2 Ariki

19 E KITE akera te ariki ko Hezekia, kua aae iora aia i ona kakau, e kua tapoki iaia uaorai ki te kakau paoa, aere atura ki roto i te are o Iehova.

2 Kua tono akera aia ia Eliakima, no runga i te ngutuare, e ia Sebena tata tuatua, e te kau taunga pakari ra, ma te tapokiia ki te kakau paoa, kia Isaia peroveta, te tamaiti a Amoza ra.

3 Kua karanga atura ratou kiaia, Te na ko mairā Hezekia, E rā tumatetenga teianei rā, e te akamura, e te akakino; kua vaitata oki te tamariki i te anau, e kare e maroiroi e anau mai ei.

4 Peneiake ko te akarongo mai to Atua ra ko Iehova i te au tuatua katoa a Rabasake, ta tona ra pu, ta te ariki no Asura, i tono mai e akakino i te Atua ora nei; peneiake ko te patoi mai to Atua ko Iehova i te au tuatua tana i akarongo ra: e pure oki koe i taau pure i tenana, i te toenga tangata i kitea nei.

5 Kua aere iora te au tavini o te ariki ra ko Hezekia kia Isaia.

6 E kua tuatua mairā Isaia kia ratou, E na ko atu kotou ki to kotou pu: Te na ko mairā Iehova, Auraka e mataku i te au tuatua taau i akarongo akenei, ta te au tavini o te ariki o Asura i akakino iaku ra.

7 I na, e vaerua ke taku e akao atu ki roto iaia ra, e rongo tana e akarongo, e ka oki aia ki tona uaorai enua; ka inga oki aia iaku i te koke i tona uaorai enua.

8 E oki aturā Rabasake, rokoia atu te tamaki ra te ariki no Asura kia Libena: kua kite ana oki aia e, kua akaruke mai aia i Lakisa.

9 Kua akakiteia maira aia i reira, na koia maira, I na oki, te ariki o Kusa ra ko Tiraka, kua aere mai aia e tamaki ia koe: kua tono akaou aia i te karere kia Hezekia, na ko atura,

10 E akapera kotou, kia karanga atu ki te ariki o Iuda ra kia Hezekia ra, e na ko atu, Auraka koe e vare i to Atua taau e irinaki na, kia na ko mai e, Kare Ierusalema e tukuia atu ki te rima o te ariki o Asura ra.

11 I na, kua akarongo oki koe i ta te au ariki o Asura i rave i te pa enua katoa ra, kua taitaipakoko ravaia ïa: e ko koe ainei te ka ora?

12 Kua akaora ainei te au atua o te pa enua i te aronga i pou i toku ai metua ra; ia Gozana, e ia Harana, e ia Rezepha, e te au tamariki i Edena i Telasara?

13 Teiea iora te ariki no Hamata, e te ariki o Araphada, e te ariki o te oire ra o Sepharavaima, no Hena, e no Iva?

14 Kua āriki mairā Hezekia i taua leta ra i te rima o te au karere ra, e kua tatau iora: aere aturā Hezekia ki runga i te are o Iehova ra, e kua oora atura i te reira ki mua i te aroaro o Iehova.

15 E kua pure iorā Hezekia ki mua ia Iehova, na ko atura, E te Atua o Iseraela, e Iehova e, e tei noo i rotopu i nga kerubi, ko koe te Atua, ko koe anake ra, no te au basileia katoa o te ao nei; naau oki te au rangi e te enua nei i anga.

16 E ariu mai i to taringa, e Iehova, e akarongo mai; e akapuera mai i to mata, e Iehova, e akara: e akarongo mai koe i te au tuatua a Senakeriba tana i akau mai ei akakino i te Atua ora nei.

17 E tuatua-mou rai, e Iehova, kua tairipotiia te au etene, ma to ratou enua, e te au ariki no Asura,

18 E kua titiri i to ratou au atua ki roto i te ai: kare oki ratou i te atua, e mea angaia e te rima tangata, e rakau e te toka, i pou ei ia ratou.

19 E teianei, e to matou Atua, e Iehova, ko taku ïa tuatua kia koe, e akaora koe ia matou i tona rima, kia kite te au basileia katoa o te ao nei e, ko koe ra te Atua, e Iehova, ko koe anake.

20 Kua tono akerā Isaia te tamaiti a Amoza i te karere kia Hezekia, karanga atura. Te na ko maira te Atua o Iseraela ko Iehova: Taau i pure mai iaku nei i te ariki o Asura ia Senakeriba, kua akarongoia e au.

21 Teia te tuatua ta Iehova i tuatua mai iaia: Te tamaine paretenia o Ziona tei akavaavaa ia koe, e kua kata aviriia koe e ia; kua takirikiri te tamaine o Ierusalema i te upoko ia koe.

22 Koai taau i akavaavaa mai e i akakino mai? e i akateitei mai koe i to reo iaai ra, e i akaraʼi to mata ki runga ra? i Tei Tapu i Iseraela nei.

23 Kua akakino mai koe i te Atu i te rima o te au karere naau ra, e kua tuatua e, Kua tae ua ma te maata katoa o taku aronga kariota ki te take rava o te au maunga ra, ki te pae i Lebanona ra; e kua motu iaku te au arezi teitei nona, e te au berusi akaperepere nona ra: kua tomo au ki roto i te nooanga i te kotinga nona ra, te vaorakau o te kainga ruperupe nona ra.

24 Kua koia e au o kua inu i te vai ke; e kua tamarō au i toku tapuae i te au vai katoa i Aiphiti ra!

25 Kare koe i kite takere e, naku i rave i te reira? e kua akakoroia e au mei tupua roa mai? e teianei kua akatupuia e au, kia riro ia koe te au oire i patuia ei ututua akatanea ra.

26 I riri iti ei to reira au tangata, kua tumatetenga ratou, e kua rere te mauri; kua riro ratou mei te ngangaere o te kainga ra, e mei te rakau rikiriki tupu ou ra, mei te ngangaere i runga i te are; e mei te sitona paapaa ua, kare i ope i te tupu ra.

27 Ko toou ra noo anga, e toou ra aere anga ki vao, e toou ra aere anga mai ki roto, e toou riri iaku ra, kua kitea e au.

28 No te mea ko toou riri iaku ra, e taau tuatua akatokā, kua tae rava mai ïa ki oku nei taringa: ka tuikau ei au i taku matau i roto i to putaiu, e taku tavaa ki roto i to tanga, ka akaoki ei au ia koe na te ara taau i aere maira.

29 Teia oki taau akairo, Ka kai kotou i tei tupu ua i teianei mataiti, e i te rua o te mataiti, i tei tupu i te reira ra; e kia tae ki te toru o te mataiti, ka ruru ïa kotou ka kokoti ei, ka tanu ei i te kainga vine, ka kai ei i te ua o te reira.

30 Ka riro oki te toenga i ora maira no te ngutuare o Iuda, i te toro te aka ki raro, e ka ua oki ki runga:

31 Ka riro oki te toenga no Ierusalema atu, e te aronga i ora ra no te maunga ia Ziona: na te maroiroi o Iehova Sabaota teia e rave.

32 I tenana, te na ko mairā Iehova, i te ariki no Asura ra, Kare aia e tae mai i roto i teianei oire, kare tana kakao e akainana mai i reira, kare aia e aere mai ma te paruru ki mua atu nei, kare aia i akāū i te one i reira.

33 Ka oki rai aia na te ara i aereia mai e ia; e kare aia e tae mai ki roto i teianei oire, te pera mairā Iehova:

34 Naku oki e tiaki i teianei oire kia ora, noku uaorai, e no toku tavini no Davida.

35 Kua aere iora te Angela a Iehova i taua po ra ki vao, kua ta iora i to te puakapa o Asura ra, okotai anere, e varu ngauru ma rima, i te tausani: e kia tu mai te aronga i toe kia popongi ake, i na, e turuma anake.

36 Riro atura te ariki no Asura ra ko Senakeriba, aere atura, e oki atura, e noo atura i Nineve.

37 E te akamori ra aia i roto i te are o tona ra atua o Niseroka, kua ta iora ana puke tamariki ko Aderameleka raua ko Sarezera iaia ki te koke; oro atura ra raua ki te enua ra ko Ararata. Tupauia akera aia i te au e tana tamaiti ra e Esarahadona.