2 Korinetia

1 PAULO, e aposetolo na Iesu Mesia i te anoano o te Atua ra, e taku taeake nei ko Timoteo, i te ekalesia a te Atua i Korinetia na, e te aronga tapu katoa i Akaia e pini ua akera.

2 Ei ia kotou te aroa ua, e te au, no ko mai i te Atua i to tatou Metua ra, e no te Atu oki no Iesu Mesia.

3 Kia akameitakiia te Atua, te Metua o to tatou Atu ra o Iesu Mesia, te tumu o te aroa, e ko te Atua nona anake te pumaana;

4 Ko tei akapumaana mai ia matou i to matou au mate katoa nei, kia tika ia matou kia akapumaana i te aronga i rokoia e te mate ra, i te pumaana a te Atua i pumaanaʼi matou uaorai nei.

5 Mei to matou mate i te Mesia e maata nei, te maata katoa nei to matou pumaana i te Mesia.

6 E kia mate matou nei, ei pumaana ïa e ei ora no kotou, ko tei tupu i te akakoromaki marie anga i taua au mate, i mate katoaʼi matou nei; e kia akapumaanaia mai matou, ei pumaana ïa e ei ora no kotou.

7 E te tinamou nei to matou manako ia kotou, kua kite matou e rave katoa kotou i te pumaana, ko kotou i rave katoa i te mate nei.

8 Kare oki matou i inangaro, e te au taeake, e kia kore kotou e kite i to matou mate ka rokoia mai ei matou i Asia ra, e i romia uaia matou, kare atura e maroiroi, e kare rava matou i manako e e ora:

9 E manako mate to matou i roto ia matou uaorai, kia kore matou e irinaki kia matou uaorai, ki te Atua ra, i tei akatu i tei mate ra:

10 Ko tei akaora ia matou i taua mate maata ra, e te akaora ua nei rai oki; ko ta matou oki e irinaki nei e nana rai e akaora ia matou.

11 Ko kotou oki i te angaanga katoa anga i te pure ia matou, kia akameitaki te tangata ravarai e manganui i te Atua ia matou, i te meitaki i rauka ia matou i te tangata katoa e manganui ra.

12 Teia oki to matou rekareka anga, te kite o to matou uaorai akava-ngakau e, mei te tavaitai o te ngakau e te pikikaa kore i te Atua, (kare to te pakari o te kopapa, no te aroa ua ra o te Atua,) ta matou akono anga i teianei ao, e e maata atu rai ia kotou.

13 Kare a matou e tuatua ke ke kia tata atu kia kotou na, ko ta kotou rai oki e tatau ana, e ta kotou i akatika na; e te manako nei au e akatika ïa kotou e tae ua atu i te openga ra:

14 Kua akatika etai pae o kotou ia matou nei e, ko matou oki to kotou rekareka anga, mei ia kotou katoa oki e riro ei rekareka anga no matou, kia tae ki te rā o te Atu ra ko Iesu.

15 E no taua kite nei i anoano ei au i te aere atu kia kotou na i muatangana, kia papa rua atu to kotou meitaki;

16 E kia na ko na atu au kia kotou i te aere ki Makedonia, e mei Makedonia, kia oki mairai kia kotou na, e kia aratakiia e kotou i taku tere ki Iudea ra.

17 E taua akakoroanga oki naku ra, e tuatua māmā aina taku? e te au mea taku i akakoro nei, i akakoro aina au i tei tau i te kopapa ra, ka riro ei taku ei koia, koia, e kare, kare?

18 E tuatua-mou ra ta te Atua ra, e kare ïa ta matou tuatua i karanga atu kia kotou na i te koia e te kare.

19 Kare oki te Tamaiti a te Atua ra, ko Iesu Mesia, i tuatua aereia e matou, ko au e Siluano e Timoteo, ki o kotou na, i te koia e te kare, tei iaia ra te koia.

20 Te au mea katoa ta te Atua i tuatua mai, e koia anake ïa i roto iaia, e te tika tikai oki i roto iaia, kia kakā te Atua ia matou nei.

21 Ko te Atua oki tei akatinamou ia matou e ia kotou katoa i roto i te Mesia ra, e ko tei akamainu oki ia tatou nei:

22 Koia oki tei akairo mai ia tatou, e kua oronga mai i te ou ra i te Vaerua i roto i to tatou ngakau.

23 E teianei, e karanga atu au ki te Atua ei kite i taku vaerua nei e, i akaperepere au ia kotou i kore ei au i tae vave atu ki Korinetia na.

24 Kare ra mei te mea e ko matou te atu o to kotou akarongo, ei tauturu ra matou i to kotou rekareka: e mou akarongo oki to kotou.