1 Ariki

2 TE VAITATA maira te rā e mate ei a Davida; e kua ikuiku atura aia i tana tamaiti ia Solomona, na ko atura,

2 Te aere nei au na te ara o to te ao katoa nei: e tenana, e akamaroiroi, e akatangata tikai koe;

3 E akono rai i te ikuiku a to Atua ra a Iehova, e aere na tona au arataa, e akono i tana au akonoanga, e tana au akauenga, e tana au tuatua-tau, e tana au tuatua-akakite, mei tei tataia i roto i te ture a Mose ra, kia manuia koe i taau katoa e rave ra, e te au ngai katoa taau e ariu ra:

4 Kia akatupu ravaia e Iehova tana tuatua i tuatua mai iaku ra, ka na ko mai ei ra e, Kia akono tikai taau au tamariki i to ratou aerenga, kia aere ratou na te tuatua-mou ki mua iaku nei, ma to ratou ngakau katoa, e ma to ratou vaerua katoa, kare koe e ngere i te tangata kia noo ki runga i te terono i Iseraela nei; (kua pera maira aia.)

5 Kua kite rai oki koe i ta Ioaba te tamaiti a Zeruia i rave iaku nei; tana oki i rave i nga rangatira toko rua o te nuku o Iseraela nei, ia Abenera te tamaiti a Nera ra, e ia Amasa te tamaiti a Ietera, i ta uaia e ia i te au tikai nei, kua taʼe iora te toto tamaki iaia, tuku iora aia i te toto tamaki ki runga i te tatua o tona taukupu, e i runga i nga tamaka nona i runga i ona vaevae.

6 E tenana, e akono koe i taau ravenga pakari, auraka oki tona mimiti inaina kia tae au ua atu ki te vaarua ra.

7 E akakite ra koe i te aroa ki te au tamariki a Barezilai i Gileada ra, ei roto katoa ratou i te aronga e kaikai i taau ra kaingakai: kua pera oki to ratou aere anga mai kiaku, ka oro ei au i to tuakana ia Abasaloma ra.

8 E i na, tena katoa oki a Simei te tamaiti a Gera, e ngati Beniamina i Bahurima, ko tei taumaa mai iaku ki te taumaa kino i te rā i riro ei au ki Mahanaima ra: kua aere maira aia kua aravei mai iaku i Ioridana, e kua taputou atura au kiaia ia Iehova, kua karanga atura au, Kare koe e tamate ravaia e au ki te koke.

9 E tenana, auraka aia kia noo tangata ara kore ua na: e tangata pakari oki koe, kua kite koe i taau e rave iaia ra; kia tae rai tona mimiti inaina ki te vaarua ma te toto.

10 Moe aturā Davida e tona ai metua katoa, e tanumia iora ki roto i te oire o Davida.

11 E to Davida au rā i te ariki anga i Iseraela ra, e a ïa ngauru anga i te mataiti: e itu ona mataiti i te ariki anga i Heberona, e toru ngauru e toru ara i te mataiti, i te ariki anga i Ierusalema.

12 E noo iorā Solomona ki runga i te terono o tona metua ra o Davida; e kua akamou ravaia tona ra au.

13 Kua aere mairā Adonia, te tamaiti a Hagita, ki te metua vaine o Solomona ra kia Bateseba. E kua karanga atura aia, I aere au mai ainei koe? Kua tuatua maira aia, E au.

14 Kua tuatua maira aia, E manga tuatua taku kia koe ra. Kua karanga atura aia, E tuatua ua mairai koe.

15 Kua tuatua maira aia, Kua kite oki koe e, tei iaku taua au nei, e kua akonoia au nei e Iseraela katoa e, ei iaku rai taua au ra: kua ruri keia ra taua au nei, e kua riro ki toku teina: nana rai oki na Iehova.

16 E teianei, okotai aku tuatua kia koe na, auraka koe e akakore mai. Kua karanga atura aia kiaia, E tuatua ua mairai koe.

17 E kua tuatua maira aia. E karanga atu koe ki te ariki ra kia Solomona, taku ïa tuatua kia koe, (kare oki aia e akakore mai i taau,) e o mai aia i te Sunami ra, ia Abisaga, ei vaine naku.

18 Kua karanga aturā Bateseba, Kua tika; e tuatua rai au i taau ra ki te ariki ra.

19 Aere aturā Bateseba ki te ariki ra kia Solomona, e tuatua kiaia i ta Adonia ra. Kua tu akera te ariki ki runga e aravei atu iaia, e kua tupou iora aia ki raro ki mua iaia, e kua noo rai ki runga i tona terono, e kua akaue i tetai nooanga kia tukuia mai no te metua vaine o te ariki ra; kua noo iora aia i tona rima katau.

20 Kua karanga atura aia, Okotai ua aku tuatua iti taku e pati ia koe; auraka koe e akakore mai. Kua tuatua maira te ariki kiaia, E tuatua mai, e taku metua: kare oki au e akakore atu i taau.

21 Kua karanga atura aia, E tuku koe i te Sunami ra ia Abisaga ki to tuakana ra kia Adonia, ei vaine nana.

22 Kua tuatua maira te ariki ra ko Solomona ki tona metua vaine, na ko maira, Eaa oki koe i pati mai ei i te Sunami ra ia Abisaga na Adonia? ka pati katoa mai nona i te au, e tuakana oki aia noku; nona oki, e no Abiatara taunga ra, e no Ioaba te tamaiti a Zeruia ra.

23 Kua taputou atura te ariki ra ko Solomona ia Iehova i reira, na ko atura, Kia mate aia i tuatuaʼi a Adonia i tenana tuatua, e kare ra, kia pera mai te Atua iaku nei, e kia maata mairai.

24 E teianei, te ora rā Iehova, tei akatinamou mai iaku nei, e kua tuku iaku ki runga i te terono o toku metua nei o Davida, e kua akonokono i tetai ngutuare noku, mei tana oki i tuatua maira, akonei a Adonia e mate ei.

25 Kua akaue atura te ariki ra ko Solomona ia Benaia te tamaiti a Iehoiada: kua ta atura aia iaia e mate rave akera.

26 Kua karanga atura te ariki kia Abiatara taunga ra, Ka aere ki Anatota, ki toou uaorai au kainga; e tau oki ia koe te mate: kare ra au e ta ia koe i teianei, no te mea kua apai koe i te aruna o te Atu o Iehova ki mua i toku metua ra ia Davida, e no te mea kua rokoia katoaia koe e te mate i te au mate katoa o toku metua ra.

27 Opara keia aturā Abiatara e Solomona, auraka aia ei taunga maata na Iehova: kia tupu te tuatua a Iehova, tana i tuatua i Silo, i te ngutuare o Eli ra.

28 Kua tae atura te rongo kia Ioaba: kua aru oki a Ioaba ia Adonia, kare ra aia i aru ia Abasaloma. Oro aturā Ioaba ki te Are o Iehova, e kua tāpu i nga tara o te atarau ra.

29 E kua akakiteia atura ki te ariki ra kia Solomona e, Kua oro a Ioaba ki roto i te Are o Iehova; e i na; tei te pae atarau ra aia. Kua tono akerā Solomona ia Benaia te tamaiti a Iehoiada, e kua karanga atura, Ka tiki ka ta.

30 E tae aturā Benaia ki te Are o Iehova ra, e kua karanga atura kiaia, Te na ko maira te ariki, E aere mai. Kua tuatua maira aia, Eiaa; ei ko nei au mate ei. Kua aere mairā Benaia, kua akakite maira ki te ariki, na ko maira, Kua pera mairā Ioaba, e kua na ko mai oki kiaku.

31 Kua karanga atura te ariki kiaia, E akapera i tana i tuatua maira, ei reira rai ta ai, ka rave ka tanu ei; kia mā ia koe te toto ara kore i maringi ia Ioaba, iaku nei, e te are katoa o toku metua.

32 E akaoki a Iehova i tona toto ki runga i tona uaorai mimiti, koia i ta i nga tangata toko rua, e puke tangata tuatua-tika e te meitaki maata i tona uaorai, i tei taia e ia ki te koke, kare toku metua ko Davida i kite, koia oki ko Abenera te tamaiti a Nera, te rangatira o te nuku o Iseraela ra, e ko Amasa te tamaiti a Ietera, te rangatira o te nuku o Iuda.

33 Kia oki mairai to raua toto ki runga i te mimiti o Ioaba, ki runga katoa i te mimiti o tona uanga e tuatau ua atu: kareka ki runga ia Davida, e tona ra uanga, e tona ra ngutuare, e tona ra terono, ei au ïa no ko mai ia Iehova ra e tuatau ua atu.

34 Kua aere aturā Benaia te tamaiti a Iehoiada ki runga, kua rave atura iaia, e kua ta iaia: e kua tanumia atura ki roto i tona uaorai are i te medebara ra.

35 Tupauia akerā Ioaba e te ariki ia Benaia te tamaiti a Iehoiada i runga i te nuku ra: tupauia akera oki a Abiatara e te ariki ia Zadoka taunga.

36 Kua tono atura te ariki e kua tiki ia Simei, e kua karanga atura kiaia, Ka akatu i tetai are noou i Ierusalema nei, ka noo ei i reira, e auraka e tomo ki vao i tetai ngai ke.

37 Ko te rā oki e aere ei koe ki vao, e kua topa ia koe te kauvai nei ko Kiderona, kia kite pu tikai koe e, ka mate rava koe ra: ei runga i toou uaorai mimiti toou ra toto.

38 Kua tuatua mairā Simei ki te ariki, E tika ïa taua tuatua ra; taau i tuatua mai na, e taku pu e te ariki, ka pera rai to tavini. Noo iorā Simei i Ierusalema e manganui akera te ra.

39 Kia ope ra nga mataiti e toru ra, kua oro atura nga tavini toko rua e Simei kia Akisa te tamaiti a Maaka ra, te ariki no Gata. I akakiteia mai a Simei, i tuatuaia mai, I na, tera nga tavini noou ra tei Gata.

40 Kua tu akerā Simei, e kua tuku akera i te nooanga ki runga i tana asini, aere atura ki Gata kia Akisa ra, e kimi i nga tavini nona: aere aturā Simei, e kua taoi maira nga tavini, mei Gata mai.

41 E akakiteia akerā Solomona, No ko a Simei i Gata mei Ierusalema atu nei, e kua oki mai.

42 Kua tono akera te ariki e tiki ia Simei, e kua karanga atura kiaia, Kare ainei au i akataputou atu ia koe ia Iehova, e kua akakite pu tikai au kia koe, ka na ko atu ei au ra e, Kia kite mai koe, ko te rā e riro ei koe ki vao, ka aaere ei koe ki tera ngai ki tera ngai, ka mate tikai koe ra? Ka tuatua mai ei koe ra e, Kua tika tena tuatua taku e akarongo nei.

43 Eaa oki koe i kore ei i akono i te taputou a Iehova, e te akauenga taku i akaue atu kia koe ra?

44 E kua karanga atu rai te ariki kia Simei, Kua kite oki koe i te au kino katoa, (to ngakau tei kite,) taau i tuatua ki toku metua ra kia Davida: te akaoki nei rai a Iehova i taua kino noou ra ki runga i toou na mimiti;

45 Ka ora rai oki te ariki ra ko Solomona, ka akatinamouia rai te terono o Davida ki mua i te aroaro o Iehova, e tuatau ua atu.

46 Kua akaue akera te ariki ia Benaia te tamaiti a Iehoiada; e aere atura ki vao, kua ta atura iaia, e mate rava akera. Kua akatinamouia akera te au i te rima o Solomona.