Salamo
77 KUA kapiki toku reo i te Atua: toku reo tei kapiki i te Atua, e kua akarongo maira aia iaku.
2 I toku rā tumatetenga kua kimi au i te Atu; kare au i tukumoe i te akatika atu i toku rima kiaia i te po: kua kopae toku vaerua i te akapumaana.
3 Kua manako au i te Atua, e kua tumatetenga atura: kua aue oki au, e kua rere a mate ua toku vaerua. Sela.
4 Te tāpu ara ua nei koe i toku mata; te tumatetenga nei au, kare e tika kia tuatua.
5 Te manako nei au i te au rā taito; te au mataiti i muatangana ra:
6 Te maara nei au i taku imene i te po: te koreromoko nei au ki toku ngakau; e te akaeatu marie nei toku vaerua:
7 E akarukeia ainei au e te Atu, e tuatau ua atu? kare roa ainei aia e aroa akaou mai?
8 Kua kore roa ainei tona takinga-meitaki? kua kore ainei tana i tuatua ra e tae ua atu ki te au uki katoa ra?
9 Kua ngaropoina ainei to te Atua aroa? kua papani ainei aia i tona aroa i te riri? Sela.
10 Kua tuatua akera au, Ko toku aue anga teia; e taruri keia ra e te rima katau o Tei Teitei ra.
11 E akamaara ana au i te angaanga a Iehova: ka akamaara rai au i taau ra angaanga taka ke i taito ra.
12 Ka akamaaraara rai au i taau ra au angaanga katoa, ka tuatua rai au i taau i rave ra.
13 E te Atua e, tei te ngai-tapu toou ra arataa; koai te Atua e aite ki to tatou nei Atua i te maata?
14 E Atua ravenga taka ke rai koe: kua akakite koe i toou ra mana i te tangata nei.
15 Na to rima i akaora i toou ra au tangata, te au tamariki a Iakoba e Iosepha. Sela.
16 Kua akara te tai ia koe, e te Atua, kua akara te tai ia koe, kua rokoia e te mataku: koia ïa, kua ngarangara akera te moana.
17 Kua riringi maira te au tumurangi i te vai: kua kokina maira te au rangi: kua ana atu ana maira oki te au kakao naau ra!
18 I roto i te puaioio te aruru o taau ra mangungu! no te uira i māramaʼi te ao nei: ko te enua uaorai tei ngaueue, e kua rutetetete!
19 Ko te tai toou ra arataa, e te moana maata toou ra aerenga; kare ra toou takainga vaevae i kitea.
20 Kua arataki koe i toou iti-tangata mei te anana, i te rima o Mose raua ko Aarona.