Genese

41 E OPE akera nga mataiti e rua ra, e moe ta Pharao; e i na, te tu ua ra aia ki te pae o te vai.

2 E i na, kua aere maira nga puakatoro ua memeitaki, e te matu, e itu, mei raro mai i taua vai ra; e te kaikai ra ratou i te ngai ngangaere ra.

3 E i na, i muri ake i te reira, kua aere mairai nga puakatoro ua kikino, e te ikoke, e itu, mei raro mairai i taua vai ra, e kua tu ua iora ratou i vaitata i tetai au puakatoro ua i te pae o taua vai ra.

4 Kua kai iora nga puakatoro ua kikino e te ikoke ra, i nga puakatoro ua memeitaki e te matu e itu ra, e pou rava akera. Ara akerā Pharao i reira.

5 E piri atura tona mata, e moe maira aia, ko te rua ïa: e i na, kua tupu maira e itu kaui sitona memeitaki, e te mamaata, ki runga i te tumu okotai.

6 E i na, i muri ake i te reira, kua tupu maira e itu kaui sitona tupu akenakena, e kua pāpāia e te maoake ra.

7 E pou rava akera nga kaui mamaata e te meitaki e itu ra, i nga kaui tupu akenakena ra. Kua ara akerā Pharao, e i na, e moe.

8 Kia ao akera, kua tumatetenga akera tona ngakau; e tono atura i te tiki i te au purepure katoa, e te au tangata pakari katoa o Aiphiti ra; e kua akakite aturā Pharao kia ratou i aua nga moe ana ra; kare rava ra i tika i tetai kia akakite mai kia Pharao i aua nga moe ra.

9 Kua karanga atura te rangatira raverave-wina kia Pharao, na ko atura, Kua maaraia e au taku nei apa i teianei rā:

10 Riri akerā Pharao i nga tavini nona iaku e te rangatira rave-kai, e kua tuku iora ia maua ki roto i te are tiaki a te rangatira vaeau ra:

11 E moe ta maua, ko au e koia katoa, okotai rai po; nana tana moe, e naku rai taku, e e ariteanga tikai to aua nga moe a maua ra.

12 E i reira katoa tetai tangata ou, e ngati Ebera, e tavini no te rangatira vaeau ra: e kua akakite atura maua kiaia, e kua akakite maira aia kia maua i te ariteanga o a maua moe; ta tetai ra moe, e ta tetai, tana ïa i akakite mai e tau marie akera.

13 E kua tupu tika io nei oki tana i akakite maira: kua akaoki mai aia iaku ki taku ra taoonga, e kua akanonoa aia iaia.

14 Kua tono aturā Pharao i te karere e tiki ia Iosepha; kua arataki viviki maira ratou iaia, mei roto mai i te vaarua ra: e ma akera aia i te varu, e kakau akera i tona kakau, kua tomo maira aia ki roto kia Pharao ra.

15 Kua karanga aturā Pharao kia Iosepha, E moe taku, e kare rava e tangata e tikaʼi kia akakite mai i te ariteanga: kite akenei oki au i te tuatua ia koe e, me akakiteia te moe kia koe, e tika ia koe kia akakite mai i te ariteanga.

16 Kua tuatua mairā Iosepha kia Pharao, na ko maira, Kare rai iaku nei: na te Atua ra e tuku mai kia Pharao i te tuatua au.

17 Kua karanga aturā Pharao kia Iosepha, Taua moe naku nei, i na, te tu ua ra au i te pae o te vai ra:

18 E i na, kua aere maira nga puakatoro ua memeitaki e te matu e itu, mei raro mai i taua vai ra; e te kaikai ua ra ratou i te ngai ngangaere ra:

19 E i na, i muri ake i te reira, kua aere mairai nga puakatoro ua uruurunga, e te kikino roa, e te ikoke, e itu; kare rava ïa puakatoro i kitea e au i te enua katoa nei i Aiphiti i te kino:

20 Kua kai iora nga puakatoro ua kikino e te ikoke i tei muatangana ra au puakatoro ua matu e itu ra:

21 E pou akera ratou i te apukuia, kare i kite e, kua apukuia; ko to ratou rai oki tu i te kikino, mei tei muatangana ra. Itirere akera au i reira.

22 Kua kite atu rai au i taku moe, e i na, e itu kaui sitona memeitaki, e te mamaata, i te tupu anga ki runga i te tumu okotai.

23 E i na, i muri ake i te reira, kua tupu maira e itu rai kaui sitona riorio, e te tupu akenakena e kua pāpāia e te maoake ra:

24 E pou roa akera nga kaui sitona memeitaki e itu, i nga kaui sitona tupu akenakena ra. E kua akakiteia e au ki te au purepure ra; kare takiri ra e tangata i tikaʼi kia akakite mai kiaku nei.

25 Kua tuatua mairā Iosepha kia Pharao, Okotai ra ïa nga moe a Pharao ra: kua akakite mai te Atua kia Pharao i tana e ka rave.

26 Ko nga puakatoro ua memeitaki e itu ra, e itu ïa mataiti; e nga kaui sitona memeitaki e itu ra, e itu ïa mataiti: okotai rai ïa nga moe nei.

27 E nga puakatoro ua kikino, e te ikoke, e itu ra, i tei aere mai i muri ake, e itu ïa mataiti; e nga kaui sitona tupu akenakena, kua pāpāia e te maoake ra, e itu ra, e itu ïa mataiti onge.

28 Ko taua tuatua ra teia kua akakiteia atu e au kia Pharao; ta te Atua e ka rave, kua akakite maira aia kia Pharao.

29 I na, teia ka tupu nga mataiti mou maata roa e itu, e pini ua ake te enua katoa nei ko Aiphiti:

30 E i muri ake i te reira, ko nga mataiti onge ïa e itu; e ka ngarapoina taua mou maata i te enua nei i Aiphiti; ka pou roa oki te enua i te onge;

31 Kare rava oki taua mou maata i te enua ra e manakoia, i te onge i muri ake; ka riro oki i te onge maata roa.

32 Kareka ko te tu rua anga mai i taua moe kia Pharao ra; no te mea kua tika roa ïa tuatua i te Atua, e kua vaitata i te akatupuia e te Atua ra.

33 E tenana, ka kimi a Pharao i tetai tangata kite e te akono meitaki, ka tuku ei iaia ei rungao i te enua nei ia Aiphiti.

34 Kia akaperā Pharao, e kia akataka aia i tetai papaki tangata ei akaaere no runga i te enua nei, ka rave ei i te rima o te tuanga o te kai ravarai o te enua nei o Aiphiti, i nga mataiti mou e itu nei;

35 Ka akaputuputu ei ratou i te au kai ravarai no aua nga mataiti memeitaki e vaitata mai nei; ka vaoo marie ratou i te sitona i te uipaanga, na Pharao e mou, kia kaiia to ratou i te au oire ra.

36 E kaiia to te enua i reira, no nga mataiti onge e itu e tupu i te enua i Aiphiti nei; kia koe oki e mate te enua nei i taua onge nei.

37 E tuatua meitaki taua tuatua nei ia Pharao, e tona katoa ra au tavini.

38 Kua karanga aturā Pharao ki tona au tavini ra, E kitea ainei ia tatou tetai tangata mei iaia nei, tei roto iaia te Vaerua o te Atua ra?

39 Kua karanga aturā Pharao kia Iosepha, No te mea kua akakite mai te Atua kia koe i taua tuatua katoa nei, kare atu e tangata i kite, e te karape, mei ia koe na:

40 Ei rungao koe i toku nei ngutuare, e ko taau te tuatua e akarongoia e te au tangata ravarai noku nei: ei runga au i te terono anake ra e maataʼi ia koe.

41 Kua karanga atura oki a Pharao kia Iosepha, Ka akara na, kua akariroia koe e au ei rungao i te enua katoa nei i Aiphiti.

42 Kua rave iorā Pharao i te momono-rima no runga i tona uaorai rima, kua momono atura i roto i te rima o Iosepha, e kua akakakau atura iaia ki te kakau orongā meitaki roa, e kua tuku atura i te pirianganaoa auro ki runga i tona kaki.

43 E kua akanoo iaia ki rungao i te kariota meitaki roa nona uaorai mari ra okotai ra; e kua kapiki aere te tangata na mua iaia, E tuku i te turi: akariro atura aia iaia i rungao i taua enua katoa i Aiphiti ra.

44 Kua karanga atu rai a Pharao kia Iosepha, Ko au ko Pharao, e kare rava e tangata e apai i te rima ki runga, e te vaevae, mari ra kia tuatua koe ra, e pini ua ake te enua katoa nei ko Aiphiti.

45 Kua tapa iorā Pharao i to Iosepha ingoa, ko Zaphanata-paanea; e kua oronga atura aia ia Asenata te tamaine a Potiphera taunga i Ono ra, ei vaine nana. Aere aturā Iosepha e pini ua akera taua enua katoa ra ko Aiphiti.

46 Ka toru akera o Iosepha ngauru anga i te mataiti, ka tu ei aia ki mua i te aroaro o te ariki o Aiphiti ra ko Pharao. Aere aturā Iosepha mei mua atu i te aroaro o Pharao, takako aere atura i taua enua katoa ra i Aiphiti.

47 Kua avaria atura taua enua ra i te kai i nga mataiti mou e itu ra.

48 Kua akaputuputu iora aia i to te au kai ravarai i nga mataiti e itu, i taua enua ra i Aiphiti; e vaoo marie iora i taua kai ra ki roto i te au oire: ko te kai no te au kainga, i vaitata i taua au oire ra e pini ua ake, ko tana ïa i vaoo ki roto i taua au oire ra.

49 Uipa marie akera te sitona ia Iosepha mei te onetea i taatai ra, e kare atura aia i tatau i taua kai ra i te maata anga, kare akerai e tika kia tatau.

50 E kare i tae te tuatau onge ra, i anau mai ei ta Iosepha puke tamariki tamaroa toko rua, ta te tamaine a Potiphera taunga i Ono, ta Asenata, i anau nana ra.

51 Tapa iorā Iosepha i to te tama mua ra ingoa ko Manase; Kua ngaropoina oki toku ra au tumatetenga katoa, e te ngutuare katoa o toku ra metua, iaku, i te Atua.

52 E tapa iora aia i te ingoa o te toko rua ra, ko Epheraima: Kua akamaata mai oki te Atua iaku i te enua i tumatetengaʼi au nei.

53 E ope akera nga mataiti mou e itu i taua enua ra i Aiphiti.

54 Kua tupu maira nga mataiti onge e itu, ta Iosepha i tuatua ra: e kua pini te pa enua katoa i te onge; kareka te enua ra ko Aiphiti e pini ua ake, e kai ïa te vai ra.

55 E mate akera te enua katoa ra ko Aiphiti i te pongi, kua kapiki maira te au tangata kia Pharao i te kai: kua karanga aturā Pharao i te kai: kua karanga aturā Pharao ki to Aiphiti katoa ra, Ka aere kia Iosepha ra; ko tana e tuatua mai kia kotou na, ko ta kotou ïa e rave.

56 Kua pini katoatoa akera taua enua ra i te onge: Kua kiriti akerā Iosepha i te au are uipaanga kai ravarai, kua oko atura i te sitona na to Aiphiti; e maata rava atura te onge i taua enua ra i Aiphiti.

57 Kua aere maira to te pa enua ravarai ki Aiphiti kia Iosepha ra, e oko i te sitona; kua pini oki te pa enua ravarai i te onge kino.