2 Ariki

18 E TAE akera ki te toru o to Hosea te tamaiti a Ela ariki no Iseraela mataiti, i ariki ei a Hezekia, te tamaiti a Ahaza ariki no Iuda ra.

2 Kua tae aia ki te okotai takau ma rima o tona mataiti i ariki ei aia, okotai takau ma iva ona mataiti i te ariki anga i Ierusalema. Ko Abi te ingoa o tona metua vaine, e tamaine na Zekaria.

3 Kua rave aia i te mea tika i mua i te aroaro o Iehova, i e tau mea katoa ta tona ra tupuna ta Davida i rave ra.

4 Kua akaruke aia i te au ngai teitei, e kua akangaangaa i te au tiki, e kua tipu i te au Asetoreta, e kua vavaʼi oki i te ovi veo ra i angaia e Mose ra: kua tutungi oki te tamariki a Iseraela i te atinga kakara ki te reira e tae rava akera ki tau au rā ra: karanga iora oki aia e, E veo ua tena.

5 Kua iriniki aia i te Atua o Iseraela ia Iehova; kare oki ona e arite i muri ake iaia i te au ariki katoa o Iuda ra, kare oki i mua iaia ra.

6 Kua piri tikai aia kia Iehova, kare aia i akapaki i te aru iaia, kua akono ra aia i tana au akauenga ta Iehova i akaue mai ia Mose ra.

7 Tei iaia oki a Iehova; e kua manuia tana i te au ngai katoa i aereia e ia ra; kua kaitamaki iora aia i te ariki o Asura ra, kare aia i akarongo iaia.

8 Kua pou te Philiseti iaia, e tae ua atura ki Gaza, e to reira oki au tapere, mei te punanga o te aronga tiaki e tae ua atu ki te oire patuia ra.

9 E tae akera ki te a o taua ariki ra o Hezekia mataiti, ko te itu ïa o to Hosea te tamaiti a Ela to te ariki o Iseraela mataiti, kua aere maira te ariki o Asura ko Salamanesera ki Samaria, e tamaki mai i te reira.

10 E ope akera nga mataiti e toru ra, rauka iora ia ratou: tei te ono o to Hezekia mataiti, tei te iva o to te ariki o Iseraela to Hosea mataiti, i raukaʼi Samaria.

11 Kua apai akera te ariki o Asura ia Iseraela ki Asura, e kua tuku iora ia ratou i Hala, e i Habora i te vai ra i Gozana, e te au oire katoa o to Madai:

12 No te mea kare ratou i akaronga te reo o to ratou Atua o Iehova, kua akaatikau ra i te koreromotu nana ra, kare ratou i akarongo, kare oki i rave ua atu i ta te tavini o Iehova i ta Mose i akaue maira.

13 Tei te mataiti okotai ngauru ma a o te ariki ra o Hezekia, i aere mai ei te ariki o Asura ko Senakeriba, e tamaki i te au oire katoa i akaketaketaia ra i Iuda, e kua rauka iora.

14 Kua tono akera te ariki o Iuda ko Hezekia i te karere ki Lakisa ki te ariki o Asura, tuatua akera, Kua ē au; ka oki koe, e taau e tuku ua mai ki runga iaku nei, naku e akakoromaki. Kua akono atura te ariki o Asura i te au taleni ario e toru anere, e te au taleni auro e toru ngauru, na te ariki o Iuda na Hezekia e kimi.

15 Kua apai oki a Hezekia i te ario katoa i kitea i roto i te are o Iehova, e i roto katoa i te uipaanga apinga i te are o te ariki ra.

16 I reira to Hezekia kokoti anga i te auro no runga i te ngutupa o te nao o Iehova, e te au pou i vaîia e te ariki o Iuda ra e Hezekia, e kua apai atu na te ariki o Asura.

17 Kua tono maira te ariki o Asura ia Taratana, e ia Rabasarisa, e ia Rabasake, mei Lakisa mai ki te ariki ra kia Hezekia, ma te nuku maata e tamaki ia Ierusalema. E aere atura ratou ki Ierusalema. E tae akera ratou ki runga, kua tu iora i te pae o te vai ko ra o te roto ki runga ra, tei te ara metua i te kainga o te tamā kakau ra.

18 E kia kapikiia mai te ariki e ratou ra, kua aere mairā Eliakima te tamaiti a Hilikia ki vao kia ratou, no runga ïa i te ngutuare, e ko Sebena tata tuatua ra, e ko Ioa te tamaiti Asapha akamou tuatua ra.

19 Kua tuatua mairā Rabasake kia ratou, Ka tuatua ana kotou kia Hezekia e, Te na ko maira te ariki maata, te ariki no Asura ra, Eaa tena irinaki anga i irinaki ei koe na?

20 Te tuatua ra koe, (e tuatua vaa ua ra,) E kite toku e te ririnui kia tamaki. E tenana, koai toou irinaki anga, i kaitamaki mai ei koe iaku nei?

21 I na, i teianei, te irinaki ra koe i tenana tokotoko kakao aati ia Aiphiti ra, ko te puta te rima o te tangata kia irinaki ra, e mama atu: koia te ariki o Aiphiti ra, ko Pharao, i te aronga katoa e irinaki kiaia.

22 Kia tuatua maira kotou kiaku e, Te irinaki nei matou ki to matou Atua kia Iehova: kare ainei aia, nona te au ngai teitei, e te au atarau i apai keia e Hezekia ra, tei tuatua oki kia Iuda e Ierusalema, Ei mua i teianei atarau i Ierusalema nei kotou akamori ei?

23 E tenana, teia taku tuatua kia koe, ka tuku ana i te tutaki ki toku pu, ki te ariki o Asura ra, e naku e oronga atu i te au oroenua naau e rua tausani, peneiake ko te tika ia koe kia tuku i te akaoro ki rungao.

24 E akapeea oki koe e tikaʼi kia akaanga ke atu i te rangatira okotai, tei iti roa i roto i te au tavini o toku pu akera, irinaki uaʼi koe kia Aiphiti i te kariota e te aronga akaoro oroenua ra?

25 I aere ua mai ainei oki au, kare nei a Iehova, e rave i teianei ngai e kia pou? Na Iehova rai i tuatua mai kiaku e, Ka aere, ka rave i taua enua nei e kia pou atu.

26 Kua tuatua mairā Eliakima te tamaiti a Hilikia, e ko Sebena, e ko Ioa, kia Rabasake, Ei reo Arama taau e tuatua mai kia matou, ki to au tavini nei, ta matou ïa tuatua kia koe, kua kite oki matou; auraka ra e tuatua mai kia matou i te reo ngati Iuda nei, ko te rongo aea te taringa o te au tangata i runga i te patu nei.

27 Kua karanga aturā Rabasake kia ratou, I tono mai ainei toku pu iaku e karanga atu ki toou pu anake ra, e kia koe oki, i teianei au tuatua? e auraka ki te au tangata e noo ki runga i te patu ra, kia kai ratou i to ratou uaorai repo, e kia inu oki i to ratou uaorai mimi, ma kotou katoa ra?

28 Kua tu ua mairā Rabasake i reira, e kua kapiki nui maira i te reo ngati Iuda, kua tuatua maira, na ko maira, E akarongo mai ana i te tuatua a te ariki maata, te ariki no Asura:

29 Te na ko maira te ariki, Auraka kotou e vavare ia Hezekia: kare oki e tika iaia kia akaora ia kotou i tona rima.

30 Auraka oki kotou e vavare ia Hezekia e e irinaki ia Iehova, ka na ko mai ei, Na Iehova tatou e akaora, e kare teianei oire e orongaia ki te rima o te ariki o Asura ra.

31 Auraka e akarongo ia Hezekia: te na ko maira oki te ariki no Asura ra, O mai kotou i te apinga naku, ka uri mai ei kotou kiaku nei, e kai ua ïa te tangata katoa i tana uaorai vine, e tana uaorai suke, e inu oki te tangata katoa i te vai no roto i tona uaorai puna:

32 E kia tae mai au ra, e arataki ia kotou ki te enua mei to kotou katoa ra enua; e enua sitona e te wina, e enua areto e te kainga vine, e enua inu olive e te meli, e ka ora kotou, kare oki e mate: auraka ra e akarongo kia Hezekia kia akanauru mai aia ia kotou, kia na ko mai e, Na Iehova tatou e akaora.

33 Kua akaora ainei te au atua no te pa enua ra i to ratou enua i te rima o te ariki o Asura ra?

34 Teiea te au atua no Hamata, e no Araphada? teiea te au atua no Sepharavaima? no Hena, e no Iva? kua akaora ainei ratou ia Samaria i toku nei rima?

35 Koai to te au atua katoa o te pa enua nei i akaora i to ratou enua i toku nei rima, ka oraʼi Ierusalema ia Iehova i toku nei rima?

36 Kua muteki ua ra te au tangata, kare rava i ki atu kiaia; kua akaue mai oki te ariki, na ko maira e, Auraka rava e ki atu.

37 Kua aere mairā Eliakima te tamaiti a Hilikia, no runga ïa i taua ngutuare ra, e ko Sebena tata tuatua ra, e ko Ioa te tamaiti a Asapha akamou tuatua ra, kia Hezekia ra, ma te kakau aeaia ra, e kua akakite maira kiaia i te au tuatua a Rabasake.