Deuteronomi

31 AERE aturā Mose, karanga atura kia Iseraela ravarai i teianei au tuatua.

2 Na ko atura kia ratou, Okotai akenei oku anere e e rua ngauru i te mataiti i teianei rā; kare atura e tika iaku kia aere ki vao, e kia oki mai ki roto: e kua tuatua mai oki a Iehova kiaku e, Kare koe e tae ki tetai pae i teianei Ioridana.

3 Na to Atua na Iehova uaorai e na mua ia koe, e nana e akapou i taua au vaka tangata i mua ia koe ra, e ka riro to ratou ngai noou; e ko Iosua te ka aere na mua ia koe ra, i ta Iehova i tuatua maira.

4 E mei ta Iehova i rave i nga ariki o te ngati Amori ra ia Sihona raua ko Oga, ko tei pou iaia ra, e to raua ra enua, ka pera katoa aia ia ratou.

5 Ka tuku mai a Iehova ia ratou ki mua i to kotou mata, kia riro ta kotou rava ia ratou mei te au akauenga ravarai taku e akaue atu kia kotou na.

6 Kia ketaketa, e kia maroiroi roa, auraka e ngarangara, auraka rava e mataku ia ratou: ko to Atua oki ko Iehova, koia uaorai te aere katoa nei i vaitata ia koe; kare aia e akaruke ia koe, kare e taka ke ia koe.

7 Kua kapiki aturā Mose kia Iosua, kua karanga atura kiaia, ki mua i te mata o Iseraela ravarai, Kia matutu, e akamaroiroi; ko koe oki te ka arataki i teianei aronga, ki te enua ta Iehova i taputou mai ki to ratou ai metua, e oronga no ratou; e naau ratou e akanoo i reira.

8 Ko Iehova uaorai oki te na mua ia koe; ei vaitata uaorai aia ia koe, kare aia e akaruke ia koe, e kare e taka ke ia koe: auraka e ngarangara, auraka rava e mataku.

9 E kua tata a Mose i teianei ture, e kua tuku atura ki te kau taunga i te au tamariki a Levi, tei apai i te aruna koreromotu a Iehova ra, e ki te aronga pakari katoa o Iseraela.

10 Kua akaue aturā Mose kia ratou, na ko atura, Kia tae ki te openga o te mataiti itu ra, ki te uipaanga i te mataiti tukunga ra, i te oroa patia anga puakapa ra,

11 Kia tae katoatoa mai Iseraela ei akakite ia ratou uaorai ki mua i te aroaro o to Atua ra o Iehova, i te ngai i akonoia e ia ra, ka tatau ei koe i teianei ture ki mua i to Iseraela katoa ra, kia kite ratou.

12 E akaputuputu mai i te au tangata, i te tane, e te vaine, e te tamariki, e to tangata ke i roto i to au oire ra, kia akarongo ratou, e kia apii, e kia mataku i to kotou Atua ra ia Iehova, kia akamako, e kia rave oki i te au tuatua ravarai o teianei ture: 13 Kia akarongo katoa ta ratou au tamariki, kare i kite ra, kia apii, e kia mataku i to kotou Atua ra ia Iehova, i to kotou noo anga ki runga i te enua ta kotou e aere nei e noo i tetai pae Ioridana ra.

14 Kua tuatua mairā Iehova kia Mose, I na, kua vaitata te rā e mate ei koe ra: e karanga atu kia Iosua, e aere korua ki roto i te Are uipaanga tu ei, kia tuku atu au i tetai ako kiaia. Aere aturā Mose raua ko Iosua, tu ua iora raua i roto i te Are uipaanga ra.

15 Kua mama mairā Iehova i roto i te Are i roto i te pou tumurangi ra: tu ua iora taua pou tumurangi ra ki rungao i te ngutupa o te Are ra.

16 Kua tuatua mairā Iehova kia Mose, I na, ka moe koe ma to ai metua katoa; e tu mai teianei au tangata, e e akaturi ratou i te au atua ke no te enua ta ratou e aere nei, e e akaruke mai ratou iaku, e e akaatikau ratou i taku koreromotu i taku i papau kia ratou ra.

17 Ei reira e tupu ei toku riri ia ratou i te reira rā, e ka akaruke au ia ratou, e ka puroku au i taku mata ia ratou, e ka pou ratou, e ka rokoia ratou e te kino, e te tumatetenga e manganui; e ka riro ratou i te tuatua kia tae ki te reira tuatau e, Kare ainei no te mea, kare nei to tatou Atua i rotopu ia tatou nei, i rokoia mai ei tatou e teianei au kino?

18 Ka puroku tikai au i toku mata kia tae ki te reira rā, no te au kino ravarai i raveia e ratou, ratou i tatipake ki te au atua ke ra.

19 E teianei, ka tata i teianei peʼe na kotou, ka apii atu ei ki te tamariki a Iseraela: e tuku i te reira ki roto i to ratou vaa, kia riro teianei peʼe ei kite noku ki te tamariki a Iseraela ra.

20 Kia aratakiia oki ratou e au ki runga i te enua taku i taputou atu ki to ratou ai metua ra, e enua taʼe a vai ua te u e te meli ra; e kua kai anake ratou i te manga e kua merengo, e kua matu; ei reira ratou e ariu ke ei ki te au atua ke, e ka araaraʼi ia ratou, e akakoko mai ei iaku, e akaatikau oki i taku nei koreromotu.

21 E kia rokoia ratou e te kino e manganui, e te tumatetenga, na teianei peʼe e akaapa ia ratou mei te kite ra; kare oki te reira e topa i te vaa o to ratou uanga; kua kite oki au i to ratou au manako ta ratou e akakoro nei i teianei rai, kare rai ratou i apaiia e au ki runga i te enua taku i taputou ra.

22 Tata iorā Mose i taua peʼe nei i taua rā ra, e kua apii atura ki te tamariki a Iseraela.

23 Kua tuku maira aia i te ako kia Iosua te tamaiti a Nuna ra, na ko maira, Kia matutu, e e akamaroiroi; naau oki e kave i te tamariki a Iseraela ki runga i te enua taku i taputou atu kia ratou; e ei vaitata katoao au ia koe ra.

24 E oti akera te au tuatua i roto i teianei ture i te tataia e Mose ki roto i tetai buka, e ope ua akera,

25 Kua akaue aturā Mose i te ngati Levi i tei apai i te aruna koreromotu a Iehova ra, na ko atura,

26 E apai i teianei buka ture, e tuku ki te ape o te aruna koreromotu a to kotou Atua ra a Iehova, kia vai ua ana i reira, ei kite noku ia koe na.

27 Kua kite oki au i taau meameaau, e e kaki ketaketa toou; i na, ko au i te ora anga i rotopu ia kotou i teianei rā, e kua meameaau rai kotou ia Iehova; ka tangaʼi oki kia mate au ra?

28 Ka akaputuputu mai i te aronga pakari ravarai o to kotou na au kopu, e to kotou aronga rangatira ra, kia karanga atu au i teianei au tuatua i to ratou taringa, kia kapiki atu au i te rangi e te enua, ei kite ia ratou.

29 Kua kite oki au e, kia mate au ra, ka kino rava kotou, e ka akaruke kotou i te arataa taku i akaue ia kotou na; e ka rokoia kotou e te kino, kia tae ki te tuatau openga ra; no te mea ka rave rai kotou i te kino ki mua i te aroaro o Iehova, i te akakoko anga atu iaia kia riri, i ta to kotou rima e rave ra.

30 Kua karanga aturā Mose i te au tuatua i roto i teianei peʼe, i te taringa o te uipaanga ravarai o Iseraela, e ope rava akera.