Mika

6 E AKARONGO mai kotou i tenana i ta Iehova e tuatua nei: Ka tu, ka taumāro atu koe ki mua i te aroaro o te au maunga, e kia akarongo mai oki te au tuaivi i to reo.

2 E akarongo mai kotou, e te au maunga e, i ta Iehova ra taumāro anga, e kotou e te au mato, nga tumu o te enua e; no te mea e taumāro anga ta Iehova ki tona ra au tangata, e ka māro atu rai aia ia Ieseraela.

3 E taku au tangata e, kua akapeea atu au ia koe? i te aa oki i roiroi ei koe iaku? e akakite mai iaku.

4 Kua arataki mei oki au ia koe mei te enua maira mei Aiphiti; e kua akaora au ia koe i te ngutuare tavini ra; e kua tono au ia Mose, ia Aarona, e ia Miriama, na mua ia koe.

5 E taku aronga tangata e, ka akamaara ana i ta te ariki o Moabi ta Balaka i kimi ra, e ta Balaama te tamaiti a Beora i tuatua mai kiaia; e akamaara i tei raveia ra, mei Sitima e tae rava atu ki Gilagala, kia kite kotou i te tuatua-tika a Iehova.

6 E aere atu au ki mua i te aroaro o Iehova ma te aa, ka tupou ei iaku uaorai ki raro ki mua i te aroaro o te Atua teitei? e aere ainei au ki mua iaia ma te atinga karakaratio? ma te puakatoro mataiti okotai ra?

7 E mareka ainei a Iehova i te au mamoe toa e kia tausani? e kia ngauru te tausani i te kauvai mori ra? e oronga ainei au i taku tama mua no taku nei ara, te ua o toku kopapa no te ara a toku vaerua?

8 Kua akakite mai aia kia koe, e te tangata na, i te mea meitaki: e eaa ta Iehova inangaro ia koe ra, mari ra ko te rave i te tuatua-tau, e kia inangaro i te aroa, e te aerenga akamako tikai i to Atua ra?

9 Te kapiki nei te reo o Iehova ki te oire, e ko tei pakari ra, e kite ïa i toou ingoa; E akarongo kotou i te pāpā, e Tei akono mai i te reira.

10 Te vai ra ainei ki roto i te are o te tangata kino te apinga i rauka i te kino ra, e te epha meangiti i taumaaia ra?

11 E tuatua ainei au, e e ara kore tana ko tei rave i te aite kikino ra, e te pute toka pikikaa?

12 Kua ki oki tona ra au tangata apinga nui i te rave aroa kore, e kua tuatua tei noo i reira i te tuatua pikikaa; e arero pikikaa oki tei to ratou vaa.

13 E pāpā rai oki au ia koe ki te maki ora kore, i te akatanea anga no taau au ara.

14 Ka kaikai koe, kare ra e merengo, ka riro oki te teiaa i roto ia koe; ka apai ke oki koe, kare ra tetai e ora ia koe, e tei ora ia koe ra, naku ïa e tuku atu ki te koke.

15 Kua ruru koe, kare ra e kokoti; ka takatakai koe i te olive, kare ra koe e pani i te manongi; e te wina ou, kare ra koe e inu i te wina.

16 Kua akono tikaia oki te au akonoanga a Omeri, e te angaanga katoa a te ngutuare o Ahaba, e te aaere nei kotou i ta ratou ako; kia akariro atu au ia koe ei tanea, e to reira au tangata ra ei aviri anga; ka iri mai ei te akakino i toku ra au tangata ki runga ia kotou.