Tito

3 E AKAKITE atu ia ratou e e kauraro marie i te ui ariki e te aronga mana, e akarongo i te aronga akava ra, e akatika i te au angaanga memeitaki ravarai,

2 Auraka rava e akakino atu i te tangata ravarai, eiaa ei tauetono, kia maru ra, e te akono i te mea maru i te tangata katoa ra.

3 E tu neneva rai oki to tatou i muatangana, i te akarongo kore, e vare ua, e tavini no te au inangaro tika kore e te navenave e manganui ra, e te noo ma te akamoupuku e te vareae, ma te makitakitaia mai e te makitakita atu tatou tatou uaorai.

4 Kia kitea mai nei ra te takinga-meitaki e te aroa o to tatou Ora ra o te Atua i te tangata nei,

5 Kua akaora aia ia tatou, eiaa no te tuatua-tika i raveia e tatou nei, no tona ra aroa i te orei anga i te anau anga ou ra, e te akaou anga a te Vaerua Tapu ra;

6 Ko tana i riringi maata mai ki runga ia tatou, no to tatou Ora no Iesu Mesia ra;

7 Kia riro tatou ko tei akatikaia mai e tona aroa ua, ei aronga tuanga i tei tiakiia ra no te ora mutu kore.

8 E tuatua-mou teia, e ko taku teia i anoano kia akakite ua koe auraka e tivata, kia akamaroiroi te aronga i akarongo i te Atua, kia rave tamou i te au angaanga memeitaki ra. Ko te mea meitaki oki te reira e meitaki ei oki te tangata nei.

9 Kareka te ui neneva ra, e te tuatua anau anga ra, e te māro, e te tamaki i te ture ra, eiaa takiri ïa; e mea puapinga kore ïa e te tumu kore oki.

10 Ko te tangata i akatupu i te tuatua tarevake ra, kua oti i te akoia atu, okotai atura ako anga e e rua oki, akataka ke atu ïa.

11 Kua kitea oki e kua piko ke te reira, kua ara ïa, kua akaapaia ïa e ia uaorai.

12 Kia tono atu au ia Aretema kia koe ra, e kare aia, ko Tukiko, e rapurapu mai koe i Nikopoli iaku nei; te akakoro nei oki au e ei reira au i teianei paroro.

13 E arataki meitaki mai ia Zena apii ture, e ia Apolo i to raua aerenga eiaa raua e ngere i tetai apinga mea ngiti.

14 E apii katoa to tatou i te rave i te au angaanga memeitaki, no te au mea e tau ei ra; kia kore oki ratou e riro mei te rakau ua kore.

15 Te aroa atu nei to vaitata iaku nei ia koe. E aroa atu i tei aroa mai ia tatou i te akarongo nei. Ei ia kotou ravarai te aroa ua. Amene.