Ezekiela

11 Kua akatu akera te Vaerua iaku ki runga, e kua arataki maira iaku ki te ngutupa ki te pae i te itinga o te rā i te are o Iehova, tei anga ki te pae i te itinga o te rā ra; e i na, tei te pa o taua ngutupa ra nga tangata okotai takau ma rima; e kua kite katoa au ia Iaazania, te tamaiti a Azura, i rotopu ia ratou, e ko Pelatia, te tamaiti a Benaia, e ui ariki ïa ki o te au tangata ra.

2 Kua tuatua maira aia kiaku i reira, E te tamaiti a te tangata ua, ko te au tangata teia i kimi i te kino ra, e ko tei ako i teianei oire i te tuatua kino:

3 Ko tei karanga e, Kare i vaitata; tatou e patu i te are: ko teianei oire, ko te pani ïa, ko tatou ra te manga.

4 E tenana, ka totou atu koe kia ratou, totou, e te tamaiti a te tangata na.

5 Kua topa maira te Vaerua o Iehova ki runga iaku, e kua tuatua maira kiaku, Ka tuatua; Te na ko mairā Iehova; Kua na ko oki kotou, e te ngutuare o Iseraela: kua kite oki au i te au mea i tupu i roto i to kotou manako, kare e toe.

6 Kua akamaata kotou i to kotou aronga i taia i teianei oire, e kua akaki kotou i tona au arataa ki te aronga taia.

7 E teianei, te na ko maira te Atu ra ko Iehova; To kotou aronga i taia i vaooia e kotou i rotopu iora, ko ratou te manga, e teianei oire te pani; e arataki ra au ia kotou ki vao mei rotopu mai i te reira ra.

8 I mataku ana oki kotou i te koke; e ei koke taku e apai mai ki runga ia kotou, te tuatua maira te Atu ra ko Iehova.

9 Naku kotou e arataki mai ki vao mei rotopu mai i te reira ra, ka tuku atu ei ia kotou ki te rima o te tangata ke ke ra, e e tuku atu au i te utunga ki runga ia kotou na.

10 Ka inga kotou i te koke; ei te matamata o Iseraela au e akava atu ei ia kotou; e kite oki kotou e ko Iehova au.

11 Kare teianei oire e riro ei pani na kotou, kare oki kotou e riro ei manga i roto ra; ei te matamata o Iseraela au e akava atu ei ia kotou:

12 E kite oki kotou e ko Iehova au: no te mea kare kotou i aaere na taku nei au akonoanga, e kare oki i rave i taku au tuatua-tau, kua rave ra i ta te au etene ra au peu e akapini mai ia kotou nei.

13 E kia totou iora au ra, mate iorā Pelatia te tamaiti a Benaia. Tipapa iora au ki raro taku mata, e kua kapiki atura au ma te reo maata, e kua na ko atura, Aue, e te Atu, e Iehova! e akaope takiri ainei koe i te toenga o Iseraela nei?

14 Kua tae maira oki te tuatua a Iehova kiaku nei, na ko maira,

15 E te tamaiti a te tangata na, to au taeake, to au taeake kopu-tangata ra, e te ngutuare katoatoa o Iseraela e ope rava ake, ko tei tuatuaia mai ïa e to Ierusalema, Kia atea ke atu kotou ia Iehova nei; kua orongaia mai teianei enua no matou ei nooanga.

16 E tenana, e karanga atu e, Te na ko maira te Atu ra ko Iehova; Akaruke ke ua atu rai au ia ratou i roto i te au etene ra, akapueurikiriki ke ua atu rai au ia ratou i roto i te au enua ra, e riro oki au ei ngai-tapu iti no ratou ra, i taua au enua ra ta ratou e aere ra.

17 E tenana, e karanga atu, Te na ko maira te Atu ra ko Iehova: Naku kotou e akaputuputu mai mei roto i te au tangata ra, e e akakatoatoa mai ia kotou mei roto i te au enua i pueurikiriki ke ei kotou ra, e naku e oronga atu i te enua o Iseraela ia kotou.

18 E e aere mai ratou ki reira, e na ratou e apai ke atu i tona au mea kino ravarai i reira, e tona au mea viivii ravarai i reira.

19 E naku e oronga atu i te ngakau okotai no ratou, e naku e tuku i te vaerua ou ki roto ia kotou, e naku e kiriti i te ngakau toka i roto ia ratou, e naku e oronga atu i te ngakau maru ia ratou:

20 Kia aaere ratou na taku nei au akonoanga, e kia akono i taku nei au tuatua-tau, ka rave ei: e ei tangata ratou noku, e ei Atua au no ratou.

21 Kareka ko tei aru aere to ratou ngakau i te ngakau o to ratou au mea kino ra, e ta ratou au mea viivii ra, e tutaki atu au i to ratou aerenga ki runga i to ratou uaorai mimiti, te tuatua maira te Atu ra ko Iehova.

22 Kua akateitei akera nga kerubi i to ratou au peau i reira, e te au porotata i vaitatao ia ratou; e tei runga ake te kakā o te Atua o Iseraela ia ratou ra.

23 Riro atura te kakā o Iehova mei rotopu atu i te oire ra, e kua tu ua iora ki runga i te maunga i te pae i te itinga o te rā i taua oire ra.

24 E kua rave maira te Vaerua iaku ki runga, e kua apai iaku ki te enua o te Kaledea, ki te aronga tuikaa ra, i roto i te orama o te Vaerua o te Atua ra. Riro atura taua orama i kitea e au ra ki runga.

25 Kua akakite atura au ki te aronga tuikaa ra i te au tuatua katoa ta Iehova i akakite mai iaku ra.