Galatia

5 E TENANA, e tamou tikai kotou i te rangatira ta te Mesia i akarangatira mai ia tatou nei, e auraka e ii akaou i te zugo tuikaa ra.

2 I na, ko au teia ko Paulo, te karanga atu nei au, Kia peritomeia kotou, kare rava a kotou puapinga e rauka i te Mesia.

3 E te akakite akaou atu nei au ki te tangata ravarai i peritomeia, e kai ou aia e kia ope rava te ture i te raveia.

4 Kotou ravarai ko tei akatikaia i te ture, kua taka ke ïa kotou i te Mesia; kua akaruke ïa kotou i te Mesia; kua akaruke ïa kotou i te aroa ua.

5 No te Vaerua oki i tatari atu ei matou i te tuatua-tika i manakoia nei kia rauka i te akarongo.

6 Ia Iesu Mesia nei oki, kare te meitaki e rauka i te peritome, kare oki i te peritome kore; i te akarongo ra e akatupu i te aroa ra.

7 I oro meitaki ana oki kotou; naai kotou i arai io nei, i kore ei kotou i akono i te tuatua-mou?

8 Kare oki tona te reira manako to tei karanga ia kotou.

9 Ka opue te putunga katoa ra i te akaopue mea ngiti ua ra.

10 E te kite nei au i te Atu ia kotou e, kare to kotou e riro ei manako ke: kareka aia i akapekapeka mai ia kotou, ei iaia uaorai tana utunga, kare e akonoia tona tu.

11 Ko au nei oki, e te au taeake, te apii nei rai au i te peritome, eaa au i takinga-kinoia mai ei? Kua kore oki te maitu o te satauro i reira.

12 E mea meitaki oki iaku kia akataka keia taua aronga i akapekapeka ia kotou ra.

13 I kapikiia oki kotou, e te au taeake, kia rauka te rangatira; auraka ra taua rangatira ra ei akatupu i ta te kopapa nei, ei kauraro aroa ra to kotou tetai ki tetai.

14 Kua tika rava oki te ture i te reo okotai nei, ko teia; “E aroa atu koe i to tangata tupu mei te aroa ia koe uaorai.”

15 Kareka ra kia aae ra e kia akapou ia kotou uaorai, e matakite, ko te pou takiri oki kotou ia kotou uaorai.

16 Teia oki taku tuatua, E akono i ta te Vaerua ra, e auraka e akatupu i to te kopapa ra inangaro.

17 Te inangaro o te kopapa nei, kare ïa e tau i to te Vaerua; e to te Vaerua, kare ïa e tau i to te kopapa nei; kare raua i tau: i kore ei i tika ia kotou kia rave i ta kotou i anoano ra.

18 Te aratakiia ra kotou e te Vaerua ra, kare ïa kotou i raro ake i te ture.

19 E teianei, te au angaanga a te kopapa, kua kitea meitakiia ïa; koia oki te moeaana, te akaturi, te tuatua viivii ra, e te kanga,

20 Te akamori idolo, te purepure, te makitakita, te tamaki, te akarere, te riri, te karo, te pae ke, te tuatua tarevake,

21 Te vareae, te ta tangata, te konā kava, te kariei, e mei te reira te tu; te akakite atea atu nei au kia kotou i teianei, taku rai oki i akakite i muatangana ra, ko te aronga e rave i te reira au peu, kare ratou e noo i te basileia o te Atua.

22 Kareka ta te Vaerua e akatupu, ko te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore,

23 Te maru, te akono meitaki: kare ua e ture e akakore i te reira.

24 Ko ratou oki ko to te Mesia ra, kua akasatauro ïa i te kopapa ma tona manako e te inangaro tika kore katoa ra.

25 E te ora nei tatou i te Vaerua ra, e aru tatou i ta te Vaerua ra.

26 Eiaa tatou e akateitei puapinga kore ua, i te akaongoongo anga tetai ki tetai, e te vareae anga tetai ki tetai.