Salamo
71 TE irinaki nei au ia koe, e Iehova, auraka au kia rokoia e te akama e tuatau ua atu.
2 E akaora koe iaku i te tuatua-tika naau kia ora; e ariu mai koe i to taringa, kia ora au.
3 Ei punanga etaeta koe noku, kia oro tamou rai au ki reira: i akaue ana koe kia akaoraia au; ko toku mato e toku akapuanga oki koe.
4 E akaora koe iaku, e te Atua, i te rima o te tangata kino, i te rima o te tangata tuatua-tika kore e te takinga-kino.
5 Ko koe toku manako anga, e taku Atu; toku irinaki anga, e Iehova, mei toku ou anga mairai.
6 I mouria ana au e koe mei te kopu mai: naau i rave iaku mei roto mai i te kopu o toku metua vaine ra: ka tamou rai au i te akameitaki ia koe.
7 Kua riro au ei vavaranga na te tangata e manganui: ko toku punanga etaeta ra koe.
8 Kia ki oki toku vaa i te akameitaki ia koe, i te akateitei ia koe, e po ua atu te rā.
9 Auraka e akaruke iaku i te ruaine anga ra: me paruparu au ra, auraka e taka ke iaku.
10 Te tuatua nei oki toku au enemi iaku; e te uruoa nei te aronga i kimi mai iaku kia mate.
11 Te tuatua ra ratou, Kua akarukeia aia e te Atua; e aruaru, e rave iaia, kare oki e akaora.
12 E te Atua e, auraka koe e akamamao ke atu iaku; e taku Atua, kia ngakoikoi i te tauturu iaku.
13 Te au enemi i toku nei vaerua kia akama, kia pou; kia vaîia ki te akakino e te akama, tei kimi i toku nei kino.
14 Ka manako rai au ia koe, kare e tukumoe, kia akameitaki rai au ia koe na rungao na rungao.
15 Na toku vaa e akakite i te tuatua-tika naau, te ora naau, e po ua atu te rā: kare ra e tika iaku kia tatau i te maata.
16 Ka tamou rai au i te aere i te maroiroi oou, e te Atu ra, e Iehova! ka akakite au i taau tuatua-tika, taau anake ra.
17 Naau, e te Atua, i apii mai iaku mei toku ou anga mai: e kua akakite au i taau ra au angaanga i umereia e teia noaʼi.
18 Me ruaine oki au, e me inaina toku mimiti, e te Atua e, auraka koe e akaruke mai iaku, kia akakite rai au i toou ra mana ki teianei uki; to ririnui ki te tangata ravarai te ka aere mai.
19 Kua teitei roa oki te tuatua-tika naau, e te Atua, e tei rave i te au angaanga maata; e te Atua e, koai tei aite ia koe?
20 I akakite ua mairai koe iaku i te au tumatetenga e manganui, e te maata; ka akaora akaou mairai oki koe iaku, e ka akatu akaou mairai koe iaku mei te au ngai oonu o te enua ra.
21 Ka riro koe i te akamaata mairai i taua maata noku nei, e akapumaana mairai koe iaku e pini ua ake.
22 Ka akameitaki rai au i te tuatua-mou naau ma te nabala; ka imene au ia koe, e taku Atua, ma te kinura, e Tei Tapu i Iseraela nei e.
23 Ka rekareka toku vaa, me imene au ia koe ra; e taku vaerua, i akaoraia e koe ra.
24 Ka tuatua toku vaa i te tuatua-tika naau e po ua atu te rā; kua akama oki, kua raungara oki, te aronga i kimi i toku nei kino.