2 Ariki

8 I TUATUA anā Elisaia ki taua vaine ra tana i akaora i te tamaiti ra, karanga atura, Ka tu, ka aere, ko koe e toou ra ngutuare, ka noo atu ei i taau ngai e rauka i te noo: e onge oki teia i tuatuaia e Iehova; te ka tae oki ki runga i te enua nei e itu ïa mataiti.

2 Kua tu akera taua vaine ra, e kua akono atura i ta te tangata o te Atua i tuatua maira: aere atura oki aia e tona ngutuare katoa, noo atura ki o te Philiseti e itu akera mataiti.

3 E ope akera aua nga mataiti e itu ra, kua oki maira taua vaine ra mei te enua mai o te Philiseti ra: i aere aia e pati i tona kainga e tona are i te ariki ra.

4 Te karangaranga ua ra te ariki ki te tavini o te tangata o te Atua ra kia Gehazi, te tuatua ra, E akakite mai ana koe i te au mea mamaata ravarai ta Elisaia i rave ra.

5 Te akakite ra aia ki te ariki i te tangata mate i akaoraia e ia, e i na, te aere maira taua vaine nana te tamaiti i akaoraia e ia ra, e pati i te ariki i tona are e te kainga katoa nona. Kua tuatua mairā Gehazi, E taku pu e te ariki, teia taua vaine ra, e teia oki te tamaiti ta Elisaia i akaora ra.

6 Kua ui atura taua ariki ra ki te vaine, e kua akakite maira oki aia. Kua akono atura te ariki i tetai tangata taoonga, karanga atura, E akaoki mai koe i tana auraka kia toe, e tei uaia e taua kainga ra mei te rā mai i akaruke mai ei aia i te enua nei e teia noaʼi.

7 Aere aturā Elisaia ki Damaseko; te mate ra te ariki o Arama ra ko Bene-adada i te maki; e tuatuaia atura aia, na koia atura, Teia mai nei te tangata no te Atura ra.

8 Kua karanga atura te ariki kia Hazaela, E rave ana koe i tetai apinga i to rima na, e aere, e aravei atu i te tangata no te Atua ra, ka ui ei kiaia i te tuatua a Iehova, e karanga atu, Ka ora ainei au i teianei maki?

9 Kua aere aturā Hazaela e aravei iaia, e kua apai katoa i tetai taoonga-rima i te au mea memeitaki katoa i Damaseko ra, e a ngauru i te kamela i te apai anga, e kua aere maira, kua tu ua maira ki mua iaia, e kua tuatua maira, Ko to tamaiti ra ko Bene-adada ariki o Arama nei, tei tono mai iaku kia koe nei, te na ko maira, Ka ora ainei au i teianei maki?

10 Kua karanga aturā Elisaia kiaia, E aere, e karanga atu kiaia, Ka ora tika rai oki koe; kua akakite mairā Iehova kiaku ka mate tikai ra aia.

11 Kua akara atura aia i tona mata, tamou atura i te akara, e kua akama ua atura aia, kua aue iora taua tangata o te Atua ra.

12 Kua tuatua mairā Hazaela, Eaa oki koe i aue ei, e taku pu? Kua karanga atura aia, No te mea kua kite au i te kino taau e ka rave i te tamariki a Iseraela nei: to ratou au punanga etaeta ka ka ïa ia koe ki te ai, e to ratou au tangata ou ra ka taia ïa e koe ki te koke; e ta ratou au tamariki ka pāpāia ïa e koe e kia ungaungātiti rava, e ta ratou au vaine nui ra ka tuaki naia e koe ra.

13 Kua tuatua mairā Hazaela, Eaa to tavini, i te puaka aoa nei, e tikaʼi kia rave aia i tenana mea maata? Kua karanga aturā Elisaia, Kua akakite mai a Iehova kiaku e, e ariki koe no Arama nei.

14 Akaruke maira aia ia Elisaia, aere atura ki tona ra pu; ko tei tuatua mai kiaia e, I peea mai a Elisaia kia koe? Kua karanga atura aia, I tuatua mai aia kiaku e, ka ora tikai ïa koe

15 Kia ao akera kua rave iora aia i te kakau patapatatue, kua takū ki raro i te vai, e kua oora akera ki runga i tona mata, mate iora aia: riro akera te au kia Hazaela ei tupau iaia.

16 E tae akera ki te rima o te mataiti o Iorama te tamaiti a Ahaba ariki o Iseraela, ko Iehosaphata te ariki o Iuda i reira, i ariki ei a Iehorama te tamaiti a Iehosaphata ariki no Iuda.

17 Kua tae aia ki te toru ngauru ma rua o tona ra mataiti i ariki ei aia; e varu akera ona mataiti i te ariki anga i Ierusalema.

18 Aere atura aia na te arataa o te ui ariki o Iseraela, mei to te ngutuare o Ahaba: te tamaine oki a Ahaba tana vaine: i rave ua ra aia i te kino i mua i te aroaro o Iehova.

19 Kare rai a Iehova i akapou ia Iuda no tona tavini no Davida, tana oki i tuatua mai kiaia ra e, e oronga mai i tetai lamepa kia vai rai nana, e na tana tamariki.

20 Tei tona au rā to Edoma kaitamaki anga i te rima o Iuda, e kua akaariki i tetai ariki no ratou uaorai.

21 Aere aturā Iehorama ki Zaira, e te au kariota katoa ki ona ra: e kua tu akera aia i te po, ta iora i to Edoma i akapini mai iaia, e te au rangatira o te au kariota: oro atura te au tangata ki to ratou au puakapa.

22 Kaitamaki rai Edoma i te rima o Iuda e tae rava akenei ki teianei rā. Kua kaitamaki katoa Libena i te reira tuatau.

23 E te toenga o te tuatua ia Iehorama, e tana katoa i rave ra, kare ainei kua tataia ki roto i te buka, te tuatua no te au rā o te au ariki o Iuda?

24 Moe iorā Iehorama ki o tona ai metua, e tanumia iora ki o tona ai metua rai i te oire o Davida: tupauia akera i te au e te tamaiti nana e Ahazia.

25 Tei te ngauru ma rua o te mataiti o Iorama, te tamaiti a Ahaba ariki o Iseraela, i ariki ei a Ahazia, te tamaiti a Iehorama, no Iuda.

26 Tei te mataiti tai takau ma rua to Ahazia i ariki ei aia: okotai ona mataiti i te ariki anga i Ierusalema. Ko Atalia te ingoa o tona metua vaine, e utaro na te ariki o Iseraela na Omeri.

27 Aere atura oki aia na te arataa o te ngutuare o Ahaba, e kua rave i te kino i mua i te aroaro o Iehova, mei te ngatuare o Ahaba: no te ngutuare aia no Ahaba, e unonga oki aia nona.

28 Kua kapiti katoa aia ia Iorama, te tamaiti a Ahaba, i te tamaki i te ariki o Arama ia Hazaela, i Ramota-gileada: puta iorā Iorama i to Arama ra.

29 Kua oki iora taua ariki ra ko Iorama ki Iezereela, kia akaoraia te au puta i putaʼi aia i to Arama i Rama, ka tamaki ei aia i te ariki o Arama ia Hazaela. Kua aere iorā Ahazia te tamaiti a Iehorama ariki no Iuda, e akara ia Iorama te tamaiti a Ahaba i Iezereela, no te mea kua makiia aia.