Maseli

19 E MEITAKI to te ao tei aere ma te apa kore, i tei mingi tana tuatua, e tei neneva rai oki.

2 Kare oki te mea meitaki kia kore te vaerua e kite; ko tei rapurapu oki tona vaevae i te aere, kua ara ïa.

3 Na te neneva o te tangata i akamingi i tona aerenga; e kua riri iora tona ngakau ia Iehova.

4 E apinga maata ra, e manganui ïa i te taunga: e akarukeia ra te ao e tona ra tangata tupu.

5 Kare te kite pikikaa ra e ngere i te utunga; e tei tuatua i te tuatua pikikaa ra, kare ïa e ora.

6 E manganui tei aruaru kia kiteia mai e te ariki ra: e e taunga anake te tangata katoa nei no te tangata oronga.

7 Kare te au taeake ravarai o te ao e tau atu iaia; ka tanga atu ei ki tona au taunga, kare ainei ratou e akaatea ke atu iaia? e aru rai aia ia ratou ma te tuatua, kare ra ratou e akono mai.

8 Tei rauka iaia te pakari ra, kua aroa aia i tona uaorai vaerua: ko tei tāpu marie i te kite ra, ka rauka iaia te meitaki.

9 Kare te kite pikikaa ra e ngere i te utunga; e tei tuatua i te tuatua pikikaa ra, ka mate ïa.

10 Kare te taoiau e tau i te neneva; ka tanga atu ei ki te tavini kia tutara aia ki runga i te ui ariki ra.

11 Na te akono o te tangata i kore ei i riri vave; ko tona ïa kakā koia i akakore i te ara.

12 Mei te ngunguru o te liona te riri o te ariki: ko tona ra akaperepere, mei te au ïa i runga i te ngangaere.

13 Ko te tamaiti neneva ra, ko te tumatetenga ïa o tona metua tane, e te vaine rotoriri, e are tuturu ïa kare i tukumoe.

14 Te are e te apinga, e ipukarea ïa no ko mai i nga metua: kareka te vaine akono meitaki ra, no ko ïa ia Iehova ra.

15 Ko tei akatau ra, e rokoia e te moe tinainai; e te tangata maromaroā ra, ka mate ïa i te pongi.

16 Ko tei akono i te akauenga ra, kua akono ïa i tona uaorai vaerua: ko tei kore e mako i tona aerenga, ka mate ïa.

17 Ko tei aroa i te ao ra, kua oronga aia i te apinga na Iehova; e nana rai e tutaki mai iaia i taua mea ra.

18 E ako atu i to tamaiti koi vai ake te manako anga; e auraka to ngakau kia inangaro i tona mate.

19 Te tangata rotoriri maata ra, e mate ïa; kia akaora koe iaia, kia pera akaou rai koe e tikaʼi.

20 E akaronga i te ako, e āriki i te apii, kia pakari koe i toou openga.

21 E manganui te manako i roto i te ngakau o te tangata; ko te akakoro a Iehova ra te ka mou.

22 Ko te manea o te tangata ra, ko tona ia takinga-meitaki: e meitaki to te tangata putaua i te tangata pikikaa.

23 Ko tei mataku ia Iehova, no ratou te ora; ka vai merengo ua rai ratou; kare e rokoia e te kino.

24 E tuku te tangata akatau i tona rima ki roto i te kapu, kare ra e rave e akaoki ki tona vaa.

25 E pāpā i te akavaavaa, e pakari te kite kore i reira: e ako atu i te tangata kite ra, e rauka tona kite i reira.

26 Ko tei keia i ta te metua tane ra, e tei tuaru ke i te metua vaine, e tamaiti akatupu ïa i te akama e te akakino.

27 Ka oti ana, e taku tamaiti, i te akarongo i te apii e tatipake ei te tuatua kite.

28 E akavaavaa te kite tangata kino ra i te tuatua-tau: e te apuku ua ra te vaa o te tangata kino ra i te kino.

29 Te vaooia ra te utunga no te aronga akavaavaa, e te pāpā no te tua o te aronga neneva ra.