Salamo

118 E AKAMEITAKI ia Iehova, e meitaki oki tona: ka tu oki tona aroa e rimua. 2 Kia pera Iseraela i teianei, ka tu oki tona aroa e rimua. 3 Kia pera te ngutuare o Aarona i teianei, ka tu oki tona aroa e rimua. 4 Kia pera te aronga i mataku ia Iehova i teianei, ka tu oki tona aroa e rimua. 5 Iaku i rokoia e te tumatetenga ra, kua kapiki au ia Iehova; kua akarongo mairā Iehova iaku, e kua tuku iaku i te ngai atea. 6 Tei iaku a Iehova, kare au e mataku; eaa ta te tangata kia rave mai iaku? 7 Tei iaku a Iehova ei tauturu iaku ra, ka kite au i te inga anga o te aronga i makitakita mai iaku ra. 8 E mea meitaki te irinaki ia Iehova, i te irinaki i te tangata nei. 9 E mea meitaki te irinaki i Iehova, i te irinaki i te ui ariki ra. 10 Kua akapini mai te au etene katoa iaku; no te ingoa ra o Iehova, pou iora ïa iaku. 11 Kua na rungao oki, e kua na rungao i te akapini iaku; no te ingoa ra o Iehova, pou iora ïa iaku. 12 Kua akapini mai ratou iaku mei te rango meli ra: mei te ai ngangaere ra, kare akera e mamia, mate iora: no te ingoa oki o Iehova, pou iora ïa iaku. 13 Kua turaki nui mai koe iaku kia inga au; na Iehova ra au i tupae mai. 14 Ko toku ïa maroiroi, e ko taku ïa imene, ko Iehova; kua riro mai oki aia ei ora noku. 15 Te reo rekareka e te ora tei te au puakapa o te aronga tuatua-tika ra: e ravenga maroiroi tei te rima katau o Iehova. 16 E teitei to te rima katau o Iehova: e ravenga maroiroi tei te rima katau o Iehova. 17 Kare au e mate; ka ora ra au, ka tuatua akaou rai au i te angaanga a Iehova. 18 Kua pāpā nui mairai a Iehova iaku nei, kare ra aia i tuku ua iaku no te mate. 19 Ka kiriti ana iaku i te au ngutupa tuatua-tika; ka tomo au na reira, e akameitaki au ia Iehova. 20 Ko te ngutupa teia no Iehova; e na reira te aronga tuatua-tika i te tomo. 21 E akametaki au ia koe; kua akarongo mai oki koe iaku, e kua riro koe ei ora noku. 22 Ko te toka i akarukeia e te aronga patu are ra, ko tei akariroia ei toka tiavā. 23 Ko ta Iehova teia i rave; e mea vavaria oki i mua i to tatou nei mata. 24 Ko te rā teia i akonoia e Iehova; ka rekareka tatou e ka pereperekavana i te reira ra. 25 Kia ora i teianei, e Iehova, te pati atu nei au; te pati atu nei au, e akamanuia mai i teianei, e Iehova e. 26 Kia ora aia ko tei aere mai ma te ingoa o Iehova: te akaora atu nei matou ia kotou mei roto atu i te are o Iehova. 27 Ko te Atua ra, ko Iehova ïa, ko tei akamārama mai ia tatou nei: ka tākai ana i te atinga ki te taura ki runga i te au tara o te atarau nei. 28 Ko taku Atua koe, ka akameitaki rai au ia koe; ko taku Atu, ka akateitei rai au ia koe. 29 E akameitaki ia Iehova; e meitaki oki tona; ka tu oki tona aroa e rimua.