Isaia

2 TE TUATUA ta Isaia, te tamaiti a Amoza ra, i kite, ia Iuda, e Ierusalema.

2 E riro kia tae ki te au rā openga ra, e akatinamouiaʼi te maunga ra o te are o Iehova ki runga i te take o te au maunga ra; e akateiteiia ïa ki rungao i te au tuaivi ra; e putuputu ua mairai te au etene katoa ra ki reira.

3 E manganui te tangata e aere ma te tuatua e, Aere mai, ka aere tatou ki runga i te maunga o Iehova, ki te are o te Atua o Iakoba; e nana e apii mai ia tatou i tona au aerenga; e ka aere tatou na tona ra au arataa. I na Ziona atu oki te ture i te riro anga atu, e te tuatua a Iehova, i na Ierusalema atu ïa.

4 Nana e akava i rotopu i te au etene, e e akataka i te tuatua i rotopu i te tangata katoa e manganui; e tupaki oki ratou i ta ratou au koke ei auri arote, e ta ratou au korare ra, ei tipi tope ïa: kare tetai enua e tamaki mai ki tetai enua i te koke, kare oki ratou e apii akaou i te tamaki.

5 E te ngutuare o Iakoba e! e aere mai kotou, taki aere tatou na te mārama o Iehova.

6 Kua akaruke tikai koe i toou au tangata, i te ngutuare o Iakoba, no te mea kua ki ratou i te au peu no te itinga o te rā mai; e i te au purepure, mei to te Philiseti ra; e kua akaaiteite ratou i te tuatua i te tamariki tangata ke ke ra.

7 Kua ki oki to ratou enua i te ario e te auro: kare oki e ope ta ratou au apinga; e kua ki oki to ratou enua i te oroenua kare rai oki e ope ta ratou au kariota.

8 Kua ki oki to ratou enua i te idolo; kua akamori ratou i te angaanga a to ratou uaorai rima, i ta to ratou uaorai maikao-rima i anga.

9 E kua tupou te tangata rikiriki ki raro; e kua taakaaka te tangata taoiau iaia uaorai; kare koe e akakore i ta ratou ara.

10 Ka aere ki roto i te mato, ka pipini atu ei koe ki raro i te one pueu, i te mataku ia Iehova, e i te kakā o tona tapunui.

11 Te mata teitei o te tangata nei, e taakaakaia ïa, e te teitei o te tangata nei, e tukuia ïa ki raro, e ko Iehova anake ra te ka akateiteiia i te reira rā.

12 E rā oki to Iehova Sabaota, kare ïa e tau i tei parau e tei teitei; e te au mea katoa i akateiteiia, e tuku akaakaia ïa ki raro.

13 E kare e tau i te au arezi i Lebanona, i te roroa e tei akateiteiia ra; e kare e tau i te au ale o Basana ra.

14 E kare e tau i te au maunga teitei, e kare e tau i te au tuaivi tei teitei ra.

15 E kare e tau i te au punanga i akateiteiia ra, e kare e tau i te au patu i akaketakateia ra.

16 E kare e tau i te au pai i Taresisa, e kare e tau i te au angaanga manea i inangaroia ra.

17 E tukuia te parau o te tangata ra ki raro, e te teitei o te tangata ra, e taakaakaia ïa; e ko Iehova anake ra te ka akateiteiia i te reira rā.

18 E te au idolo ra, e ngaro ke roa ïa iaia.

19 E ka aere oki ratou ki roto i te au anaanā mato ra, e ki roto i te au vaarua o te enua nei, no te mataku ia Iehova, e te kakā o tona ra tapunui, kia tu mai aia e akaruketekete i te enua nei i te mataku.

20 E kia tae i te reira rā, e titiri ei te tangata i tona au idolo ario, e tona au idolo auro, tana uaorai i anga ei akamori anga nona uaorai, na te kiore e na te moa kirikiri;

21 Ka aere ei ki roto i te au akapi mato, e ki roto i te ruarua mato ra; no te mataku ia Iehova, e i te kakā o tona ra tapunui, kia tu mai aia e akaruketekete i te enua nei i te mataku.

22 Kua oti ana i te irinaki ki te tangata, tei te ruaputaiu oki tona aʼo: eaa oki aia ka manakoia atu ei?