Ebera

2 E TEIANEI, e tau ia tatou kia akamaata tikai i te akono i te au tuatua ta tatou i akarongo akenei, ko te topa ua aea ia tatou a muri ake.

2 E tuatua tinamou tikai tei tuatuaia mai e te au angela ra, e i tutaki naia te au ara e te akono kore katoa i te tutaki tika ra;

3 Eaa oki tatou e oraʼi, kia kore tatou e akono i te ora maata mei teianei; i tei tuatua mai anaia e te Atu i muatangana, e i akatinamouia mai ia tatou nei e te aronga i akarongo iaia;

4 Ko te Atua katoa oki i te akatika katoa anga mai i te au akairo, e te piri, e te ravenga mana e manganui te tu, e ta te Vaerua Tapu i oronga maira i tana uaorai i inangaro ra?

5 Kare oki aia i tuku i taua ao a muri nei, ta matou e tuatua nei, i raro ake i te au angela

6 Kua akakite maira rā Davida i tetai irava, na ko maira, “Eaa te tangata nei, i manako mai ei koe iaia, e ta te tangata nei tamaiti i akono mai ei koe iaia?

7 I raro iti ake aia i te au angela i te anga angaia e koe; kua akakorona koe iaia i te kakā e te mana, e kua akariro koe iaia ei tutara i te au angaanga a to rima na:

8 Kua tukuia e koe te au mea katoa nei i raro ake i ona vaevae.” E teianei, koia i tuku i te au mea katoa i raro ake iaia ra, kare rava ïa e mea i toe iaia i te tukuia ki raro ake iaia ra. Kare nei ra i te kitea anga ia tatou i teianei e, kua tukuia te au mea katoa ki raro ake iaia.

9 Te kite nei ra tatou ia Iesu, ko tei taakaakaia i raro iti ake i te au angela, kia mate aia ei oko i te tangata katoa, no te aroa ua o te Atua ra, i te akakorona angaia i te kakā e te mana, koia i akakoromaki i taua mate ra.

10 E mea tau oki iaia, nona te au mea katoa nei, e nana te au mea katoa nei i anga, i te arataki anga i te tamariki e manganui i te ao ra, kia akariro aia i te tumu o to ratou ora ei ora manea mou i tona uaorai mate.

11 Ko te Mesia oki ko tei akatapu mai e te aronga i akatapuia ra, okotai rai o ratou Metua; i kore ei aia i akama kia tuatua mai ia ratou e, e taeake, I te na ko anga e,

12 “E akakite au i to ingoa i toku ra au taeake, e akapaapaa au ia koe i roto i te ekalesia ra.”

13 E te na ko anga oki, “E irinaki au i runga iaia.” E kua na ko rai oki, “I na, ko au, e te au tamariki ta te Atua i oronga mai naku ra.”

14 E teianei, no te mea e kiko to te tamariki e te toto, kua rave katoa oki aia uaorai i te reira; kia na te mate aia i te akangere atu iaia nona te mate ra, koia oki te diabolo;

15 E kia akaora oki aia i te aronga i tuikaa i te mataku i te mate, e ope ua ake to ratou ora anga nei.

16 Kare rava aia i tāpu atu i te au angela; kua tāpu ra i te uanga o Aberahama.

17 I tikaʼi iaia kia akariroia mai mei tona au taeake te tu i te au mea katoa ra, kia riro aia ei taunga maata tuatua-mou e te aroa ua, i te au mea a te Atua ra, kia tatara aia i te ara a te tangata nei.

18 E koia uaorai oki i mate i te mea rokoia e te timataanga ra, e tika oki iaia kia tauturu mai i te aronga i timataia ra.