2 Ioane

1 TE orometua ra ko Ioane i te vaine i ikiia ra, e tana katoa au tamariki, ko taku e aroa i te tuatua-mou nei: kare ra ko au anake, ko te aronga katoa ra i kite i te tuatua-mou ra;

2 No te tuatua-mou e vai i roto ia tatou nei, e e vai rai i roto ia tatou e tuatau ua atu.

3 Ei ia kotou te aroa ua, te takinga-meitaki, e te au, no ko mai i te Atua Metua ra, e no te Atu ra oki no Iesu Mesia, i te Tamaiti a te Metua ra, i te tuatua-mou e te aroa.

4 E rekareka maata toku i toku kite anga atu i tetai aronga i taau tamariki i te akono anga i te tuatua-mou, mei te akauenga i rauka ia tatou no ko mai i te Metua ra.

5 E teianei, teia taku tuatua, e maine, kare mei te mea e te tata atu nei au i te akauenga ou ia koe na, ko tei rauka maira ia tatou mei muatangana mairai e, e aroa tatou ia tatou uaorai.

6 Teia oki taua aroa nei, kia akono tatou i tana au akauenga. Teia taua akauenga ra, mei ta kotou i akarongo mei muatangana maira, kia pera kotou i te aere.

7 Manganui oki te pikikaa i riro atura na te ao nei, ko tei kore e tuatua e, kua aere a tangata mai a Iesu Mesia. Ko taua pikikaa ra oki te reira, e Akakakore Mesia ïa.

8 E matakite ia kotou uaorai, kia kore tatou e ngere i tei raveia e tatou ra, kia rauka ra ia tatou te tutaki mou.

9 Ko tei rave i te ara ra, e kare i tāpu tamou tikai i te tuatua a te Mesia ra, kare iaia te Atua. Ko tei tāpu tamou tikai i te tuatua a te Mesia ra, tei iaia te Metua e te Tamaiti katoa oki.

10 Kia aere ua mai tetai tangata ia kotou na, e kare teia tana tuatua i apai mai, auraka e akatomo mai iaia ki roto i to kotou au are, auraka e karanga atu iaia e, Kia ora na i te aerenga:

11 Ko tei karanga atu oki iaia e, Kia ora na i te aerenga, kua kapiti atu ïa iaia i tana au tuatua kikino. 12 E manganui taku tuatua kia tata atu kia kotou na, kare ra au i anoano i te tata i te inika ki runga i te mea pepa; te manako nei ra au e aere ua atu kia kotou na, kia aravei ua ka tuatuaʼi, e kia tika rava to tatou rekareka anga.

13 Te aroa nei te au tamariki a to taeake ikiia nei ia koe na. Amene.