Zekaria

1 I TE varu o te marama, i te mataiti rua o Dariu, i tae mai ei te tuatua a Iehova kia Zekaria, te tamaiti a Berekia, te tamaiti a Ido, peroveta ra, na ko maira,

2 E riri maata to Iehova ki to kotou na ai metua.

3 E karanga atura koe kia ratou, Te na ko mairā Iehova Sabaota ra; E ariu mai kotou kiaku, te tuatua mairā Iehova Sabaota ra, e naku e ariu atu kia kotou, te tuatua mairā Iehova Sabaota ra.

4 Auraka kotou e arite ki to kotou ai metua, i tei karangaia atu e te au peroveta i muatangana, i te na ko anga atu e, Te na ko mairā Iehova Sabaota ra; E ariu mai kotou i tenana i to kotou au aerenga kino, e ta kotou au ravenga kino: kare ra ratou i akarongo, e kare i akono mai iaku, te tuatau mairā Iehova.

5 Ko to kotou ai metua, teiea ratou? e te peroveta, e tika ainei ratou i te ora anga e tuatau ua atu?

6 Kareka taku au tuatua, e taku au akonoanga ra, taku i akaue i toku au tavini i te au peroveta ra, kare ainei i rokoia to kotou ai metua e te reira? e kua oki mai ratou ma te karanga e, Mei ta Iehova Sabaota i manako e rave ia matou nei, kia tau ki to matou au aerenga, e ki ta matou au ravenga, kua akapera mairai aia ia matou.

7 I te rā e rua ngauru ma a i te marama okotai ngauru ma a i te marama okotai ngauru ma tai ra, koia te marama ra ko Sebata, i te mataiti rua ia Dariu ra, i tae mai ei te tuatua a Iehova kia Zecaria, te tamaiti a Berekia, te tamaiti a Ido, peroveta ra, na ko maira,

8 Akara atura au i te po ra, e i na, e tangata i te noo anga ki runga i tetai oroenua kutekute, i roto aia i te au maire i te tu ua anga i te ngai marumaru ra, e tei murio iaia ra tetai aronga oroenua kutekute, te keu, e te teatea.

9 Kua karanga atura au, Eaa teia, e taku Atu? Kua na ko maira te angela i tuatua mai iaku ra, E akakite atu au ia koe i teia.

10 E kua tuatua maira taua tangata i tu ua i roto i te au maire, na ko maira, Ko te aronga teia i tonokia e Iehova kia aaere ua na runga na raro i te enua nei.

11 Kua karanga atura ratou ki te Angela a Iehova i tu mai i roto i te au maire, na ko atura, I aaere ua ana matou na runga na raro i te enua nei, e i na, te noo ua nei te enua katoa nei, e te akaangaroi nei.

12 Kua tuatua maira te Angela a Iehova, na ko maira, E Iehova Sabaota ra, mei te aa ra te roa e kore ei koe e aroa mai ia Ierusalema, e te au oire o Iuda, taau i riri ua ana i nga mataiti e itu ngauru anga nei?

13 E kua tuatua mairā Iehova ki te angela i tuatua mai iaku ra i te tuatua meitaki e te pumaana.

14 E kua na ko maira te angela i tuatua mai kiaku ra, Ka kapiki ana, ka karanga atu, Te na ko mairā Iehova Sabaota ra, Kua maroiroi roa au ia Ierusalema, e ia Ziona.

15 E kua riri rava au ki te au etene i noo ponuiaau ua ra; e riri iti oki toku, e na ratou maira te mate maata.

16 E teianei, te na ko mairā Iehova; Kua oki au ki Ierusalema ma te aroa; e patuia toku ra are i reira, te tuatua mairā Iehova Sabaota ra, e ka akatikaia te tataura na runga ia Ierusalema.

17 E kapiki akaou atu, e karanga atu, Te na ko mairā Iehova Sabaota, Tena ka pararauare atu rai toku au oire ki te meitaki; e e akapumaana akaou rai a Iehova ia Ziona, e mareka akaou rai oki aia ia Ierusalema.

18 Kua nānā akera au i taku mata i reira, e kua akara au e i na, e puke tara e a.

19 E kua karanga atura au ki te angela i tuatua mai iaku ra, Eaa teia? E kua tuatua maira aia kiaku, Ko nga tara teia i pueurikiriki ei Iuda, Iseraela, e Ierusalema.

20 Kua akakite mairā Iehova kiaku i nga taunga toko a.

21 Kua karanga atura au, I aere mai ratou nei e rave i te aa? E kua tuatua maira aia, na ko maira, Ko nga tara ïa te reira i pueurikiriki ei Iuda e, kare e tangata e akateitei ake i tona upoko: i aere maira ratou nei e akamataku atu ia ratou, e ei tuku i te au tara o te pa enua ra ki raro, i tei akateitei i to ratou tara ki te enua ra kia Iuda kia pueurikiriki ke te reira.