku katoa nei maunga tapu: no te mea, ka ki te enua i te kite ia Iehova, mei te vairanga tai e ki i te tai ra.

10 E kia tae ki taua rā ra, ko taua aka o Iese ra tei tu ki runga ei reva no te tangata, te ka kimiia ïa e te pa enua: e kakā marie oki tona akaangaroianga ra.

11 E i te reira rā, e akatika akaou ei te Atu i tona rima e akaora i te toenga o tona iti-tangata, ko tei toe i Asura ra, e i Aiphiti, e i Patarosa, e i Kusa, e i Elama, e i Sinara, e i Hamata, e i te au enua o te moana ra.

12 E akatu aia i tetai reva ki runga no te pa enua ra, e e akaputuputu mai aia i to Iseraela i tuaruia ra, e kapiti mai oki to Iuda i akapueurikiriki keia ra, mei nga openga mai o te enua e a katoa ra.

13 E topa te vareae o Epheraima, e te au enemi i o Iuda e tipu keia: kare Epheraima e vareae ia Iuda, kare oki Iuda e riri ia Epheraima.

14 E rere ratou ki runga i te ua o te Philiseti ki te pae i te opunga o te rā ra; e pou katoa oki te au tamariki no te itinga o te rā ra ia ratou; e rave oki to ratou rima ia Edoma raua ko Moabi; e akarongo mai oki te tamariki a Amona ia ratou.

15 E akapou rava oki a Iehova i te arero i te tai i Aiphiti ra, e ruru katoa aia i tona rima ki runga i te vai ra i tana matangi viviki maata ra, e ka ta aia i te reira ra kia itu taʼeanga ra; e na runga uaorai ratou i te aere kare e mauu te vaevae.

16 E e vai ra te arataa tika no te toenga o tona ra au tangata, ko tei toe i Asura ra; mei to Iseraela i te rā i aere mai ei aia mei Aiphiti maira.