Mataio

13 E I taua rā ra, aere aturā Iesu ki vao i taua are ra, noo iora ki te pae roto.

2 E urupu tangata maata tei uipa mai kiaia ra, aere atura aia ki runga i tetai pai, noo iora ki reira; te tu ua maira oki te tangata tini i taatai.

3 E manganui tana tuatua i tuatua parabole mai kia ratou, na ko maira; I na, aere atura te ruru ua e ruru i te ua;

4 E tei te ruru anga ra, topa iora tetai pae ki te pae arataa, rere maira te manu, kai iora.

5 Topa iora tetai pae ki te ngai paikea, kare i rai te one i reira: tutupu vave ua atura, no te mea kua papaku ua te one:

6 E rāia iora, vera atura; e no te kore e aka, mae rava atura ïa.

7 Topa iora tetai pae ki roto i te ngangaere, tupu akera te ngangaere, pokia atura.

8 Topa iora tetai pae ki te ngai one meitaki, tupu akera, uua iora, taki tai anere i te ua okotai, taki ono ngauru, taki toru ngauru.

9 E taringa tona ei akarongo anga ra, e akarongo aia.

10 Kua aere maira tana au pipi, na ko maira kiaia. Eaa koe i tuatua parabole atu ei kia ratou?

11 Kua karanga atura aia kia ratou. No te mea kua orongaia mai te kite ia kotou i te tuatua ngaro o te basileia o te ao ra, kare ra i orongaia ia ratou.

12 E puapinga tana ra, e orongaia atu rai tana, e kia maata ua atu; kareka te kore e puapingaia ra, e ravea keia tana.

13 I tuatua parabole atu ei au kia ratou, i te mea kare ratou i kite i te akara anga; kare i akarongo i te akarongo anga, kare oki i akono;

14 Kua tupu ia ratou te totou a Isaia, ko tei na ko e, “E akarongo rai kotou, kare ra e kite; e akara rai kotou, kare ra e utoa.

15 Kua matorutoru oki te ngakau o teianei aronga, kua turi o ratou taringa, e kua topiri ratou i o ratou mata; ko te akara aea o ratou mata; ko te rongo aea o ratou taringa, ko te kite aea o ratou ngakau, ko te akaariuia mai, e ko te akaoraia atu ratou e au.”

16 E ao ra to to kotou mata, te akara nei ïa; e to to kotou taringa, te akarongo nei ïa.

17 Koia tika taku e karanga atu kia kotou nei, E manganui te peroveta e te tangata tuatua-tika i inangaro i te akara i te au mea ta kotou e akara nei, e kare akenei ratou i akara; i inangaro oki i te akarongo i te au tuatua ta kotou e akarongo nei, e kare akenei i akarongo.

18 E teianei, ka akarongo mai na i te parabole o te ruru ua nei:

19 Kia akarongo tetai i te tuatua o te basileia nei, e kare i kite, te aere maira taua vaerua kino ra, e rave atu i tei ruruia ki roto i tona ngakau: e tau teia i te ua i topa ki te pae arataa.

20 Tei topa ki te ngai paikea ra, koia tei āriki i te tuatua ma te rekareka kia akarongo;

21 Kare ra i akaia i roto iaia, e tāpu anga poto ua tana; kia rokoia oki e te tumatetenga, e kia takinga-kinoia, i taua tuatua ra, maitu atura ïa aia i reira ra.

22 Ko tei topa ki roto i te ngangaere ra, koia te tangata i akarongo i te tuatua; pokia atura te tuatua i te anoano maata i to teianei ao, e te pikikaa o te apinga, e kare atura i ua mai.

23 Kareka tei topa ki roto i te ngai one meitaki ra; koia te tangata e akarongo, e kite akera, e ua maira tana, taki tai anere, taki ono ngauru, e taki toru ngauru i te ua okotai.

24 Kua tuku atu rai aia i tetai parabole kia ratou ra, na ko atura, E tau te basileia o te ao ra i tetai kainga i ruruia e te tangata kainga te ua meitaki ki roto ra:

25 Kia moe ra te au tangata, kua aere maira tona enemi, kua ruru iora i te zizania ki roto i te sitona, aere ke atura.

26 E ao atura taua sitona ra, e ua akera, kitea iora te zizania.

27 Kua aere maira te aronga tavini o taua tangata kainga ra, kua tuatua maira kiaia, na ko maira, E te atu, kare ainei e ua meitaki taau i ruru ki roto i toou kainga? noea ra te zizania?

28 Kua na ko atura aia kia ratou, Na te enemi te reira i ruru. Kua na ko maira te au tavini kiaia, E tika aina ia koe kia aere matou e vaere?

29 Kua na ko atura aia, Auraka; ko te peke katoa aea te sitona kia vaere kotou i te zizania.

30 Vaio ua na, kia tupu kapipiti, e kia mou; e kia tae ki te tuatau mou ra, naku ïa e karanga atu ki te aronga e kokoti, E na mua i te akaputuputu i te zizania, e ruru aere no te ai; akaputu ra i te sitona ki roto i taku are vairanga ra.

31 Kua tuku akaou aia i tetai parabole kia ratou, na ko atura, E tau te basileia o te ao ra i tetai ua sinapi, na tetai tangata i ruru ki roto i tona kainga:

32 E mea ngiti oki te reira i te ua tini ravarai; kareka kia tupu ra, e rai atu ïa i te au rakau rikiriki katoa nei, e riro ei rakau maata, e e to mai oki te manu o te reva ki rungao i te au mangamanga.

33 Kua karanga atura aia i tetai parabole kia ratou: E tau te basileia o te ao ra i te akaopue, na tetai vaine i iro ki roto i nga āriki faraoa e toru, opue katoa atura ïa.

34 Ko teia katoa nei au mea ta Iesu i tuatua parabole atu ki te tangata tini ra; kare rava e tuatua parabole kore kia tuatua aia kia ratou;

35 I te akatika anga i te tuatua a te peroveta ra, i te na ko anga e, “E tuatua toku vaa i te parabole, e tuatua au i tei kore i kitea mei te akatumu angaia o te enua nei.”

36 Vaio iorā Iesu i taua aronga maata ra, aere atura ki roto i te are; e kua aere maira tana au pipi, na ko maira kiaia, E akakite mai koe ia matou i te parabole o te zizania ki roto i te kainga ra.

37 Kua karanga atura aia kia ratou, na ko atura, Ko tei ruru i te ua meitaki ra, koia te Tamaiti a te tangata;

38 Te kainga ra, koia teianei ao; te ua meitaki ra, koia te tamariki o te basileia; e te zizania ra, koia te tamariki a te vaerua kino;

39 Ko te enemi i ruru ra, koiā Satani; te mou ra, koia te openga o teianei ao; e te aronga e kokoti ra, koia te au angela.

40 E mei te zizania e akaputuputuia, e e taʼuia i te ai ra, pera katoa te openga o teianei ao.

41 E akaunga mai te Tamaiti a te tangata i tana au angela, e na ratou e akaputuputu i te aronga ravarai i apaʼi ra, e tei rave i te tuatua kino, i roto i tona basileia;

42 E ka titiri atu ei ki roto i te umu ai, tei reira te aue e te pakati anga nio.

43 Ei reira oki te aronga tuatua-tika e kakā mai ei i te basileia o to ratou Metua mei te rā ra. E taringa tona ei akarongo anga, e akarongo aia.

44 E arite oki te basileia o te ao ki te apinga i ngaro ki roto i te kainga; e kitea iora e tetai tangata, kua uuna rava atura aia, e no te rekareka i te reira, kua oko aere aia i te apinga tini ravarai nana ra, e kua oko atura i taua kainga ra.

45 E tau oki te basileia o te ao ra ki tetai tangata oko i kimi poe memeitaki aere ra.

46 E kitea iora e ia tetai poe meitaki maata roa ra, aere atura aia, oko atura i te au apinga katoa nana ra, oko atura i taua poe ra. 47 E tau oki te basileia o te ao ra i tetai kupenga i tukuia ki raro i te tai, e pini akera te ika e manganui te tu:

48 E ki akera, kua takitaki maira ratou ki uta, noo iora; akaputuputu iora i te ika memeitaki ki roto i te āriki, akaruke atura i te ika kikino.

49 Koia katoa oki kia tae te openga o teianei ao; ko te au angela te ka aere mai e akataka i te aronga kino no roto i te aronga tuatua-tika,

50 E titiri atu ia ratou ki roto i te umu ai ra; tei reira te aue, e te pakati anga nio.

51 Kua ui aturā Iesu kia ratou, Kua taka aina ia kotou teia au tuatua katoa nei? Kua na ko maira ratou kiaia, A, e te Atu.

52 Kua na ko atura aia kia ratou, Te au tata tuatua katoa i apii meitakiia, kia tau i te basileia o te ao ra, e arite ïa ki te tangata kainga, tei apai mai i te apinga ou e te apinga taito, no roto i tana putunga.

53 E oti akera ia Iesu te reira aronga parabole, aere atura aia.

54 E kia tae atura aia ki tona uaorai enua, apii atura aia i to reira i roto i to ratou sunago, kua tuatua iora ratou, ma te va ua, Noea te pakari e te ravenga mana a teianei tangata?

55 Kare aina teia te tamaiti a te kamuta ra? e kare aina ko Maria te ingoa o tona metua vaine? e ko Iakobo, ko Iose, ko Simona, e ko Iuda tona au taeake?

56 E kare aina te noo nei tona au tuaine ki o tatou nei? Noea ra oki te au ravenga a teia tangata?

57 Maitu iora ratou iaia. Kua karanga aturā Iesu kia ratou, Kare te peroveta e ngere i te akameitaki, mari ra, i tona uaorai enua, e tona uaorai ngutuare.

58 Kare akera aia i rave i te akairo maata i reira, no te mea, kare ratou i akarongo.