Maseli

13 E AKONO te tamaiti pakari i te apii a te metua tane ra: kare ra te akavaavaa e akono i te ako.

2 E kai te tangata i te meitaki i te ua o te vaa: kareka te vaerua o te aronga rave ara ra, ko te takinga-kino ïa.

3 Ko tei tapapa i tona vaa, kua tiaki ïa i tona ora: ko tei amama ua ra i tona vaa, e mate tona.

4 Te inangaro ua ra te vaerua o te tangata moe ua, kare ra ana: kareka ko te vaerua o te akamaroiroi ra, ka akamatuia ïa.

5 Te tangata tuatua-tika ra, e riri aia i te tuatua pikikaa: e viivii ra to te tangata kino, e e riro ïa i te akama.

6 Ko te tuatua-tika te tāpu i te aronga apa kore i to ratou aerenga: e tatipokiia ra te rave ara e te kino.

7 Te pikikaa nei tetai mei te mea e tangata apinga, e kare ana: te akapeu putaua nei oki tetai, e te maata ra tana apinga.

8 Te oko e oraʼi te tangata nei, ko tona ïa apinga: kareka te tangata ao ra, kare ïa e kite i te akakino.

9 Te mārama o te aronga tuatua-tika ra, e rekareka ïa: kareka te lamepa o te aronga kino ra, ka tamateia ïa.

10 Ko te ngakau parau anake te mea e tupu ei te karo: kareka te aronga i akarongo i te ako ra, te reira te pakari.

11 Te apinga i rauka i te ravenga puaping kore ra, ka iti ïa: ko tei rauka ra i te rima opu tikai ra, ka maata ïa.

12 Kia tavareia te apinga tapapaia ra, e aati te manava: kia tupu ra te mea inangaroia ra, e tau ïa ki te rakau ora.

13 Ko tei akavaavaa i te tuatua ra, e akapouia ïa: ko tei mataku ra i te akauenga ra, ka tutakiia ïa.

14 Te ture a te aronga pakari, e tumu ïa no te ora: e akaariu ke atu ei i te ereere o te mate.

15 E akaperepereia mai te tuatua pakari meitaki ra; ko te aerenga ra o te aronga rave ara ra, e mea manamanata ïa.

16 E angaanga te tangata karape katoa ma te kite: kareka te neneva ra, e akapueu ïa i tana tuatua neneva.

17 E tupu te pekapeka i te karere tuatua kino ra: kareka te karere pikikaa kore ra, e tau ïa ki te ora.

18 Te putaua e te akama, tei te tangata kare e tika kia apiiia ra: ko tei akono i te ako ra, ka akangateiteiia ïa.

19 Te rauka anga mai i tei inangaroia ra, e mea venereka ïa i te ngakau nei: e te akaruke i te mea kino ra, e mea viivii ïa na te neneva.

20 Ko tei kapiti katoa i tona aerenga ki to te aronga pakari ra, ka pakari katoa ïa: ko tei kapiti ra ki te aronga neneva ra, e mate ïa.

21 Te arumaki nei te kino i te aronga rave ara: ko te meitaki ra te ka orongaia ki te aronga tuatua-tika ra.

22 Te vaooia nei te kainga o te tangata meitaki no te tamariki a te au tamariki ra: e te vaooia nei te apinga a te tangata ara na te aronga tuatua-tika.

23 Te kainga o te ao i tanumia ra, tei maata ïa i te kai: ko tetai pae ra, no te kite kore ra, tei rokoia e te kino.

24 Ko tei vaoo na i te pāpā ra, kua riri ïa i tana tamaiti: ko tei aroa na iaia, e ako ïa iaia i reira ra.

25 E kai te tangata tuatua-tika e kia pangia te kaki: e paeua ra te kopu o te aronga kino.