Mataio

27 E POPONGI akera, kua kimi iora te kau taunga nunui katoa ra, e te aronga pakari o te enua ra, i te tuatua ia Iesu e ta iaia;

2 E oti akera aia i te riia e ratou, kua arataki atura ratou iaia, e kua tuku atura i te tutara ra ia Ponotio Pilato.

3 E kite akerā Iuda i pikikaa iaia ra e, kua akaapaiā Iesu, kua tataraara iora, akaoki atura i nga moni e toru ngauru ra i te kau taunga nunui e te aronga pakari ra;

4 Na ko atura, Kua ara au, ko au i pikikaa atu i te tangata ara kore nei. Kua tuatua maira ratou, Eaa ua ta matou i tena? tei ia koe uaorai ïa.

5 Kua titiri iora aia i te au moni ki raro i roto i te nao, aere atura ki vao, akanonoa iora iaia uaorai.

6 Kua rave iora te kau taunga nunui ra i taua au moni ra, na ko akera, E oko toto teia, kare e tika i te ture kia tuku ki roto i te putunga moni tapu nei.

7 Kua kimi iora ratou i te tuatua, e kua oko atura i te kainga no te potera ra, ei tanumanga tangata ke ke.

8 I tapaiaʼi te reira kainga, E kainga toto, e tae roa akenei ki teianei rā.

9 Tika atura tei tuatuaia e Ieremia peroveta ra, tei na ko maira, “Kua rave iora ratou i nga moni e toru ngauru ra, ko te oko i akatauia ei oko iaia ra, ta te tamariki a Iseraela i akatau;

10 Ko tei taoiia ei oko i te kainga o te potera ra, ta Iehova oki i tuatua mai iaku ra.”

11 Kua tu aturā Iesu ki mua i te aroaro o te tutara ra: e kua ui maira te tutara iaia, na ko maira, Ko te ariki ainei koe no te ngati Iuda? Kua karanga aturā Iesu kiaia, Koia tika taau i tuatua mai na.

12 Kia tapepeia maira aia e te kau taunga nunui ra, e te aronga pakari ra, kare aia i karanga atu.

13 Kua tuatua mairā Pilato kiaia, Kare koe i akarongo i te au mea e manganui ta ratou i tapepe mai ia koe nei?

14 Kare ua ra aia i ki atu i taua tuatua ra; va ua atura te tutara.

15 E peu oki na te tutara e tuku i tetai tangata tapekaia kia tae ki taua oroa ra, ko te tangata ta te tangata tini e inangaro ra.

16 Te vai ra oki tetai tangata rongonui, kua tapekaia i reira, ko Baraba te ingoa.

17 E putuputu maira ratou, kua karanga aturā Pilato kia ratou, Koai taku e tuku atu ia kotou? ko Baraba aina? e ko Iesu aina, ko tei karangaia i te Mesia?

18 Kua kite oki aia e, no te vareae i tuku mai ei ratou iaia.

19 E te noo ra aia ki rungao i te akavaanga, kua tono maira tana vaine i te karere, e tuatua mai kiaia e, Auraka koe e rave atu i tenana tangata ara kore: e tumatetenga maata toku i te moemoea ioia i nakonei.

20 Kua ako atura te kau taunga nunui, e te aronga pakari, i te tangata tini, kia pati ratou ia Baraba kia taiā Iesu.

21 Kua tuatua maira te tutara kia ratou na ko maira, Ko teea i aua nga tangata toko rua nei taku e tuku ia kotou na? Kua karanga atura ratou, Ko Baraba.

22 Kua tuatua mairā Pilato kia ratou, Akapeea atu au ia Iesu, ko tei karangaia i te Mesia nei? Kua karanga atura ratou ravarai kiaia, Kia akasatauroia ïa.

23 Kua na ko maira te tutara, Eaa oki tana ara i rave? Kua maata ua atura to ratou kapiki, na ko atura, Kia akasatauroia aia.

24 E kite akerā Pilato, kare e tupu tana, i te mea kua maata ua maira to ratou māro, kua rave iora i te vai, kua orei iora i tona rima ki muao i taua aronga maata ra, na ko maira, Kare aku ara i te toto o teianei tangata tuatua-tika: ei ia kotou te reira.

25 Kua karanga atura te tangata ravarai, na ko atura, Ei rungao ia matou tona toto, e ei rungao i ta matou tamariki.

26 Kua tuku maira aia ia Baraba kia ratou; pāpāia iorā Iesu, e oti akera, kua tuku maira kia akasatauroia.

27 Kua arataki atura te au vaeau o te tutara ra ia Iesu, ki roto i te ngai akavaanga, e kua akaputuputu maira i te pupu vaeau katoa iaia.

28 Kua tatara iora ratou i tona kakau, e kua akakakau maira iaia ki te kakau kutekute.

29 Kua atu iora ratou i te pare rakau taratara, kua tuku maira ki rungao i tona mimiti, e tetai kakao i tona rima katau: tuturi iora ki muao iaia, e kua aviri ratou iaia, na ko maira, Kia ora na, e te Ariki o te ngati Iuda e!

30 Kua tutua maira i te uavare ki rungao iaia, rave maira i taua kakao ra, ta atura i tona mimiti.

31 E oti akera ta ratou aviri anga mai, kua tatara iora ratou i taua kakau ra, kua akakau iora iaia ki tona uaorai kakau, arataki atura iaia e akasatauro.

32 E te aere atura ratou ki vao ra, aravei atura ratou i tetai tangata Kurene, ko Simona te ingoa, kua akaue atura ratou iaia kia apai i te satauro.

33 E tae atura ratou ki te ngai i karangaia ko Golagota, koia oki e vairanga katu tangata,

34 Kua apai atura ratou i te wina i irokia ki te au iaia ra e inu; e kia timata ra aia, kare akera i inu.

35 E oti akera aia i te akasatauroia e ratou, kua tua kelero iora ratou i tona kakau, tupu atura i reira ta te peroveta i tuatua maira, “Kua tua iora ratou i toku kakau no ratou, e kua tua kelero oki ratou i toku pereue.”

36 Noo iora ratou ki raro, tiaki iora iaia.

37 Kua tuku atura ratou i te tapepeanga i tataia ra, ki rungao i tona mimiti, Ko IESU TEIA KO TE ARIKI O TE NGATI IUDA.

38 E ko e toko rua puke tangata keia tei akasatauro katoaia, tei te rima katau tetai, tei te rima kaui tetai.

39 E te aronga i aere na reirao, kua akakino maira, ma te takirikiri i to ratou mimiti,

40 Na ko maira, Ko tei vavaʼi i te nao e, e kua po toru anake kua akatu akaou, ka akaora ia koe uaorai: ko te Tamaiti a te Atua koe na, ka eke mai koe ki raro nei i tenana satauro.

41 Kua aviri katoa maira te kau taunga nunui, e te au tata tuatua, e te aronga pakari ra, na ko maira,

42 Kua akaora aia i etai ke ra; kare ra e tika kia akaora iaia uaorai. Ko te Ariki aia no Iseraela, ka eke mai aia i teianei mei runga i te satauro, e na matou e akarongo atu iaia.

43 I irinaki ana aia i te Atua; e te kite maira te Atua iaia, e akaora aia iaia i teianei: nana uaorai oki i karanga e, E Tamaiti au na te Atua.

44 Nga tangata keia oki i akasatauro katoaia ra, kua akapera katoa i te aviri anga mai iaia ra.

45 Kako rava akera taua enua ra i te poiri, mei te ora ono mairai, e tae ua atura ki te ora iva.

46 E tae akera ki te ora iva ra, kua kapiki aturā Iesu ma te reo maata, na ko atura. “Eli, Eli, lama sabatani?” teia oki te arite anga, “E taku Atua, e taku Atua, eaa koe i akaruke mai ei iaku?”

47 E kia akarongo tetai aronga i tu ua i reira i taua tuatua ra, kua na ko akera, Te kapiki nei teia tangata ia Elia.

48 Kua oro atura tetai i reira ra, rave atura i te rimu, akaki atura ki te vinega, topiri iora ki tetai kakao, apai atura kia inu aia.

49 Kua na ko akera tetai pae, Eiaa, e akara tatou ia Elia i te aere anga mai e akaora iaia.

50 Kua kapiki akaou aturā Iesu ma te reo maata, e kua tuku atura i te vaerua.

51 E i na, kua ngae iora te paruru o te nao ra, mei runga mai e raro rava; kua ngaruerue iora te enua, e ngaangaa atura oki te au mato:

52 Maēu akera te au vaarua turuma ra; e kua tu mai ki runga te kopapa o te aronga tapu i moe ra e manganui,

53 E kua aere maira ratou mei roto mai i te vaarua, i muri ake i tona tuakaouanga, e aere atura ki roto i te oire tapu, e kua kitea e te tangata e manganui.

54 E kite akera te rangatira anere, e ratou katoa i tiaki ia Iesu ra, i te ngaruerue anga o te enua, e te au mea i raveia ra, rokoia iora ratou e te mataku maata, kua na ko iora ratou, Ko te Tamaiti tikai teia a te Atua.

55 E manganui oki te vaine i reira, tei te atea ke i te akara anga mai, ko tei aru mai ia Iesu mei Galilea maira, e ko tei matuapuru mai iaia ra:

56 Tei ia ratou a Maria i Magadala, e ko Maria te metua vaine o Iakobo raua ko Iose ra, e te metua vaine oki o nga tamariki a Zebedaio ra.

57 E aiai iora, kua aere maira tetai tangata apinga no Arimatea, e pipi oki aia na Iesu, ko Iosepha te ingoa,

58 Aere atura aia kia Pilato, kua pati atura aia i te kopapa o Iesu. Kua akaue aturā Pilato kia tukuia mai te kopapa kiaia ra.

59 Kua rave aturā Iosepha i te kopapa, opa iora i te kakau orongā manea ra,

60 Kua tuku atura ki roto i tona uaorai tanumanga ou, i paoia e ia i roto i te mato; uri atura i tetai toka maata ki te ngutupa o taua tanumanga ra, aere atura.

61 I reira oki a Maria i Magadala, e tetai Maria oki, i te noo anga ki mua i taua tanumanga ra.

62 E popongi akera, i miringao i te rā akateateamamao anga, kua akaputuputu maira te kau taunga nunui ra, e te au Pharisea, kia Pilato ra,

63 Na ko maira, E te atu, te maara nei matou e, kua tuatua taua tangata pikikaa nei, i te ora anga ra e, E tu akaou au ki runga i te po toru.

64 E teianei e akaue ake koe, kia tapapaia te tanumanga, e kia po toru ake, ko te tiki mai aea tana au pipi e keia iaia i te po, ka karanga atu ei ki te tangata tini e, Kua tu akaou mai aia mei te mate maira: kino maata atura te reira pikikaa openga i tei muatangana ra.

65 Kua karanga aturā Pilato kia ratou, E tiaki oki to kotou; ka aere, e akamou tikai i taua tanumanga ra i ta kotou e anoano ra.

66 Aere atura ratou, akamou rava atura i taua tanumanga ra, akairo atura i te toka, e tuku atura i te tiaki.