Salamo

94 E TE Atua ra, e Iehova, ko tei akaoko ra, e te Atua, ko tei akaoko ra, e akakakā mai.

2 E aere koe ki runga, e te akava o te enua nei: e tuku mai i te tutaki ki tei nengonengo ra.

3 E Iehova, mei te aa te roa o to te tangata kikino, mei te aa te roa o to te tangata kikino akateitei?

4 E tuatua ua ainei ratou, e akakite ua ainei, i te tuatua ketaketa? ka ope ainei te aronga tuatua kikino ra i te akatietie ua ana?

5 Ko toou uaorai au tangata, e Iehova, ta ratou e tinaimate nei; e te takinga-kino nei i taau ra tuanga.

6 Te ta rava nei ratou i te vaine takaua e te tangata ke, e te tamate takiri nei ratou i te aronga matiroeroe,

7 E te tuatua nei ratou, Kare a Iehova e akara mai; kare te Atua o Iakoba e akono mai.

8 Kia kite mai kotou, e tei maata i te kite kore i te tangata nei; ko kotou oki, e te au neneva na, aea kotou e kite ei?

9 Kare ainei tei anga i te taringa nei e akarongo? kare ainei tei anga i te mata nei e akara?

10 Ko tei pāpā i te au etene ra, kare ainei e ake mai? ko tei akakite i te tangata nei i te karape, kare ainei e kite?

11 Te kite nei a Iehova i te au manako o te tangata nei e, e mea puapinga kore anake ïa.

12 E ao to te tangata, taau i ako, e Iehova, taau i apii i roto i taau ra ture;

13 Kia rauka iaia te akaangaroianga i te rā tumatetenga, kia oti te vaarua i te koia no te tangata kino ra;

14 Kare oki a Iehova e akaruke i tona au tangata, kare e kopae i tana ra tuanga.

15 E ariu te utunga ki te tuatua-tika: e te aronga ravarai e tiratiratu te ngakau ra, te ka aru i te reira.

16 Koai te akatika iaku i te aronga e rave i te kino ra? koai te tu ki runga e akatika iaku i te aronga takinga-kino ra?

17 Aurakā Iehova i tauturu mai iaku, kua noo takere toku vaerua ki te ngai muteki ua.

18 Iaku i karanga ra, Te paeke nei toku vaevae, kua turu mai to takinga-meitaki iaku, e Iehova.

19 I rotopu i toku nei manako mirimiri-ngata i roto iaku nei, na to akapumaana e akarekareka mai i toku vaerua.

20 Ka tauoaoa ainei koe ma te terono tuatua-kino, ko tei akatika i te takinga-kino na runga i te ture ra?

21 Te kapiti maira ratou e rave i te tangata tuatua-tika kia mate, e te akaapa nei i te toto o te ara kore ra.

22 Ko Iehova ra toku tauturu; e ko toku Atua te mato o toku nei punanga.

23 Nana e apai mai i to ratou kino ki runga ia ratou uaorai, e ka tipu ke atu aia ia ratou ma ta ratou ara katoa; na to matou Atua, na Iehova, ratou e tipu ke atu.