Numero

11 KUA urutoe iora ra te tangata, riri akerā Iehova; kua kite oki a Iehova, e tupu atura tona riri; kua ka akera te ai a Iehova i rotopu ia ratou, e pou iora tetai pae i taua puakapa ra.

2 Kua kapiki maira te tangata kia Mose; e kia pure a Mose kia Iehova ra, tamateia iora taua ai ra.

3 Tapa iora aia i te ingoa i taua ngai ra ia Tabera: no te mea kua ka te ai a Iehova i roto ia ratou ra.

4 E ko taua urupu tangata ke ke i roto ia ratou ra, riro rava atura ratou i te kaki nui: aue akaou atura oki te tamariki a Iseraela, e kua tuatua akera, Naringa e kiko ta tatou e! 5 Te manako nei oki tatou i te ika, ta tatou i kai ua i Aiphiti ra; e te kukuma, e te meleni, e te kesira, e te oniani, e te sumi:

6 Kareka i teianei kua marō ka ua tatou; kare rava o mua i to tatou aroaro, mari ra ko teianei māna.

7 Mei te ua rakau taua māna ra te tu, e mei te poe ra te tu kia akara. 8 Na te tangata i koi aere, e kua taviri ki roto i te tavirianga, e kare ra, kua reru ki roto i te rerunga, e kua tunu pani iora, e kua anga oki ei areto; e mei te inu ou ra te tu kia kai. 9 E kia topa mai te au ki runga i te puakapa i te po ra, kua topa katoa mai taua māna ra.

10 E kite akerā Mose e te aue ra te au tangata, i to ratou au kopu-tangata, ko te tangata ko tona uaorai ngutupa puakapa, e pini ua ake: e kua tupu maata oki te riri o Iehova ra; kua riri katoa iora oki a Mose.

11 Kua karanga aturā Mose kia Iehova, Eaa oki koe i tuku mai ei i te tumatetenga ki runga i to tavini nei? Eaa oki au i kore ei i kite aroaia mai e koe ra, i tuku mai ei koe i teianei teia, i teiaa katoa nei aronga tangata, ki runga iaku nei? 12 Naku katoa ainei teianei aronga? naku aina ratou i anau, i tuatua mai ei koe kiaku e, E apai koe ia ratou ki runga i to umauma, mei te ikiiki e apai i te kaiu ra, ki te enua taau i taputou atu ki to ratou ai metua? 13 Eiea taku kiko e raukaʼi kia apai atu na teianei aronga kia tu ratou? te aue tika mai nei oki ratou kiaku nei, te tuatua maira e, E o mai i te kiko na matou e kai.

14 Kare e maranga iaku i teia katoa nei au tangata ko au anake ra, e maata ua atu ïa i te teiaa.

15 E pera mairai koe iaku nei, kia mate roa au, ko taku ïa tuatua kia koe, peneiake te kite aroaia maira au e koe ra; kia kore oki au e kite i toku mate.

16 Kua tuatua mairā Iehova kia Mose i reira, Ka akaputuputu mai ana koe kiaku nei i te tangata kia itu ngauru no te aronga pakari i Iseraela nei, taau i kite ra, ei aronga pakari, e ei au tangata taoonga, no te au tangata nei, e e arataki mai koe ia ratou ki te Are uipaanga nei, ei reira ratou tu uaʼi e koe katoa ra.

17 Teia au ka eke atu ki raro na, e tuatua kia koe i reira; e rave oki au i ta te Vaerua i rungao ia koe, ka tuku ei ki runga ia ratou: e ei runga katoa ia ratou taua apainga ra o te au tangata nei, auraka ei runga ia koe anake ra.

18 E karanga atu koe ki te au tangata ra, E akatapu ana kotou ia kotou uaorai no apopo, kia kai kotou i te kiko; kua aue oki kotou e kua akarongo mai a Iehova, kua tuatua kotou e, Naringa e kiko ta tatou e! i meitaki oki tatou i Aiphiti ra; e teianei na Iehova e oronga mai i te kiko na kotou, kia kai kotou.

19 Kare ra i te rā okotai i te kainga anga, e nga rā katoa e rua ra, e nga rā e rima ra, e nga rā okotai ngauru ra, e nga rā okotai takau ra;

20 E mate ra te marama katoa, e ka mama mai ki vao i to kotou au putaiu, e ka iu rava atura kotou; ko kotou i akatokā ia Iehova i rotopu ia kotou na, e kua aue kotou ki mua i tona aroaro, e kua tuatua e, Eaa tatou i aere mai ei mei Aiphiti maira?

21 Kua karanga aturā Mose, Ko teia au tangata iaku nei, e ono ïa anere anga o te tausani tane tangata aere ua; e kua tuatua mai oki koe e, Naku e oronga atu i te kiko na ratou, kia kai ratou e kia mate ua atu te marama.

22 Kia ta katoaia aina te au mamoe e te au puakatoro katoa na ratou, e rava ainei? e kia akaope akeaia mai te au ika katoa o te tai ra na ratou, e rava ainei?

23 Kua tuatua mairā Iehova kia Mose, Kua poto aina te rima o Iehova? Ei teianei koe e kite ei i te tupu anga i taku i karanga atu kia koe na, e te kore anga.

24 Kua aere aturā Mose ki vao, kua akakite atura ki te au tangata i te tuatua a Iehova. E kua akaputuputu maira i te tangata e itu ngauru no roto i te au tangata pakari i taua aronga ra, e kua tuku iora ia ratou ki te pae Are e pini ua ake.

25 Kua eke mairā Iehova ki raro i na roto i te tumurangi, kua tuatua maira kiaia, kua rave iora i ta te Vaerua i rungao iaia ra, kua tuku atura ki taua aronga pakari ra e itu ngauru, e tei te iri anga te Vaerua ki rungao ia ratou ra, kua totou iora ratou, kare ra i pera akaou.

26 Kua toe ra toko rua puke tangata i roto i te puakapa, ko Eledada tetai te ingoa, ko Medada te ingoa o tetai: kua iri oki te Vaerua ki rungao ia raua, (kua tataia oki raua, kare ra raua i tae ki te Are,) e kua totou iora raua i roto i te puakapa ra.

27 Kua oro maira tetai tamaiti, kua akakite maira kia Mose, na ko maira, Te totou rā Eledada raua ko Medada i roto i te puakapa akera.

28 E kua tuatua mairā Iosua te tamaiti a Nuna, e tavini no Mose mei tona ou anga mai, na ko maira, E taku pu, e Mose, e akakore atu koe ia ratou.

29 Kua karanga aturā Mose kiaia, Te vareae ra koe iaku? ko toku ïa inangaro, ei peroveta ravarai to Iehova ra tangata e pini ua ake, e kia tuku a Iehova i tona Vaerua ki rungao ia ratou. 30 Kua aere aturā Mose ki roto i te puakapa, aia e te aronga pakari o Iseraela.

31 Kua tuku mairā Iehova i te matangi na tai mai, e na te reira i apai mai i te manu i taua puakapa ra, e mei te ngai e taea i te rā okotai kia aere, i tetai pae, e tetai pae, e pini ua ake taua puakapa ra, ki runga iti ake i te one ra, e tau paa ki nga kubiti e rua ra.

32 Po iora te reira rā, e ao akera oki te po, e po atura oki tetai rā, i te au tangata i te tu anga ki runga, e te rave anga i te manu: okotai ngauru ana komera i ki e mea ngiti roa ïa tana: e kua tauaki iora ratou e pini ua ake taua puakapa ra.

33 E te kai rai i te kai i to ratou vaa, kare rai i ngaua, kua tupu akera te riri o Iehova i taua au tangata ra, e kua ta iorā Iehova i taua au tangata ra i te mate maata roa. 34 I tapaiaʼi taua ngai ra i te ingoa ia Kiberota-hataava, no te mea i reira ta ratou tanu manga i te aronga i kaki.

35 Kua aere maira taua aronga ra mei Kiberota-hataava mai kia Hazerota; e kua noo iora ratou i Hazerota.