Deuteronomi

8 E AKONO meitaki kotou e e rave i te au akauenga ravarai taku e karanga atu kia koe i teianei rā, kia ora oki kotou, e kia maata, e kia tae kotou, e kia rauka te enua ta Iehova i taputou atu ki to kotou ai metua ra.

2 E akamaara oki koe i te arataa katoa ta to Atua ta Iehova i arataki ia koe na roto i te medebara ra, e a akenei ngauru anga i te mataiti, ei taakaaka anga ia koe, ei timata anga ia koe, e kia kitea i to roto i toou na ngakau, e taau akono anga i tana au akauenga, e te kore anga.

3 E kua taakaaka oki aia ia koe, kua vaoo ua ia koe kia pongi ua ana, e kua angai aia ia koe ki te māna kitea koreia e koe ra, kare katoa toou ai metua i kite: ei akakite ia koe e kare o te areto anake ra te mea e oraʼi te tangata nei, ko te au mea katoa ra no roto mai i te vaa o Iehova ra, e ora te tangata i te reira.

4 Kare rai oki toou kakau i runga ia koe ra i piro, kare oki to vaevae i ē, i teianei au mataiti e e a akenei ngauru anga;

5 Kia kite pu tikai oki koe i roto i toou ngakau; e mei te tangata e ako nei i tana tamariki, kua pera to Atua ra ko Iehova i te ako ia koe ra.

6 E teianei e akono koe i te au akauenga a to Atua ra ko Iehova, kia na tona arataa i te aere, e kia mataku oki koe iaia.

7 Te arataki nei oki to Atua ra ko Iehova ia koe ki te enua meitaki ra, ki te enua kauvai, te au punavai, e te vi roto ra, no uta i te o, e no roto i te maunga, i te pupui anga mai;

8 Ki te enua sitona, e te kerite, e te vine, e te suke, e te remuna; ki te enua inu olive, e te meli;

9 Ki te enua e kai uaʼi koe i te kai ma te onge kore, e kare e mea e toe ia koe; ki te enua e auri te toka ra, e ka rauka ia koe te veo i tona maunga kia ko.

10 Kia kaikai koe ra e kia merengo, e akameitaki koe i to Atua ra ia Iehova i reira, i taua enua meitaki ra tana i oronga mai noou ra.

11 Kia matakite, ko te ngaropoina aea ia koe to Atua ra ko Iehova, i te akono kore i tana au akauenga, e tana au tuatua-tau e tana au akonoanga, i taku i akaue atu kia koe i teianei rā;

12 Ko te kaikai aea koe e merengo iora, e kua akatu i te are memeitaki e kua noo i roto;

13 E kia maata oki taau au puakatoro e taau au mamoe; e kia maata oki taau ario, e taau auro, e kia maata oki taau apinga katoa ra;

14 Ko te teitei aea to ngakau na, ngaropoina iora to Atua ra ko Iehova, ko tei arataki mai ia koe mei te enua maira mei Aiphiti, mei te ngutuare i tuikaaʼi ra:

15 Ko tei arataki ia koe na roto i taua medebara maata mataku, i ki i te ovi ai ra e te sekopio, i te ngai papa marō ra e te vai kore; ko tei apai mai i te vai naau no roto i te toka tama ra;

16 Ko tei angai ia koe i te medebara ki te māna ra, kare i kitea e to ai metua ra, ei taakaaka anga ia koe, e ei timata anga ia koe, kia meitaki koe iaia a muri atu;

17 Ko te tuatua aea koe i roto i toou ngakau ra e, No toku uoarai ririnui, e toku uaorai maroiroi, i raukaʼi taku nei apinga maata.

18 E akamaara ra koe i to Atua ra ia Iehova: nana oki i oronga mai i toou maroiroi e raukaʼi taau apinga, kia akatinamou aia i tana koreromotu tana i taputou atu ki to ai metua ra, mei tei teianei rai oki rā.

19 Kia akangaropoina ua ra koe i toou Atua ra ia Iehova, e kia aru atu i tetai au atua ke ra, e kia araara ia ratou, kia tupou ki raro kia ratou ra, te akakite pu atu nei au kia kotou i teianei rā e, ka mate takiri rava kotou.

20 Mei te au etene ta Iehova e tamate rava nei ki mua i to kotou aroaro ra, mei te reira katoa to kotou mate anga; no te mea kare kotou i akarongo te reo o to kotou Atua ra ko Iehova.