1 Tesalonia

1 PAULO, e ko Siluano, e ko Timoteo, i te ekalesia i roto i te Atua Metua, e te Atu ra ia Iesu Mesia, i Tesalonia na: Ei ia kotou te aroa ua, e te au, no ko mai i te Atua i to tatou Metua ra, e te Atu oki ia Iesu Mesia.

2 Te akameitaki nei matou i te Atua ia kotou ravarai, kare e tivata, i te akaiki anga ia kotou i ta matou nei pure;

3 Kare oki e tivata i te manako i te ravenga o to kotou akarongo, i te angaanga o to kotou inangaro, e te akakoromaki o to kotou irinaki i to tatou Atu ia Iesu Mesia, i te aroaro o te Atua o to tatou Metua;

4 Te kite nei oki matou, e te au taeake akaperepere ra, i to kotou iki angaia e te Atua.

5 I te mea kare ta matou evangelia i tae tuatua vaa ua atu ia kotou na, ma te mana katoa ra, e ma te Vaerua Tapu, e ma te kite pu tikai; kua kite oki kotou i to matou tu i rotopu ia kotou, kia meitaki kotou.

6 E i riro mai nei oki kotou ei aru ia matou, e i te Atu oki, kua āriki oki kotou i te tuatua ma te mate maata, ma te rekareka a te Vaerua Tapu:

7 E kua riro oki kotou ei akaraanga na te aronga katoa i akarongo i Makedonia ua e i Akaia nei.

8 No ko na oki ia kotou na te tuatua a te Atu i te aruru anga, eiaa i Makedonia e Akaia anake nei, kua varia ra to kotou akarongo i te Atua i te au ngai ravarai; auraka ua matou e tuatua atu i te reira.

9 Ko ratou uaorai tei akakite ia matou i te tu o to matou o anga atu i roto ia kotou, e to kotou ariu anga mai ki te Atua, mei te au idolo maira, e akamori i te Atua ora e te mou:

10 E kia tatari oki i tana Tamaiti no te rangi mai, tana i akatu mei te mate maira, koia oki ko Iesu, ko tei akaora ia tatou i te riri a muri nei.