Isaia

9 TE ARONGA i aere ua na te poiri ra, kua akara ïa i te mārama maata: te aronga i noo ki te ngai maru-mate, kua itiia ratou e te mārama.

2 Kua akamaata koe i taua enua ra, i tei kore i akamaataia te rekareka; i teianei ra, te rekareka ra ratou ki mua ia koe mei te rekareka i te tuatau mou ra, mei te rekareka oki o te aronga e tua i te apinga noni ra.

3 Ko te zugo o tana ra apainga, te rakau ki runga i tona pakuivi, te rakau o tei taao mai iaia ra, kua aatiia e koe, mei tei te rā i mate ei Midiana ra.

4 I riro ei te au tamaka o te aronga i akatamakaia ra i te tamaki, e te au kakau i akatakaviriia i roto i te toto ra, no te ai; ei vaie taʼu anga ai ïa.

5 Kua anau mai oki tetai tama na tatou, kua orongaia mai tetai tamaroa na tatou: ei runga i tona ra pakuivi te au vai ei: e tapaia tona ingoa ia Umere, Tumu korero, te Atua Mana, te Metua no te tuatau mutu kore, te Ariki no te au.

6 Kare e mutu te tupu anga o tona ra basileia, e tona au, e noo aia ki runga i te terono o Davida, e ki runga i tona ra basileia, ei akatinamou, e ei akamatutu i te reira, ma te tuatua-tau, e te tuatua-tika, i teianei, e tuatau ua atu. Na te maroiroi o Iehova Sabaota e rave i te reira.

7 E manga tuatua ta te Atu i tono kia Iakoba, e kua iri ki runga ia Iseraela.

8 Ka kite oki te au tangata ravarai, ko Epheraima, e to Samaria katoa, ma te ngakau parau e te akateitei, i te na ko anga e,

9 Kua ngaoro oki te karakaraea ki raro, ei toka tarai ra ta tatou e patu: kua tipuia te sukamino, e tanu ra tatou i te arezi ei tupau.

10 E akatupu katoa mai ei a Iehova i te au enemi o Rezina ei rave iaia, e nana e akarekei tamaki i tona au enemi:

11 To Arama i mua, e te Philiseti i muri; ka apuku rava akera ratou ia Iseraela ma te vaa amama ua. Kare akerai tona riri i anga ke, te akatika ua mairai oki tona rima.

12 Kare oki te au tangata nei i anga mai kiaia i tei pāpā mai ia ratou ra; kare oki ratou i kimi ia Iehova Sabaota ra.

13 E tipu ke atu ei a Iehova ia Iseraela nei, i te upoko, e te iku, i te kikau nu tamara, e te mauku, i te rā okotai.

14 Ko te tangata metua, e te tangata akangateiteiia, ko te upoko ïa; e te peroveta e apii i te tuatua pikikaa ra, ko te iku ïa.

15 Na te au arataki o teianei au tangata ratou i arataki ke: e ko tei aratakiia ra e ratou, e pou katoa ïa.

16 E teianei kare te Atu e rekareka i to ratou au tangata ou, kare oki aia e aroa i ta ratou au tamariki matiroeroe, e te au vaine takaua ra; no te mea e aronga pikikaa anake ratou, e te rave tuatua kino ra, e tuatua neneva anake kare e vaa toe. Kare akerai tona riri i anga ke, te akatika ua mairai oki tona rima.

17 Te ka nei oki te kino mei te ai ra: e pou te rakau taratara e te tataramoa; e e mura oki ki te vaorakau piripiri ra; e peke oki ratou ki runga mei te kou auai ra.

18 No te riri o Iehova Sabaota ra i pakapakaʼi te enua nei, e riro oki te tangata nei mei te vaie no te ai ra: kare oki te tangata e akaperepere e tae ua atu ki tona taeake.

19 Ka āru aia ki te pae katau, e e pongi ra; e kai oki i te pae kaui, kare ra e pangia te kaki: e kai oki te tangata ravarai i te kiko o tona uaorai rima:

20 Ko Manase ia Epheraima; e ko Epheraima ia Manase: e kapiti ra raua i te rave ia Iuda. Kare akerai tona riri i anga ke, te akatika ua mairai oki tona rima.

21 [Not in Rarontongan Bible. Chapter 8:23 is NW Chapter 9:1, thus chapter 9 verses 1-20 match verses 2-21 in NW.]